Jean 11:1-57
11 Mbeni koli ayeke dä so tere ti lo ason. Iri ti lo ayeke Lazare, zo ti Béthanie, kodoro ti Marie na ti ita ti lo Marthe.
2 A yeke Marie so asara mafuta so a zia yombo dä na tere ti Seigneur na lo mbô gere ti Seigneur na kuä ti li ti lo. Lo la si tere ti ita ti lo Lazare ason.
3 Tongaso, aita ti Lazare ti wali atokua yanga na Jésus, ala tene: “Seigneur, bâ, lo so mo ye lo mingi so, tere ti lo ason.”
4 Me tongana Jésus amä tokua ni, lo tene: “Kobela so ayeke hunzi gi na kuâ pëpe, me a yeke ti mû gloire na Nzapa, si na lege ni a lingbi ti mû gloire na Molenge ti Nzapa.”
5 Jésus andoye Marthe na ita ti lo ti wali nga na Lazare.
6 Me tongana Jésus amä so tere ti Lazare ason, lo kiri lo ngbâ lango use na ndo so lo yeke dä.
7 Na pekoni, lo tene na adisciple ni: “Zia e kiri e gue na Judée.”
8 Adisciple ni atene na lo: “Rabbi, a ninga mingi pëpe azo ti Judée agi ti bo mo na tênë, na mo kiri ti gue kâ?”
9 Jésus akiri tënë: “Wungo ti angbonga ti kota lâ ayeke bale-oko na use pëpe? Tongana mbeni zo atambela na kota lâ, lo yeke gu tere ti lo na mbeni ye pëpe ngbanga ti so lo bâ lumière ti dunia so.
10 Me tongana mbeni zo atambela na bï, lo yeke gu tere ti lo na mbeni ye ngbanga ti so lumière ayeke na yâ ti lo pëpe.”
11 Na peko ti so lo tene atënë so, lo tene na ala: “Kamarade ti e Lazare alango, me mbi yeke gue kâ ti zingo lo na lango ni.”
12 Tongaso adisciple ni atene na lo: “Seigneur, tongana lo yeke lango, fade tere ti lo ayeke kaï.”
13 Me Jésus ayeke sara tënë ti kuâ ti Lazare. Ye oko, ala bâ ti ala atene lo yeke sara tënë ti lango so zo ayeke lango ti wu tere ti lo.
14 Ni la, na ngoi ni so, Jésus atene polele na ala atene: “Lazare akui awe,
15 na mbi yeke na ngia ngbanga ti ALA teti so mbi yeke fade kâ pëpe, tongaso si ALA mä na bê. Me zia e gue na tere ti lo.”
16 Tongaso Thomas, so mbeni iri ti lo ayeke Didyme, atene na amba ti lo disciple ni: “Zia e nga e gue, si e lingbi ti kui legeoko na lo.”
17 Tongana Jésus asi, lo bâ so Lazare asara lango osio na yâ ti sende ti kuâ awe.
18 Béthanie ayeke nduru na Jérusalem, a lingbi kilomètre ota tongaso.
19 Ndani la aJuif mingi aga fade na ndo ti Marthe na Marie ti dë bê ti ala ndali ti kuâ ti ita ti ala ni.
20 Tongana Marthe amä so Jésus ayeke ga, lo gue lo tingbi na lo. Me Marie angbâ ti lo ti duti na da.
21 Marthe atene na Jésus: “Seigneur, tongana mo yeke fade ge, ka ita ti mbi ti koli akui pëpe.
22 Me, même fadeso mbi hinga so ye kue so mo yeke hunda na Nzapa, Nzapa ayeke mû ni ande na mo.”
23 Jésus atene na lo: “Ita ti mo ayeke zingo na kuâ.”
24 Marthe atene na lo: “Mbi hinga so lo yeke zingo ande na kuâ na lango ti nda ni.”
25 Jésus atene na lo: “Mbi yeke zingongo ti akuâ nga na fini. Zo so amä na bê na mbi, atâa lo kui, lo yeke kiri na fini.
26 Na zo kue so ayeke na fini nga lo mä na bê na mbi, lo yeke kui pëpe, lâ oko pëpe. Mo mä na bê na tënë so?”
27 Marthe atene na lo: “En, mbi mä na bê na ni, Seigneur. Mbi mä na bê awe so mo yeke Christ, Molenge ti Nzapa, Lo so ayeke ga na yâ ti dunia so.”
28 Na tongana lo tene tënë so awe, lo gue lo iri ita ti lo Marie, lo sara tënë na lo yeke, lo tene: “Wafango ye ayeke ge na lo iri mo.”
29 Tongana Marie amä tënë so, lo londo hio na lo yeke gue na mbage ti Jésus.
30 Biani, Jésus ade ti lï na yâ ti kete kodoro ni pëpe, me lo ngbâ gi na ndo so Marthe atingbi lo dä.
31 Ye oko, aJuif so ayeke na tere ti Marie na yâ ti da ni na so ayeke dë bê ti lo, tongana ala bâ so Marie alondo hio na lo sigigi, ala mû peko ti lo. Ala bâ ti ala atene lo yeke gue kâ na sende ti kuâ ni ti toto.
