aRomain 4:1-25
4 Teti so ye ni ayeke tongaso, e yeke tene ande nyen na ndo ti Abraham, kotara ti e na lege ti mitele?
2 Na tapande, tongana a diko fade Abraham tongana zo ti mbilimbili ndali ti akusala, ka lo pika kate ti lo ndali ni, me na lê ti Nzapa pëpe.
3 Tënë ti Mbeti ti Nzapa atene nyen? A tene: “Abraham amä na bê na Jéhovah, ndali ti mabe ti lo Nzapa adiko lo tongana zo ti mbilimbili.”
4 Ti zo so asara kua, a yeke diko futa ni pëpe tongana mbeni kota nzobe so a sara na lo, me tongana mbeni kuda.
5 Na mbeni mbage, ti zo so azia bê na ndo ti akusala ti lo wani pëpe, me amä na bê na lo so adiko zo so akpe Nzapa pëpe tongana zo ti mbilimbili, a diko mabe ti lo tongana mbilimbili.
6 Legeoko tongana ti so David nga asara tënë ti ngia ti zo so Nzapa adiko lo tongana zo ti mbilimbili me na lege ti akusala pëpe, lo tene:
7 “Ngia ayeke na ala so a pardone asarango ye ti ala so ague nde na ndia, nga ala so a kanga ndo ti asiokpari ti ala.
8 Ngia ayeke na zo so Jéhovah ayeke diko ande siokpari ti lo na li ti lo kete tongaso pëpe.”
9 Tongaso, ngia ni so ayeke gi teti azo so afâ ganza, wala nga teti azo so afâ ganza pëpe? Teti e tene: “Nzapa adiko Abraham tongana zo ti mbilimbili ndali ti mabe ti lo.”
10 Na a diko lo tongaso na ngoi wa? Na ngoi so lo fâ ganza awe wala na ngoi so lo de ti fâ ganza pëpe? A yeke pëpe na ngoi so lo fâ ganza awe, me na ngoi so lo de ti fâ ganza pëpe.
11 Lo wara marque ti fango ganza tongana mbeni nzoroko ti mbilimbili na lege ti mabe so lo yeke na ni tongana lo de lani zo so afâ ganza pëpe, tongaso si lo lingbi ti ga babâ ti ala kue so ayeke na mabe na ngoi so ala de ti fâ ganza pëpe, si a diko ala tongana azo ti mbilimbili.
12 Na lo yeke babâ ti ahale so afâ ganza awe, gi pëpe ti ala so agbu tënë ti fango ganza ngangu, me nga ti ala so ayeke tambela na lege ni na peko ti mabe so babâ ti e Abraham ayeke na ni na ngoi so lo de ti fâ ganza pëpe.
13 Teti a yeke na lege ti ndia pëpe si Abraham wala ngongoa ti lo awara lani zendo so lo yeke duti ande héritier ti mbeni dunia, me a yeke na lege ti mbilimbili so aga na lege ti mabe.
14 Teti tongana ala so agbu tënë ti ndia ayeke ahéritier, andâ mabe ni aga ye senge na a lungula zendo ni awe.
15 Ti tâ tënë ni, Ndia asara si ngonzo ti Nzapa alondo, me na ndo so ndia ayeke dä pëpe, tënë ti kengo ndia ayeke dä oko pëpe.
16 Ndani la, zendo ni ayeke tongana ye ti peko ti mabe, si ye ni asi alingbi na kota nzobe ti Nzapa, ti tene zendo ni aga tâ tënë teti ala kue so ayeke ti ngongoa ti lo, gi pëpe ngbanga ti ala so agbu tënë ti Ndia, me nga ngbanga ti ala so agbu tënë ti mabe ti Abraham. (Lo yeke babâ ti e kue,
17 gi tongana ti so a sû na Mbeti ti Nzapa, a tene: “Mbi zia mo ti ga babâ ti amara mingi.”) Ye so asi na gbele Lo so Abraham ayeke lani na mabe na lo, so ti tene na gbele Nzapa, lo so akiri na akuâ na fini na lo iri aye so ayeke dä pëpe mo bâ mo tene a yeke dä awe.
18 Atâa so lo yeke na mbeni nda ti tënë pëpe ti duti na beku, lo zia beku ti lo na ndo ti mabe so lo yeke na ni lani, so fade lo yeke ga babâ ti amara mingi, a lingbi na tënë so a tene: “Fade ngongoa ti mo ayeke ga tongaso.”
19 Nga, atâa so mabe ti lo awoko lani pëpe, lo bâ so tere ti lo awoko kue awe, teti lo yeke na ngu ngbangbo oko tongaso, nga yâ ti Sara akanga awe.
20 Me ndali ti zendo ti Nzapa, lo dë kite pëpe ngbanga ti so mabe amanke lo, me lo wara ngangu na lege ti mabe ti lo, na lo mû gloire na Nzapa
21 na lo hinga biani lo tene ye so Nzapa amû zendo ni lani na lo, Nzapa ayeke nga na ngangu ti sara ni.
22 Tongaso “ndali ni Nzapa adiko lo tongana zo ti mbilimbili.”
23 Me so a sû na Mbeti ti Nzapa a tene: “Ndali ni Nzapa adiko lo tongana zo ti mbilimbili,” a sû ni gi ndali ti lo oko pëpe,
24 me nga ndali ti e, e so a fa kozo awe a tene a yeke diko e tongana azo ti mbilimbili ngbanga ti so e mä na bê na lo so azingo Seigneur ti e Jésus na kuâ.
25 A mû lo ndali ti afaute ti e na a zingo lo na kuâ ti tene a diko e tongana azo ti mbilimbili.
