Jean 13:1-38
13 Teti so kozo na matanga ti Pâque ni lo hinga so ngbonga ti lo asi awe ti tene lo zia dunia so ti kiri na Babâ ni, Jésus so andoye azo ti lo so ayeke na yâ ti dunia ni, lo ndoye ala juska na nda ni.
2 Na ngoi so ala ngbâ ti te kobe ti lakui ni (andâ Zabolo azia awe na bê ti Judas Iscariote, molenge ti Simon, ti kä Jésus),
3 Jésus ahinga so Babâ ni azia aye kue na maboko ti lo awe na so lo londo na Nzapa si lo ga, na lo yeke kiri na Nzapa,
4 tongaso, lo londo na tere ti kobe ti lakui ni, lo zi abongo ti lo ti ndo ni. Lo mû mbeni bongo, lo kanga na gbe ti yâ ti lo.
5 Na pekoni, lo tuku ngu na yâ ti mbeni kota dû ti sembe na lo to nda ti sukula gere ti adisciple ni nga ti mbô ni na bongo so lo kanga na gbe ti yâ ti lo.
6 Na lo si na Simon Pierre. Simon atene na lo: “Seigneur, mo yeke sukula gere ti mbi?”
7 Jésus atene na lo: “Ye so mbi yeke sara so, mo yeke mä yâ ni fadeso pëpe, me na peko ti aye so si mo yeke mä yâ ni ande.”
8 Pierre atene na lo: “Mo yeke sukula gere ti mbi oko pëpe.” Jésus akiri tënë na lo: “Tongana mbi sukula gere ti mo pëpe, mbeni ye abungbi mbi na mo pëpe.”
9 Simon Pierre atene na lo: “Seigneur, sukula gi gere ti mbi pëpe, me sukula nga maboko ti mbi na li ti mbi kue.”
10 Jésus atene na lo: “Zo so asukula tere ti lo awe ayeke na bezoin ti sukula gi gere ti lo, teti tere ti lo kue ayeke nzoni. ALA, tere ti ALA ayeke nzoni, me ALA kue pëpe.”
11 Jésus ahinga biani zo so ayeke kä lo. Ndani la lo tene: “ALA kue pëpe si ayeke nzoni.”
12 Tongana lo sukula gere ti ala nga lo yü abongo ti lo ti ndo ni si lo kiri lo duti na tere ti table ni awe, lo tene na ala: “ALA hinga ye so mbi sara na ALA so?
13 ALA yeke iri mbi ‘Wafango ye’ nga ‘Seigneur’ na ALA tene tongaso na lege ni, teti mbi yeke ni.
14 Tongana mbi, atâa so mbi yeke Seigneur nga Wafango ye, mbi sukula gere ti ALA, a lingbi ALA nga ALA sukula gere ti mba na popo ti ALA.
15 Teti mbi zia tapande ni na ALA, si gi tongana ti so mbi sara na ALA, a lingbi ALA sara tongaso nga.
16 Biani, ti tâ tënë ni, mbi tene na ALA: Ngbâa ayeke kota ahon wa ti lo pëpe, nga zo ti tokua ayeke kota ahon zo so atokua lo pëpe.
17 Tongana ALA hinga aye so, ALA yeke duti na ngia tongana ALA sara ni.
18 Mbi yeke sara tënë ti ALA kue pëpe. Mbi hinga azo so mbi soro ala. Me a yeke ti tene tënë ti Mbeti ti Nzapa so aga tâ tënë: ‘Lo so ayeke te ka mapa ti mbi ayô ndagere ti lo na tere ti mbi.’
19 Ti londo na ngoi so, mbi yeke sara tënë ni na ALA kozo si ye ni asi, tongaso si na ngoi so a si biani, ALA lingbi ti mä na bê so mbi yeke lo.
20 Biani, ti tâ tënë ni, mbi tene na ALA: Zo so ayamba mbeni zo so mbi tokua, lo yamba mbi nga. Na zo so ayamba mbi, lo yamba nga lo so atokua mbi.”
21 Tongana Jésus atene atënë so awe, bê ti lo agi lo mingi, lo sara tënë so, lo tene: “Biani, ti tâ tënë ni, mbi tene na ALA: Mbeni oko na popo ti ALA ayeke kä mbi ande.”
22 Adisciple ato nda ti bâ lê ti tere, ala gi li ti ala gbä na zo so lo yeke sara tënë so na ndo ti lo.
23 Mbeni disciple ni oko aduti nduru na kate ti Jésus, nga Jésus andoye lo.
24 Tongaso, Simon Pierre asara li ti lo na disciple so na lo tene na lo: “Fa na e zo so lo yeke sara tënë ti lo so.”
25 Tongaso disciple ni aba na mbage ti peko na kate ti Jésus na lo tene na lo: “Seigneur, a yeke zo wa?”
26 Na Jésus akiri tënë: “A yeke lo so mbi yeke mû na lo nduru mapa so mbi yôro na yâ ti kasa.” Tongaso, lo yôro nduru mapa so na yâ ti kasa na lo mû ni na Judas, molenge ti Simon Iscariote.
27 Na peko ti so Judas amû nduru mapa so awe, Satan alï na yâ ti lo. Ni la, Jésus atene na lo: “Ye so mo yeke sara so, mo sara ni hio.”
28 Me zo oko na popo ti ala so aduti na tere ti table ni ahinga pëpe nda ni so lo sara tënë so na Judas.
29 Biani, teti so Judas si ayeke bata sanduku ti nginza ni, ambeni abâ ti ala atene Jésus ayeke tene na lo: “Mo vo aye so e yeke na bezoin ni teti matanga ni,” wala lo yeke tene na lo ti mû mbeni ye na awayere.
30 Tongaso, tongana Judas amû nduru mapa ni awe, lo sigigi hio. Andâ ndo avuko awe.
31 Na peko ti so lo sigigi awe, Jésus atene: “Fadeso, Molenge ti zo awara gloire, na Nzapa awara gloire na lege ti lo.
32 Na Nzapa wani ayeke mû gloire na Molenge ni, na Nzapa ayeke mû na lo gloire fade fade.
33 Amolenge so mbi ndoye ALA mingi, mbi ngbâ na ALA kete si. ALA yeke gi mbi ande, na legeoko tongana ti so mbi tene lani na aJuif, mbi tene: ‘Ndo so mbi yeke gue dä, ALA lingbi ti si dä pëpe,’ mbi tene nga tënë so na ALA fadeso.
34 Mbi yeke mû na ALA mbeni fini commandement: ALA ndoye tere na popo ti ALA. Legeoko tongana ti so mbi ndoye ALA, zia ALA nga ALA ndoye tere na popo ti ALA.
35 A yeke na lege ti ye so si azo kue ayeke hinga ande so ALA yeke adisciple ti mbi: tongana ALA yeke na ndoye na popo ti ALA.”
36 Simon Pierre atene na lo: “Seigneur, mo yeke gue na ndo wa?” Jésus akiri tënë: “Ndo so mbi yeke gue dä so, mo lingbi ti mû peko ti mbi fadeso pëpe, me mo yeke mû peko ti mbi ande.”
37 Pierre atene na lo: “Seigneur, mbi lingbi ti mû peko ti mo fadeso pëpe ngbanga ti nyen? Mbi yeke kä âme ti mbi na kuâ ndali ti mo.”
38 Jésus akiri tënë: “Mo yeke kä ande âme ti mo na kuâ ndali ti mbi? Biani, ti tâ tënë ni, mbi tene na mo: Mbeni koli-kondo ayeke toto oko pëpe juska mo tene fani ota so mo hinga mbi pëpe si.”
