Jean 20:1-31
20 Na kozo lango ti yenga ni, Marie ti Madgala aga na yanga ti sende ti kuâ ni na kota ndapre, na ngoi so ndo angbâ ti vuko. Lo bâ so a zi tênë ni na yanga ti sende ti kuâ ni awe.
2 Tongaso lo kpe loro lo si na Simon Pierre nga na mbeni disciple ni, lo so Jésus aye lo mingi, na lo tene na ala: “Ala zi Seigneur na yâ ti sende ti kuâ ni awe na e hinga pëpe ndo so ala zia lo dä.”
3 Tongaso Pierre na mbeni disciple ni so asigigi na ala mû lege ala gue na sende ti kuâ ni.
4 Biani, ala use kue ato nda ti mû loro. Me mbeni disciple ni so akpe loro ngangu ahon Pierre na lo si ti lo kozo na sende ti kuâ ni.
5 Lo dengi ti bâ ndo na yâ ni, na lo bâ gi abongo so a kanga na kuâ ni so alango kâ, me lo lï na yâ ni pëpe.
6 Na pekoni Simon Pierre nga asi na peko ti lo, lo lï na yâ ti sende ti kuâ ni. Lo bâ abongo so a kanga na kuâ ni ayeke lango kâ,
7 nga bongo so ayeke fade na li ti lo ayeke na ndo oko pëpe na abongo so a kanga na kuâ ni, me a rulê ni nde na a zia na mbeni ndo.
8 Na ngoi ni so, mbeni disciple ni so asi fade kozo na sende ti kuâ ni alï nga, lo bâ ni na lo mä na bê.
9 Ade ala mä yâ ti tënë ti Mbeti ti Nzapa so pëpe, so atene a lingbi lo zingo na kuâ.
10 Tongaso adisciple ni akiri na da ti ala.
11 Me Marie angbâ ti luti na gigi nduru na sende ti kuâ ni, lo yeke toto. Na pekoni, tongana lo ngbâ ti toto, lo dengi ti bâ ndo na yâ ti sende ti kuâ ni,
12 na lo bâ a-ange use so ayü avuru bongo, oko ayeke duti na ndo so li ti Jésus ayeke fade dä na mbeni ayeke duti na ndo so gere ti lo ayeke fade dä.
13 Na ala tene na lo: “Wali, mo yeke toto ngbanga ti nyen?” Lo tene na ala: “Ala mû Seigneur ti mbi ahon na ni na mbi hinga ndo so ala zia lo dä pëpe.”
14 Tongana lo tene atënë so awe, lo turnê na lo bâ Jésus so ayeke luti, me lo hinga pëpe so a yeke Jésus la.
15 Jésus atene na lo: “Wali, mo yeke toto ngbanga ti nyen? Mo yeke gi zo wa?” Marie abâ ti lo atene a yeke walekengo yâ ti yaka ni la, na lo tene na lo: “Kota zo, tongana mo mû lo mo hon na ni, fa na mbi ndo so mo zia lo dä na fade mbi yeke mû lo.”
16 Jésus atene na lo: “Marie!” Lo kiri lo turnê, lo tene na Jésus na yanga ti Hébreu: “Rabbouni!” (so aye ti tene: “Wafango ye!”)
17 Jésus atene na lo: “Mo zia ti gbu mbi ngangu tongaso. Teti mbi de mbi montê na Babâ pëpe. Me mo gue na mbage ti aita ti mbi na mo tene na ala: ‘Mbi yeke montê na Babâ ti mbi nga Babâ ti ALA, na Nzapa ti mbi nga Nzapa ti ALA.’ ”
18 Marie ti Madgala aga na sango ni na adisciple, lo tene: “Mbi bâ Seigneur awe!” Na lo tene so Jésus asara atënë so na lo.
19 Tongaso, na lakui ti lango ni so, so ayeke kozo lango ti yenga ni, atâa so ayanga ti da so adisciple aduti na yâ ni akanga ngangu ngbanga ti so ala sara mbeto ti aJuif, Jésus asi, na lo luti na popo ti ala, lo tene na ala: “Siriri aduti na ALA.”
20 Tongana lo sara tënë so awe, lo fa na ala amaboko ti lo nga tere ti kate ti lo. Na tere ti adisciple ni anzere so ala bâ Seigneur.
21 Tongaso Jésus akiri atene na ala: “Siriri aduti na ALA. Legeoko tongana ti so Babâ atokua mbi, mbi kue mbi tokua ALA.”
22 Tongana lo sara tënë so awe, lo huru pupu na ndo ti ala na lo tene na ala: “ALA wara yingo vulu.
23 Azo kue so ALA pardone asiokpari ti ala, a yeke pardone ni na azo ni biani. Me azo kue so ALA pardone asiokpari ti ala pëpe, asiokpari ni ayeke ngbâ.”
24 Me Thomas, mbeni oko na popo ti adisciple bale-oko na use, lo so a iri lo Didyme, ayeke lani pëpe na popo ti ala na ngoi so Jésus asi.
25 Tongaso tanga ti adisciple ni atene na lo: “E bâ Seigneur awe!” Me lo tene na ala: “Tongana mbi bâ kä ti apointe na yâ ti amaboko ti lo pëpe, na mbi yôro li ti maboko ti mbi na yâ ti kä ti apointe ni pëpe nga mbi yôro maboko ti mbi na yâ ti kä ti tere ti kate ti lo so pëpe, mbi yeke mä na bê oko pëpe.”
26 Lango miombe na pekoni, adisciple ti Jésus akiri aduti na yâ ti da, na Thomas ayeke na popo ti ala. Atâa so a kanga yanga-da ni ngangu, Jésus asi, lo luti na popo ti ala na lo tene: “Siriri aduti na ALA.”
27 Na pekoni lo tene na Thomas: “Zia li ti maboko ti mo ge, na bâ amaboko ti mbi. Mû maboko ti mo, mo yôro ni na tere ti kate ti mbi na mo zia ti dë kite, me mo mä na bê.”
28 Thomas akiri tënë na lo: “Seigneur ti mbi na Nzapa ti mbi!”
29 Jésus atene na lo: “Mo mä na bê ngbanga ti so mo bâ mbi? Ngia ayeke na ala so abâ pëpe, me ala mä na bê.”
30 Biani, Jésus asara nga ambeni fä mingi na gbele adisciple ti lo, na so a sû ni pëpe na yâ ti mbeti so.
31 Me ti afä so a sû na mbeti so, a sû ni si ALA mä na bê so Jésus ayeke Christ, Molenge ti Nzapa, na tongaso ALA wara fini na lege ti iri ti lo ndali ti so ALA mä na bê.