32 Tongana Marie asi na ndo so Jésus ayeke dä na lê ti lo atï na ndo ti Jésus, lo tï na gere ti Jésus, lo tene na lo: “Seigneur, tongana mo yeke fade ge, ka ita ti mbi akui pëpe.”
33 Tongana Jésus abâ Marie so ayeke toto, na aJuif so aga legeoko na lo so ayeke toto nga, lo dema na yâ ti bê* ti lo na vundu asara lo.
34 Na lo tene: “ALA zia lo na ndo wa?” Ala tene na lo: “Seigneur, mo ga mo bâ ndo ni.”
35 Jésus atoto na ngu ti lê.
36 Tongaso aJuif ni ayeke tene: “ALA bâ tâ yengo so lo ye na koli so ma!”
37 Me ambeni na popo ti ala atene: “Lo so lo zi lani lê ti waziba so, lo lingbi fade pëpe ti kanga lege na koli so ti kui?”
38 Tongaso, na peko ti so Jésus akiri adema na yâ ti bê ti lo, lo gue na sende ti kuâ ni. A yeke mbeni dû so a zi ni na yâ ti kota tênë na a zia mbeni tênë na yanga ni.
39 Jésus atene: “ALA zi tênë ni.” Marthe, ita ti kuâ ni, atene na Jésus: “Seigneur, ti si na ngoi so, lo fun awe, teti a sara lango osio awe.”
40 Jésus atene na lo: “Mbi tene fade na mo pëpe? so tongana mo mä na bê, fade mo yeke bâ gloire ti Nzapa.”
41 Tongaso ala zi tênë ni. Jésus ayô lê ti lo na nduzu na lo tene: “Babâ, mbi kiri singila na mo so mo mä mbi.
42 Ti tâ tënë ni, mbi hinga so mo yeke mä mbi lakue; me ndali ti gbâ ti azo so aluti na ndo so si mbi sara tënë, ti tene ala mä na bê so mo tokua mbi.”
43 Na peko ti so lo sara tënë so awe, lo dekongo na kota go, lo tene: “Lazare, mo sigigi!”
44 Koli so akui awe so asigigi, gere ti lo na maboko ti lo angbâ na abongo so a kanga na lo, na a kanga lê ti lo na mbeni yanga ti bongo. Jésus atene na ala: “ALA zi lo na ALA zia lo gue.”
45 Tongaso aJuif mingi so aga na ndo ti Marie na so abâ ye so Jésus asara amä na bê na lo.
46 Me ambeni na popo ti ala ague na aFarizien na ala tene na ala tënë ti aye so Jésus asara.
47 Ndani la, aprêtre-mokonzi nga na aFarizien abungbi azo ti Sanhédrin ni kue na ala to nda ti tene: “So e yeke sara ande nyen? teti koli so asara afä mingi.
48 Tongana e zia gi lo, lo gue na ni tongaso, azo kue ayeke mä na bê ande na lo na aRomain ayeke ga ti mû ndo ti e nga na mara ti e.”
49 Me mbeni oko na popo ti ala, Caïphe, so lo yeke kota prêtre na ngu ni so, atene na ala: “ALA hinga ye oko dä pëpe,
50 na ALA gbu li ti ALA pëpe so a yeke ndali ti nzoni ti ALA tongana zo oko akui ngbanga ti azo ni, si a futi mara ni kue pëpe.”
51 Ye oko, tënë so lo tene alondo na lo wani pëpe. Me teti so lo yeke kota prêtre na ngu ni so, lo tene prophétie ti fa so a lingbi Jésus akui teti mara ni,
52 na gi teti mara ni pëpe, me nga ti tene lo bungbi oko amolenge ti Nzapa so akangbi kirikiri.
53 Ni la, ti londo na lango ni so, ala mä tere ti fâ lo.
54 Tongaso, Jésus ayeke tambela dandara mbeni pëpe na popo ti aJuif. Me lo zia ndo ni so, lo gue na ndo so ayeke nduru na yando, na yâ ti mbeni gbata so a iri ni Éphraïm, na lo ngbâ kâ, lo na adisciple ni.
55 Matanga ti Pâque ti aJuif apusu nduru, na azo mingi alondo na yâ ti akete kodoro ti gue na Jérusalem kozo na matanga ti Pâque ni ti sukula sioni na tere ti ala tongana ti so ndia afa.
56 Tongaso, ala yeke gi Jésus. Na ngoi so ala yeke luti na yâ ti temple, ala yeke tene na popo ti ala: “ALA bâ ti ALA ni tongana nyen? ALA bâ ti ALA so lo yeke ga ande na matanga ni pëpe?”
57 Andâ aprêtre-mokonzi na aFarizien azia fade yanga ti tene tongana mbeni zo ahinga ndo so lo yeke dä, a lingbi zo ni afa tënë ni, tongaso si ala gbu lo.
Akete tënë na terê ni
^ Na Grec: “yingo.”
