Jean 10:1-42
10 “Biani, ti tâ tënë ni, mbi tene na ALA: Zo so alï na yâ ti gbagba ti angasangbaga ni na yanga ni pëpe, me lo montê na mbeni ndo nde si lo lï dä, zo so ayeke zo ti nzi nga zo ti gbungo ye ti zo na ngangu.
2 Me zo so alï na yanga ti gbagba ni, lo yeke berger ti angasangbaga ni.
3 Wabatango yanga ti gbagba ni azi ni na lo, na angasangbaga ni amä go ti lo, lo iri angasangbaga ti lo oko oko na iri ti ala na lo sigigi na ala.
4 Tongana lo sigigi na angasangbaga ti lo kue awe, lo hon kozo na ala, na angasangbaga ni amû peko ti lo ngbanga ti so ala hinga go ti lo.
5 Angasangbaga ni ayeke mû ande peko ti mbeni wande oko pëpe, me ala yeke kpe ande lo ngbanga ti so ala hinga go ti awande pëpe.”
6 Jésus atene toli so na ala, me ala mä yâ ti atënë so lo yeke tene na ala so pëpe.
7 Na pekoni, Jésus akiri atene: “Biani, ti tâ tënë ni, mbi tene na ALA: Mbi yeke yanga ti gbagba ti angasangbaga ni.
8 Azo so kue aga na place ti mbi ayeke azo ti nzi nga azo ti gbungo aye ti azo na ngangu. Me angasangbaga ni amä ala pëpe.
9 Mbi yeke yanga ti gbagba ni. Zo so ahon na lege ti mbi ti lï na yâ ni, a yeke sö lo ande, fade lo yeke lï na lo yeke sigigi nga lo yeke wara ndo ti tengo pere.
10 Zo ti nzi aga gi ti nzi angasangbaga ni, ti fâ ala na ti futi ala. Mbi ga si ala lingbi ti wara fini na ala wara ni mingi.
11 Mbi yeke berger so ayeke nzoni mingi. Berger so ayeke nzoni mingi akä âme ti lo na kuâ ndali ti angasangbaga ni.
12 Zo ti kua, so ayeke berger pëpe na so angasangbaga ni ayeke ti lo pëpe, tongana lo bâ mbo ti ngonda ayeke ga, lo dö angasangbaga ni lo kpe (na mbo ti ngonda ni agbu ala nga lo kangbi yâ ti ala kirikiri),
13 ngbanga ti so lo yeke ti lo gi zo ti kua na lo yeke bi bê ti lo na angasangbaga ni nzoni pëpe.
14 Mbi yeke berger so ayeke nzoni mingi, mbi hinga angasangbaga ti mbi na angasangbaga ti mbi ahinga mbi,
15 gi tongana ti so Babâ ahinga mbi na mbi nga mbi hinga Babâ. Tongaso mbi kä âme ti mbi na kuâ ndali ti angasangbaga ni.
16 “Mbi yeke na ambeni ngasangbaga so ayeke ti gbagba so pëpe. A lingbi mbi ga na ala so nga, na fade ala yeke mä go ti mbi na ala yeke ga kundu oko, berger oko.
17 Ndani la si Babâ andoye mbi, ngbanga ti so mbi kä âme ti mbi na kuâ si mbi kiri mbi wara ni.
18 Zo oko amû ni na tïtî mbi pëpe, me mbi wani si mbi kä ni na kuâ. A mû na mbi yanga ti kä ni na kuâ na a mû na mbi yanga ti kiri ti wara ni. Mbi wara commandement na ndo ti ye so na mbage ti Babâ ti mbi.”
19 Kangbi akiri atï na popo ti aJuif ndali ti atënë so.
20 Mingi ti ala ayeke tene: “Mbeni sioni yingo ayeke na yâ ti lo nga ye asara li ti lo. ALA mä lo ngbanga ti nyen?”
21 Ambeni ayeke tene: “So ayeke pëpe atënë ti zo so mbeni sioni yingo ayeke na yâ ti lo. Mbeni sioni yingo alingbi pëpe ti zi lê ti awaziba, ni la pëpe?”
22 Na ngoi ni so, matanga ti mungo temple na Nzapa ayeke na Jérusalem. A yeke ngoi so dê ayeke mingi,
23 na Jésus ayeke tambela na yâ ti temple na gbe ti véranda ti Salomon.
24 Tongaso aJuif angoro lo na ala to nda ti tene na lo: “Mo yeke sara si bê ti e angbâ gi na nduzu juska lawa? Tongana mo yeke Christ, tene na e polele.”
25 Jésus akiri tënë na ala: “Mbi tene ni na ALA awe, me ALA mä na bê na ni pëpe. Akusala so mbi yeke sara na iri ti Babâ ti mbi, ni si ayeke sara tënë na ndo ti mbi.
26 Me ALA mä na bê na ni pëpe ngbanga ti so ALA yeke angasangbaga ti mbi pëpe.
27 Angasangbaga ti mbi amä go ti mbi, mbi hinga ala, na ala mû peko ti mbi.
28 Na mbi mû na ala fini ti lakue lakue, a yeke futi ala lâ oko pëpe, na fade zo oko ayeke gboto ala na tïtî mbi pëpe.
29 Ye so Babâ ti mbi amû na mbi ayeke kota mingi ahon tanga ti aye kue, na zo oko alingbi ti gboto ni na maboko ti Babâ pëpe.
30 Mbi na Babâ e yeke oko.”
31 A-Juif akiri amû atênë ti bo na lo.
32 Jésus atene na ala: “Mbi fa na ALA apendere kusala mingi so alondo na Babâ. Na ALA ye ti bo mbi na tênë ngbanga ti kusala ti so wa?”
33 A-Juif akiri tënë na lo: “E yeke bo mo na tênë ndali ti mbeni pendere kusala pëpe, me ndali ti so mo zonga Nzapa. Teti mo yeke zo, me mo ye ti fa so mo yeke mbeni nzapa.”
34 Jésus akiri tënë na ala: “A sû tënë so na yâ ti Ndia ti ALA pëpe? A tene: ‘Mbi tene: “ALA yeke anzapa.” ’
35 Tongana lo iri ala so tënë ti Nzapa afâ ngbanga na li ti ala, lo tene ala yeke ‘anzapa,’ na a lingbi pëpe ti mingo ngangu ti tënë so Mbeti ti Nzapa atene,
36 ALA tene na mbi, mbi so Babâ asara si mbi ga nzoni-kue na lo tokua mbi na yâ ti dunia so, ALA tene: ‘Mo zonga Nzapa,’ ngbanga ti so mbi tene mbi yeke Molenge ti Nzapa?
37 Tongana mbi yeke sara akusala ti Babâ ti mbi pëpe, ALA mä na bê na mbi pëpe.
38 Me tongana mbi yeke sara ni, atâa ALA mä na bê na mbi pëpe, zia ALA mä na bê na akusala ni, si ALA hinga na ALA ngbâ ti hinga so Babâ ayeke beoko na mbi na mbi yeke beoko na Babâ.”
39 Ni la, ala kiri ala tara ti gbu lo, me lo sigigi na yâ ti maboko ti ala.
40 Tongaso lo kiri lo fâ Ngu ti Jourdain, lo gue na ndo so Jean ayeke batize ândö azo dä na lo ngbâ kâ.
41 Na azo mingi aga na mbage ti lo, ala to nda ti tene: “Biani, Jean asara lani mbeni fä oko pëpe, me gbâ ti atënë so Jean atene na ndo ti koli so, atënë ni kue ayeke lani tâ tënë.”
42 Na azo mingi amä na bê na lo kâ.
