Jean 18:1-40
18 Tongana Jésus asara atënë so awe, lo na adisciple ti lo asigigi, ala fâ popo-hoto ti Cédron, na ala gue na ndo so mbeni yaka ayeke dä. Na lo na adisciple ti lo alï na yâ ti yaka ni.
2 Judas, zo ti kango lo, ahinga ndo ni nga, ngbanga ti so fani mingi Jésus na adisciple ti lo awara tere kâ.
3 Tongaso Judas amû na peko ti lo bungbi ti aturugu nga na aturugu ti temple so aprêtre-mokonzi na aFarizien atokua ala. Na ala ga na akeke so ala zia wâ na li ni, alampe nga na aye ti bira.
4 Teti so Jésus ahinga aye kue so ayeke si na lo, lo sigigi na lo tene na ala: “ALA yeke gi zo wa?”
5 Ala kiri tënë na lo: “Jésus, zo ti Nazareth.” Lo tene na ala: “Mbi la.” Judas, zo ti kango lo, aluti nga na popo ti ala.
6 Me, na ngoi so lo tene na ala: “Mbi la,” ala kiri na peko na ala tï na sese.
7 Tongaso lo kiri lo hunda ala: “ALA yeke gi zo wa?” Ala tene: “Jésus, zo ti Nazareth.”
8 Jésus akiri tënë: “Mbi tene na ALA, mbi la. Tongana mbi la si ALA yeke gi mbi, ALA zia ala so ague ti ala,”
9 si tënë ti lo alingbi ti ga tâ tënë, so lo tene: “Na popo ti ala so mo mû na mbi, mbi girisa mbeni oko tongaso pëpe.”
10 Teti so Simon Pierre ayeke na épée, lo gboto ni, lo dë ngbâa ti kota prêtre na lo fâ mê ti lo ti mbage ti koli. Iri ti ngbâa so ayeke Malchus.
11 Me Jésus atene na Pierre: “Kiri na épée ti mo na yâ ti bozo ni. Kopo so Babâ amû na mbi so, a lingbi mbi nyon gi ni pëpe?”
12 Na pekoni, bungbi ti aturugu ni, mokonzi ti aturugu ni nga na aturugu ti aJuif ni agbu Jésus na ala kanga lo.
13 Ala gue na lo kozoni na Anne, teti lo yeke babâ ti wali ti Caïphe so ayeke kota prêtre na ngu ni so.
14 Biani, Caïphe ayeke lo so awa lani aJuif atene a yeke ndali ti nzoni ti ala tongana zo oko akui ngbanga ti azo ni.
15 Simon Pierre nga na mbeni disciple ayeke mû peko ti Jésus. Kota prêtre ni ahinga disciple so, na disciple ni alï na peko ti Jésus na yâ ti gbagba ti kota prêtre ni,
16 me Pierre ayeke luti na gigi na yanga ti gbagba ni. Tongaso disciple ni so, so kota prêtre ni ahinga lo, asigigi na lo sara tënë na wali ti batango yanga ti gbagba ni na lo sara si Pierre alï.
17 Na pekoni, maseka-wali so ayeke zo ti kua nga so ayeke bata yanga ti gbagba ni atene na Pierre: “Mo yeke nga mbeni oko ti adisciple ti koli so, ni la pëpe?” Lo tene: “Mbi yeke disciple ti lo pëpe.”
18 Angbâa nga na aturugu ayeke luti na ndo so, teti ala tingo fade wâ ti charbon, ndali ti so dê ayeke dä na ala yeke duti na tere ti wâ ni ti tomba dê na tere ti ala. Pierre nga aluti na tere ti ala na tere ti wâ ni na lo yeke tomba dê na tere ti lo.
19 Aprêtre-mokonzi ni ayeke hunda tënë na Jésus na ndo ti adisciple ti lo nga na ndo ti fango ye ti lo.
20 Jésus akiri tënë na lo: “Mbi sara tënë lani dandara na lê ti azo ti dunia so. Lakue mbi fa ye na yâ ti synagogue nga na yâ ti temple, ndo so aJuif kue ayeke bungbi dä. Na mbi sara mbeni tënë na hondengo ni pëpe.
21 Mo hunda tënë na mbi ngbanga ti nyen? Hunda tënë na ala so amä ye so mbi tene lani na ala. Bâ, azo so ahinga ye so mbi tene.”
