aRomain 8:1-39
8 Ala so ayeke beoko na Christ Jésus, ala yeke na ngbanga na li ti ala pëpe.
2 Teti ndia ti yingo so amû fini so ayeke na lege ti dutingo beoko na Christ Jésus azi mo awe na gbe ti ndia ti siokpari na ti kuâ.
3 Teti, ye so Ndia ayeke na ngangu ti sara ni pëpe, ngbanga ti so Ndia ni awoko ndali ti mitele, Nzapa asara ni na tokuango Molenge ti lo wani na yâ ti tere so akpa ti mitele so ayeke na siokpari nga ti zi siokpari ni. Na lege so, Nzapa afâ ngbanga na li ti siokpari so ayeke na yâ ti mitele,
4 si aye ti mbilimbili so Ndia ahunda aga tâ tënë na yâ ti e so e yeke tambela na lege ti mitele pëpe, me na lege ti yingo.
5 Teti ala so ayeke sara ye alingbi na mitele abi bê ti ala na ndo ti aye ti mitele, me ala so ayeke sara ye alingbi na yingo abi bê ti ala na ndo ti aye ti yingo.
6 Bingo bê na ndo ti mitele aye ti tene kuâ, me bingo bê na ndo ti yingo aye ti tene fini nga na siriri,
7 ngbanga ti so bingo bê na ndo ti mitele aye ti tene dutingo wato ti Nzapa, teti so mitele ayeke na gbe ti ndia ti Nzapa pëpe nga lo lingbi ti duti na gbe ni pëpe.
8 Ni la, ala so ayeke sara ye alingbi na mitele alingbi pëpe ti nzere na lê ti Nzapa.
9 Ye oko, tongana biani yingo ti Nzapa aduti na yâ ti ALA, ALA yeke sara ye alingbi na mitele pëpe, me alingbi na yingo. Me tongana mbeni zo ayeke na yingo ti Christ pëpe, zo tongaso ayeke ti Christ pëpe.
10 Me tongana Christ ayeke beoko na ALA, biani tere ni akui awe ndali ti siokpari, me yingo ayeke ye so amû fini ndali ti mbilimbili.
11 Fadeso, tongana yingo ti lo so azingo Jésus na kuâ aduti na yâ ti ALA, lo so azingo Christ Jésus na kuâ ayeke sara nga si tere ti ALA so ayeke kui kuingo aduti na fini na lege ti yingo ti lo, yingo so aduti na yâ ti ALA.
12 Tongaso, aita, a gbu e na ngangu pëpe ti sara ye alingbi na mitele nga ti mû peko ti anzara ti mitele ni.
13 Teti tongana ALA duti na fini alingbi na mitele, ALA yeke kui tâ biani. Me, tongana na lege ti yingo, ALA fâ asarango ye ti tere, fade ALA yeke duti na fini.
14 Teti azo kue so yingo ti Nzapa ayeke fa lege na ala, ala yeke amolenge ti Nzapa.
15 Teti ALA wara lani pëpe mbeni yingo ti dutingo ngbâa so asara si ALA kiri aduti na mbeto, me ALA wara lani mbeni yingo so Nzapa amû ti mû ALA ti ga amolenge ti lo. Na lege ti yingo so, e dekongo, e tene: “Abba, Babâ!”
16 Yingo wani afa na yingo ti e so e yeke amolenge ti Nzapa.
17 Tongaso, tongana e yeke amolenge ti Nzapa, e yeke nga ahéritier: biani ahéritier ti Nzapa, me ahéritier legeoko na Christ, gi tongana e bâ pasi legeoko na lo si a mû nga gloire na e legeoko na lo.
18 Ni la, mbi bâ ti mbi so apasi ti ngoi ti fadeso ayeke ye oko pëpe tongana a haka ni na gloire so a yeke fa ni na gigi na lege ti e.
19 Teti lê ti création ayeke gi na lege ti ku ngoi so amolenge ti Nzapa ayeke fa tere ti ala na gigi.
20 Teti a zia création na gbe ti buba ye, na a yeke ti bê ti création wani pëpe, me a yeke ti bê ti lo so azia création ni na gbe ti buba ye, ndali ti beku
21 so fade a yeke zi création nga na gbe ti ngbâa ti ye so abuba, na lo yeke wara liberté ti gloire ti amolenge ti Nzapa.
