aRomain 3:1-31
3 Tongaso, Juif ayeke kota ahon ambeni zo na nyen? wala nzoni ti fango ganza ayeke so wa?
2 Kota ti ala ni ayeke na yâ ti aye kue. Kozoni kue, ngbanga ti so a zia na maboko ti ala atënë so ayeke nzoni-kue na so alondo na yanga ti Nzapa.
3 Tongaso, ye ni ayeke nyen? Tongana ambeni afa so ala yeke na mabe pëpe, mabe so amanke ala alingbi ti sara si peko ti dutingo be-ta-zo ti Nzapa angbâ senge?
4 Zia ye tongaso asi lâ oko pëpe! Me zia a hinga Nzapa tongana Nzapa ti tâ tënë, atâa so a hinga zo oko oko kue tongana zo ti mvene, legeoko tongana ti so a sû na yâ ti Mbeti ti Nzapa, a tene: “Tongaso si mo fa so mo yeke mbilimbili na yâ ti atënë ti mo na mo lingbi ti sigigi na yâ ti tënë na ngoi so a yeke fâ ngbanga ti mo.”
5 Me, tongana sarango ye ti e so ayeke mbilimbili pëpe ayä mbilimbili ti Nzapa na nduzu, fade e tene nyen? E tene ande so Nzapa ayeke sara ye mbilimbili pëpe tongana lo fa ngonzo ti lo na gigi? (Mbi yeke sara tënë tongana ti so zo ayeke tene tënë.)
6 Zia ye tongaso asi lâ oko pëpe! Teti tongana a yeke tongaso pëpe, ka Nzapa ayeke fâ ande ngbanga ti dunia so tongana nyen?
7 Me tongana mvene ti mbi asara si tâ tënë ti Nzapa akiri aga kota mingi teti gloire ti lo, ngbanga ti nyen a ngbâ ti fâ ngbanga na li ti mbi tongana mbeni wasiokpari?
8 Ngbanga ti nyen e tene pëpe gi peko ti atënë ti wataka so ambeni zo abi na li ti e atene so e si e tene: “Zia e sara aye ti sioni si aye ti nzoni aga”? Ngbanga so atï na ndo ti azo so ayeke na lege ti mbilimbili.
9 Ye ni nyen? E la e yeke nzoni mingi ahon ambeni zo? Oko pëpe! E zia tënë fade kozo awe na li ti aJuif na aGrec nga, e tene so ala kue ayeke na gbe ti siokpari.
10 A yeke gi tongana ti so a sû na Mbeti ti Nzapa, a tene: “Mbeni zo ti mbilimbili ayeke dä pëpe, même oko tongaso ayeke dä pëpe.
11 Zo oko ayeke dä pëpe so agbu nda ti ye nzoni, zo oko ayeke dä pëpe so agi Nzapa.
12 Azo kue ahon nde awe, ala kue aga senge ye. Zo oko ayeke dä pëpe so ayeke sara nzoni ye na mba ti lo, même oko tongaso ayeke dä pëpe.”
13 “Lege ti go ti ala ayeke mbeni dû ti kuâ so yanga ni azi, ala yeke handa azo na yanga ti ala.” “Ngu ti yanga ti asioni ngbo ayeke na peko ti aporo ti yanga ti ala.”
14 “Yanga ti ala asi singo na tënë ti deba nga na atënë ti songo bê.”
15 “Gere ti ala ayeke kpe hio ti tuku mênë.”
16 “Futingo ye nga na ye ti mawa ayeke na ndo ti alege ti ala,
17 na ala hinga lege ti siriri pëpe.”
18 “Mbeto ti Nzapa ayeke na yâ ti bê ti ala pëpe.”
19 E hinga so aye kue so Ndia asara tënë ni, lo sara tënë ni na azo so ayeke na gbe ti Ndia, tongaso si yanga kue akanga nga ngbanga ti Nzapa alingbi ti tï na ndo ti dunia kue.
20 Tongaso, na lege ti akusala ti ndia, a yeke diko zo oko pëpe tongana zo ti mbilimbili na gbele lo, teti tâ hingango ye na ndo ti siokpari aga na lege ti ndia.
21 Me fadeso tongana a zia ndia nde, mbilimbili ti Nzapa asigigi polele, tongana ti so Ndia na aProphète asara tënë ti témoin ni.
22 Biani, ala kue so ayeke na mabe, mbilimbili ti Nzapa na lege ti mabe na Jésus Christ aga ti ala. Teti a sara kangbi na popo ti azo pëpe.
23 Teti azo kue asara siokpari awe na ala si nduru na gloire ti Nzapa pëpe,
24 na a yeke tongana mbeni matabisi so a mû ni senge senge si a diko ala tongana azo ti mbilimbili na lege ti kota nzobe ti lo so aga na lege ti zingo ala so aga na lege ti ngere so Christ Jésus afuta ni ti zi azo.
25 Nzapa amû lo tongana mbeni offrande so amû lege ti leke songo na popo ti zo na lo Nzapa. Lekengo songo so ayeke na lege ti mabe na yâ ti mênë ti lo. Ye so asi ti tene Nzapa afa mbilimbili ti lo wani na gigi ngbanga ti so lo yeke pardone asiokpari so a sara ni ândö na ngoi so lo yeke kanga bê.
26 Lo sara tongaso ti fa na gigi mbilimbili ti lo wani na ngoi ti fadeso, tongaso si lo duti mbilimbili même tongana lo diko zo so ayeke na mabe na Jésus tongana zo ti mbilimbili.
27 Tongaso, nda ti pikango kate ni ayeke nyen? Nda ni ayeke dä pëpe. Na lege ti ndia wa? Ndia ti akusala? Ên-ën, me a yeke na lege ti ndia ti mabe.
28 Teti e bâ ti e so a yeke diko mbeni zo tongana zo ti mbilimbili na lege ti mabe, me na lege ti akusala ti ndia pëpe.
29 Wala Nzapa ayeke gi Nzapa ti aJuif awe? Lo yeke nga Nzapa ti azo ti amara pëpe? Biani, lo yeke nga Nzapa ti azo ti amara,
30 teti Nzapa ayeke biani oko, lo so ayeke diko ande azo so afâ ganza awe tongana azo ti mbilimbili ndali ti mabe ti ala, na lo yeke diko ande azo so afâ ganza pëpe tongana azo ti mbilimbili gi na lege ti mabe ti ala.
31 Tongaso, e yeke lungula ndia na lege ti mabe ti e? Zia ye tongaso asi lâ oko pëpe! Me e yeke sara si gere ti ndia aluti ngangu.
