Jean 12:1-50
12 Lango omene kozo na matanga ti Pâque, Jésus asi na Béthanie, ndo so Lazare so Jésus azingo lo lani na kuâ alango dä.
2 Na ndo so, ala sara mbeni kobe ti lakui ndali ti lo. Na Marthe ayeke sara kua na ala, me Lazare ayeke na popo ti ala so aduti na tere ti table na Jésus ti te kobe.
3 Na Marie amû ndambo ti litre tongaso ti mafuta so a zia yombo dä, tâ mafuta ti nard, so ayeke ti nginza mingi na lo sara ni na gere ti Jésus nga lo mbô gere ti Jésus na kuä ti li ti lo. Fion ti mafuta ni so a zia yombo dä amû yâ ti da ni kue.
4 Me Judas Iscariote, mbeni disciple ti Jésus, so aga nduru ti kä lo, atene:
5 “Ngbanga ti nyen si a kä mafuta so na denier ngbangbo ota na a mû nginza ni na awayere pëpe?”
6 Me lo sara tënë so pëpe ngbanga ti so lo bi bê ti lo na ndo ti awayere, me ngbanga ti so lo yeke zo ti nzi na lo yeke bata sanduku ti nginza ni nga lo yeke nzi ka nginza so a zia na yâ ni.
7 Jésus atene: “Zia lo kpô, si lo bata ngobo ti sarango ye so ti ku na lango ti lungo mbi.
8 Teti awayere ayeke ngbâ lakue na ALA, me mbi, mbi yeke ngbâ lakue na ALA pëpe.”
9 Azo mingi mingi na popo ti aJuif amä so lo yeke na ndo so, na ala ga gi ndali ti Jésus pëpe me nga ti bâ Lazare, lo so Jésus azingo lo na kuâ.
10 Aprêtre-mokonzi amä tere fadeso ti fâ Lazare nga kue,
11 teti so ndali ti Lazare, mingi ti aJuif ayeke ga na ndo so na ala yeke mä na bê na Jésus.
12 Na ndade ni, tongana azo mingi mingi so aga fade na matanga ni amä so Jésus ayeke ga na Jérusalem,
13 ala mû amaboko ti keke ti mburu na ala gue ti tingbi na Jésus. Ala to nda ti dekongo, ala tene: “E voro mo, mo sö lo! Tënë nzoni ayeke na ndo ti lo so aga na iri ti Jéhovah, na ndo ti lo so ayeke gbia ti Israël!”
14 Tongana Jésus awara mbeni kete lele, lo duti na ndo ni, gi tongana ti so a sû na Mbeti ti Nzapa, a tene:
15 “Sara mbeto pëpe, molenge-wali ti Sion. Bâ, gbia ti mo ayeke ga, lo duti na ndo ti molenge ti mbeni lele.”
16 Adisciple ti lo abi bê ti ala na ndo ti aye so kozo pëpe, me tongana Jésus awara gloire awe, ala dabe ti ala so a sû tënë ti aye so na ndo ti lo na yâ ti Mbeti ti Nzapa. Nga ala dabe ti ala so azo asara fade aye ni so na lo.
17 Gbâ ti azo so ayeke lani na tere ti lo na ngoi so lo iri Lazare ti sigigi na yâ ti sende ti kuâ na lo zingo lo na kuâ angbâ ti sara tënë ti Jésus.
18 Ndali ti tënë so, gbâ ti azo so ague nga ti tingbi na Jésus, teti ala mä so lo sara lani fä so.
19 Tongaso aFarizien atene na popo ti ala: “ALA bâ, e sara gbä awe. Bâ, azo kue amû peko ti lo awe.”
20 Ambeni Grec ayeke na popo ti azo so aga ti voro Nzapa na ngoi ti matanga ni.
21 Tongaso ala pusu nduru na Philippe so ayeke zo ti Bethsaïda na sese ti Galilée, na ala to nda ti hunda lo, ala tene: “Kota zo, e ye ti bâ Jésus.”
22 Philippe ague asara tënë ni na André. Na André na Philippe ague asara tënë ni na Jésus.
23 Me Jésus akiri tënë na ala, lo tene: “Ngbonga ni asi awe ti tene Molenge ti zo awara gloire.
24 Biani, ti tâ tënë ni, mbi tene na ALA: Tongana lê ti blé atï na sese si akui pëpe, a yeke ngbâ gi lê ti blé oko. Me tongana a kui, na pekoni a yeke lë mingi.
25 Zo so tënë ti âme ti lo agbu bê ti lo mingi, lo yeke futi ni. Me zo so ake âme ti lo na yâ ti dunia so, fade lo yeke bata ni teti fini ti lakue lakue.
26 Tongana mbeni zo aye ti sara kua na mbi, zia lo mû peko ti mbi, na ndo so mbi yeke dä, wakua ti mbi ayeke duti ande dä nga. Na tongana mbeni zo aye ti sara kua na mbi, fade Babâ ayeke ne lo.