22 Teti e hinga so juska fadeso création kue angbâ gi ti dema legeoko na ti bâ pasi legeoko.
23 Gi so pëpe, me e nga so e yeke na akozo li ti ye ni, so ti tene yingo, e yeke dema na yâ ti bê ti e na ngoi so e yeke ku kungo ti tene a mû e ti ga amolenge ti Nzapa, ti tene na lege ti ngere so a futa ti zi azo, a zi e na yâ ti tere ti e.
24 Teti a sö e na yâ ti beku so. Na beku so zo abâ ni ayeke beku pëpe, teti tongana zo abâ mbeni ye awe, lo yeke ku ni?
25 Me tongana e ku mbeni ye so e bâ ni pëpe, e yeke ngbâ ti kanga bê ti ku ni.
26 Legeoko tongaso, yingo nga aga ti mû maboko na ndo so e woko dä. Teti kpale ni ayeke so: ye so a lingbi e sambela ndali ni tongana e yeke na bezoin ni, e hinga ni pëpe. Me yingo wani ayeke hunda teti e na atënë ti dema so asigigi pëpe.
27 Me lo so ayeke bâ yâ ti bê ahinga nda ti yingo, teti yingo ni ayeke hunda ye tongana ti so Nzapa aye ndali ti azo so ayeke nzoni-kue.
28 E hinga awe so Nzapa ayeke sara si akusala ti lo kue asara kua maboko na maboko ndali ti nzoni ti azo so andoye Nzapa, ala so lo iri ala alingbi na ye so lo leke na bê ti lo ti sara.
29 Teti ala so lo hinga ala kozo, lo leke nga kozoni awe ti sara si ala kpa Molenge ti lo, si Molenge ni aduti kozo molenge na popo ti aita ti lo mingi.
30 Nga, ala so lo diko ala kozoni, a yeke ala so lo iri ala nga. Na ala so lo iri ala ayeke nga ala so lo diko ala tongana azo ti mbilimbili. Na nda ni, ala so lo diko ala tongana azo ti mbilimbili ayeke ala so lo mû nga gloire na ala.
31 Tongaso, e yeke tene ande nyen na ndo ti aye so? Tongana Nzapa ayeke na e, fade zo wa si ake e?
32 Lo so même lo zi Molenge ti lo na yâ ti kpale pëpe, me lo zia lo na lê ni ndali ti e kue, ngbanga ti nyen si lo yeke sara ande nzoni bê na e pëpe ti mû tanga ti aye kue na e legeoko na Molenge ti lo ni?
33 Zo wa si ayeke bi tënë ande na li ti ala so Nzapa asoro ala? Nzapa ayeke Lo so adiko ala tongana azo ti mbilimbili.
34 Zo wa si ayeke fâ ngbanga na li ti ala ande? Christ Jésus ayeke lo so akui lani, biani, lo yeke lo so a zingo lo na kuâ, lo so lo yeke na koti ti Nzapa, nga lo so ayeke hunda ye teti e.
35 Zo wa si ayeke kangbi e ande na ndoye ti Christ? A yeke ye ti vundu? wala ye ti mawa? wala sarango ye ti ngangu na e? wala nzara? wala dutingo tere senge? wala kpale so ayeke hara e? wala épée?
36 Legeoko tongana ti so a sû na Mbeti ti Nzapa, a tene: “Ndali ti mo e yeke lakue na lê ti kuâ, a yeke bâ e tongana angasangbaga so a yeke fâ ala fango.”
37 Atâa so kue, e sö benda na yâ ti aye so kue ndali ti lo so andoye e.
38 Teti mbi hinga mbi tene atâa kuâ, wala fini, wala a-ange, wala angorogbia, wala aye so ayeke dä fadeso, wala aye so ayeke ga ande, wala angangu,
39 wala yongo ti ye na nduzu, wala lingo ti ye na gbe ni, wala mbeni ye nde so a leke alingbi ande pëpe ti kangbi e na ndoye ti Nzapa so ayeke na yâ ti Christ Jésus Seigneur ti e.
