Jacques 4:1-17
4 Abira na atiri so ayeke na popo ti ALA alondo na ndo wa? A londo na kota nzara ti bê ti ALA ti aye ti mitele so ayeke tiri na yâ ti amembre ti tere ti ALA, ni la pëpe?
2 ALA sara nzara ti ye, me ALA wara ni pëpe. ALA ngbâ ti fâ zo nga ti sara bê ti ye, me ALA lingbi pëpe ti wara ye ni. ALA ngbâ ti tiri na ti sara bira. ALA wara ye ni pëpe ngbanga ti so ALA yeke hunda ni pëpe.
3 ALA yeke hunda ye, me ALA wara ni pëpe ngbanga ti so ALA yeke hunda ni ti sara na ye ti sioni, tongaso si ALA sara na aye so kota nzara ti bê ti ALA ti wara aye ti mitele aye.
4 ALA awali so agi akoli nde, ALA hinga pëpe so sarango kamarade na dunia so ayeke dutingo wato ti Nzapa? Zo so aye ti ga kamarade ti dunia so ayeke sara tere ti lo wato ti Nzapa.
5 Wala ALA bâ ti ALA so a yeke senge si Mbeti ti Nzapa atene tënë so? A tene: “Bibe ti kota bê so ayeke na yâ ti e si angbâ lakue ti sara nzara ti aye nde nde.”
6 Ye oko, kota nzobe so Nzapa amû ayeke ti lo kota mingi. Ni la, a tene: “Nzapa ake azo ti baba, me lo mû kota nzobe ti lo na azo so ayeke na tâ be-ti-molenge.”
7 ALA duti na gbe ti Nzapa; me ALA ke Zabolo, na fade lo yeke kpe yongoro na tere ti ALA.
8 ALA ga nduru na Nzapa, na fade lo yeke ga nduru na ALA. ALA sukula maboko ti ALA, ALA awasiokpari, na ALA sukula bê ti ALA, ALA so bê ti ALA ayeke use use na ndo ti ye so ALA ye ti sara.
9 ALA sara mawa, ALA sara vundu nga ALA toto. Zia ngia so ALA yeke he agbian aga sarango vundu, na ngia so ALA yeke na ni agbian aga lê so ayeke na vundu.
10 ALA sara tere ti ALA kete na gbele Jéhovah, na fade lo yeke yä ALA na nduzu.
11 Aita, ALA zia ti sara tënë na tere ti mba. Zo so asara tënë na tere ti ita ti lo wala lo fâ ngbanga na li ti ita ti lo, lo yeke sara tënë na tere ti ndia na lo yeke fâ ngbanga na li ti ndia nga. Me tongana mo yeke fâ ngbanga na li ti ndia, mo yeke zo ti sarango ye alingbi na ndia pëpe, me mo yeke wafango ngbanga.
12 Gi mbeni zo oko si ayeke dä so ayeke zo ti lungo ndia nga wafango ngbanga, na lo si alingbi ti sö zo nga ti futi zo. Me ti mo, mo yeke zo wa si mo yeke fâ ngbanga na li ti mba ti mo?
13 ALA mä si, ALA so atene: “Laso wala kekereke e yeke gue na kodoro tongaso na e yeke sara ngu oko kâ, e yeke dë buze na e yeke wara nginza mingi,”
14 me ALA hinga pëpe ye so ayeke si na gigi ti ALA kekereke. Teti ALA yeke tongana guru ti ngu so asigigi teti kete ngoi si na pekoni a girisa.
15 A hon ti tene tënë so, a lingbi ALA tene: “Tongana Jéhovah aye, e yeke ngbâ na fini na e yeke sara so wala so.”
16 Me ALA yeke sara baba ti pikango kate ti ALA. Baba tongaso kue ayeke sioni.
17 Ni la, tongana mbeni zo ahinga lege ti sara ye so ayeke nzoni, me lo sara ni pëpe, so ayeke siokpari la lo sara so.