27 Ti ndembe so, âme ti mbi ayeke kpô pëpe, na fade mbi tene nyen? Babâ, mo sö mbi na yâ ti ngbonga so. Me, a yeke ngbanga ni si mbi si na ngbonga so.
28 Babâ, mû gloire na iri ti mo.” Na mbeni go alondo na yayu atene: “Mbi mû gloire na ni awe na mbi yeke kiri ti mû gloire na ni.”
29 Tongaso, gbâ ti azo so aluti na ndo so na amä go so ato nda ti tene so a yeke bekpa si asungba. Ambeni ayeke tene: “Mbeni ange si asara tënë na lo.”
30 Jésus akiri tënë: “Go so atoto ndali ti mbi pëpe, me ndali ti ALA.
31 Mbeni ngbanga ti dunia so ayeke dä na ndembe so, na fade a yeke bi mokonzi ti dunia so na gigi.
32 Me mbi, tongana a mû mbi na sese a yä mbi na nduzu, fade mbi yeke gboto mara ti azo nde nde kue na mbage ti mbi.”
33 Lo tene tënë so biani ti fa mara ti kuâ so lo yeke nduru ti wara ni.
34 Tongaso gbâ ti azo ni atene na lo: “E mä na yâ ti Ndia a tene so Christ ayeke ngbâ lakue lakue. Me a sara tongana nyen si mo tene a lingbi a yä Molenge ti zo na nduzu? Molenge ti zo ni ayeke zo wa?”
35 Tongaso Jésus atene na ala: “Lumière ayeke ngbâ ande ti za na popo ti ALA teti mbeni kete ngoi. ALA tambela na ngoi so ALA yeke na lumière ni, tongaso si bingo ahon ALA na ngangu pëpe. Na zo so atambela na yâ ti bingo ahinga pëpe ndo so lo yeke gue dä.
36 Na ngoi so ALA yeke na lumière, ALA mä na bê na lumière ni, tongaso si ALA ga amolenge ti lumière.”
Tongana Jésus asara atënë so awe, lo sigigi na lo honde tere ti lo si ala bâ lo pëpe.
37 Atâa so lo sara afä mingi na lê ti ala, ala yeke mä na bê na lo pëpe,
38 tongaso si tënë ti prophète Ésaïe aga tâ tënë, tënë so lo tene: “Jéhovah, zo wa si amä na bê na tënë so e mä? Âdu ti maboko ti Jéhovah, a fa ni na zo wa?”
39 Nda ni so ala lingbi pëpe ti mä na bê ayeke so Ésaïe akiri atene:
40 “Lo vuko lê ti ala na lo sara si bê ti ala akpengba, tongaso si ala bâ ndo na lê ti ala pëpe nga ala gbu nda ti tënë ni na bê ti ala pëpe na ala gbian lege ti ala pëpe si mbi sava ala.”
41 Ésaïe asara tënë ti aye so ngbanga ti so lo bâ lani gloire ti Christ, na lo sara tënë na ndo ti lo.
42 Ye oko, azo mingi, même na popo ti amokonzi ni, amä na bê na lo biani. Me ngbanga ti aFarizien, ala ke ti fa na gigi so ala mä na bê na lo si a tomba ala na yâ ti synagogue pëpe,
43 teti ala ye gloire so alondo na azo ahon même gloire so alondo na Nzapa.
44 Me Jésus adekongo, lo tene: “Zo so amä na bê na mbi amä na bê gi na mbi pëpe me nga na lo so atokua mbi.
45 Na zo so abâ mbi abâ nga lo so atokua mbi.
46 Mbi ga tongana mbeni lumière na yâ ti dunia so, si azo kue so ayeke mä na bê na mbi angbâ na yâ ti bingo pëpe.
47 Me tongana mbeni zo amä atënë ti mbi na lo bata ni pëpe, mbi yeke fâ ngbanga na li ti lo pëpe, teti mbi ga ti fâ ngbanga ti dunia so pëpe me ti sö dunia ni.
48 Zo so ane mbi pëpe na lo yamba atënë ti mbi pëpe, mbeni ye ayeke dä ti fâ ngbanga ti lo. Tënë so mbi tene, a yeke tënë ni si ayeke fâ ngbanga ti lo na lango ti nda ni,
49 ngbanga ti so mbi sara tënë ti bê ti mbi wani pëpe, me Babâ so atokua mbi si amû na mbi mbeni commandement na ndo ti ye so a lingbi mbi fa na mbi sara tënë ni.
50 Nga, mbi hinga so commandement ti lo ayeke fini ti lakue lakue. Tongaso, aye so mbi sara tënë ni, mbi yeke sara tënë ni gi tongana ti so Babâ afa ni na mbi.”