22 Tongana lo sara tënë so awe, mbeni oko ti aturugu ti temple ni so ayeke luti na ndo so apika lê ti Jésus na lo tene: “A yeke tongaso si mo kiri tënë na prêtre-mokonzi?”
23 Jésus akiri tënë: “Tongana mbi tene sioni tënë, mo fa ni. Me tongana mbi sara tënë na lege ni, ngbanga ti nyen mo pika mbi?”
24 Na pekoni, Anne amû Jésus na kangango ni tongaso, lo tokua lo na kota prêtre Caïphe.
25 Simon Pierre angbâ ti luti na tere ti wâ ti tomba dê na tere ti lo. Tongaso, ala tene na lo: “Mo kue mo yeke mbeni disciple ti lo pëpe?” Lo bere tënë ni, lo tene: “Mbi yeke disciple ti lo pëpe.”
26 Mbeni oko ti angbâa ti kota prêtre ni, so lo yeke fami ti koli so Pierre afâ mê ti lo, atene: “Mbi bâ mo fade na tere ti lo kâ na yâ ti yaka, mvene la?”
27 Me Pierre akiri abere; na fade fade, mbeni koli-kondo atoto.
28 Na pekoni, ala mû Jésus na ndo ti Caïphe ala gue na lo na yangbo ti gouverneur ni. Andâ a yeke kota ndapre. Me ala wani ala lï na yâ ti yangbo ti gouverneur ni pëpe ti tene ala ga sioni pëpe, si ala lingbi ti te kobe ti Pâque.
29 Tongaso Pilate asigigi lo wara ala na lo tene: “Tënë wa ALA bi na li ti koli so?”
30 Ala kiri tënë na lo, ala tene: “Tongana koli so ayeke mbeni zo so asara sioni pëpe, ka e yeke zia lo na maboko ti mo pëpe.”
31 Tongaso Pilate atene na ala: “ALA wani ALA mû lo na ALA fâ ngbanga ti lo alingbi na ndia ti ALA.” A-Juif ni atene na lo: “Ndia amû lege na e pëpe ti fâ mbeni zo.”
32 Ye so asi ti tene tënë ti Jésus aga tâ tënë, tënë so lo tene ti fa mara ti kuâ so a lingbi lo wara ni.
33 Na pekoni, Pilate akiri alï na yâ ti yangbo ti gouverneur ni, lo iri Jésus na lo tene na lo: “Mo yeke gbia ti aJuif?”
34 Jésus akiri tënë: “Tënë so mo tene alondo na mo wani wala ambeni zo si asara tënë ni na ndo ti mbi na mo?”
35 Pilate akiri tënë: “Mbi yeke Juif? Gi azo ti mara ti mo nga na aprêtre-mokonzi si azia mo na maboko ti mbi. Nyen la mo sara?”
36 Jésus akiri tënë: “Royaume ti mbi ayeke ti dunia so pëpe. Tongana royaume ti mbi ayeke fade ti dunia so, ka azo ti gbe ti mbi ayeke tiri si a zia mbi na maboko ti aJuif pëpe. Me bâ, royaume ti mbi ayeke ti dunia so pëpe.”
37 Tongaso, Pilate atene na lo: “So ti tene mo yeke mbeni gbia?” Jésus akiri tënë: “Mo wani mo tene awe so mbi yeke mbeni gbia. Nda ni so a dü mbi nga nda ni so mbi ga na yâ ti dunia ayeke ti tene mbi fa tënë ti témoin na ndo ti tâ tënë. Zo kue so ayeke na mbage ti tâ tënë amä go ti mbi.”
38 Pilate atene na lo: “Tâ tënë ni ayeke nyen?”
Na peko ti tënë so, Pilate akiri asigigi ti wara aJuif na lo tene na ala: “Mbi wara mbeni tënë ti fâ ngbanga na li ti lo ndali ni pëpe.
39 Nga, ALA yeke na mbeni ngobo ti ALA so ahunda ti tene mbi zi na ALA mbeni zo na ngoi ti Pâque. Tongaso, ALA ye mbi zi na ALA gbia ti aJuif ni?”
40 Na ala kiri ala dekongo, ala tene: “Koli so pëpe, me Barabbas!” Andâ Barabbas ayeke mbeni zo ti gbungo aye ti azo na ngangu.
