Jean 21:1-25
21 Na peko ti aye so, Jésus akiri afa tere ti lo na adisciple na kota ngu ti Tibériade. Lo fa tere ti lo na ala tongaso:
2 Simon Pierre na Thomas, lo so a iri lo Didyme, Nathanaël zo ti Cana so ayeke na sese ti Galilée, amolenge ti Zébédée nga na ambeni disciple ti Jésus use, ala kue abungbi fade ndo oko.
3 Simon Pierre atene na ala: “Mbi yeke gue ti gi susu si.” Ala tene na lo: “E kue e yeke gue na mo.” Ala sigigi, ala ko na yâ ti ngö ni, me na bï ni kue ala gbu susu oko pëpe.
4 Me na ngoi so ndo aga nduru ti han, Jésus aluti na yanga ti ngu ni; ye oko adisciple ni ahinga pëpe so a yeke Jésus la.
5 Tongaso Jésus atene na ala: “Akete molenge, ALA yeke na mbeni ye ti tengo ni?” Ala kiri tënë na lo: “Ên-ën!”
6 Lo tene na ala: “ALA bi gbanda ni na tere ti ngö ni na mbage ti koli na ALA yeke gbu asusu.” Tongaso ala bi ni, me ala lingbi pëpe ti gboto ni na gigi ngbanga ti so asusu ni ayeke mingi.
7 Na disciple so Jésus andoye ka lo mingi so angbâ atene na Pierre: “So Seigneur la!” Tongana Simon Pierre amä so a yeke Seigneur, na teti so tere ti lo ayeke senge, lo yü bongo ti lo ti ndo ni na lo gboto yanga ni lo kanga na gbe ti yâ ti lo na lo tï na yâ ti kota ngu ni.
8 Me tanga ti adisciple ni aga ti ala na yâ ti kete ngö ni, teti ala yo na yanga ti ngu ni pëpe, a yeke gi mètre bale-gumbaya tongaso, ala yeke gboto gbanda ni so asi singo na asusu.
9 Me tongana ala zu na sese, ala bâ wâ ti charbon so susu ayeke na lê ni nga na mapa.
10 Jésus atene na ala: “ALA ga na ambeni susu ni so ALA gbu fade fadeso.”
11 Tongaso Simon Pierre ako na yâ ti ngö ni na lo gboto na gigi gbanda ni so asi singo na akota susu ngbangbo oko na bale-oku na ota. Atâa so asusu ni ayeke mingi, gbanda ni asuru pëpe.
12 Jésus atene na ala: “ALA ga ALA te kobe.” Disciple oko ti kanga bê ti hunda lo: “Mo yeke zo wa?” ayeke dä pëpe, ngbanga ti so ala hinga so a yeke Seigneur la.
13 Jésus aga na lo mû mapa ni, lo mû na ala. Lo sara nga na susu ni tongaso.
14 So ayeke ti fani ota ni si Jésus asi na adisciple na peko ti so a zingo lo na kuâ.
15 Tongana ala te kobe ni awe, Jésus atene na Simon Pierre: “Simon molenge ti Jean, mo ye mbi ahon aye so?” Lo tene na lo: “En, Seigneur, mo hinga so mbi ye mo mingi.” Jésus atene na lo: “Mû kobe na amolenge ti ngasangbaga ti mbi.”
16 Ti use ni, Jésus akiri atene na lo: “Simon molenge ti Jean, mo ye mbi?” Lo tene na lo: “En, Seigneur, mo hinga so mbi ye mo mingi.” Jésus atene na lo: “Bata akete ngasangbaga ti mbi.”
17 Ti ota ni, Jésus atene na lo: “Simon molenge ti Jean, mo ye mbi mingi?” Vundu asara Pierre so Jésus atene na lo na ti ota ni: “Mo ye mbi mingi?” Tongaso Pierre atene na lo: “Seigneur, mo hinga aye kue. Mo hinga so mbi ye mo mingi.” Jésus atene na lo: “Mû kobe na akete ngasangbaga ti mbi.
18 Biani, ti tâ tënë ni, mbi tene na mo: Na ngoi so mo ngbâ lani maseka, mo wani si mo yeke kanga bongo na gbe ti yâ ti mo na mo yeke tambela na ndo so bê ti mo aye. Me tongana mo ga mbakoro ande, fade mo yeke yôro yâ ti maboko ti mo na mbeni zo nde si ayeke kanga bongo na gbe ti yâ ti mo nga lo yeke gue na mo na mbeni ndo so bê ti mo aye pëpe.”
19 Lo sara tënë so ti fa mara ti kuâ so Pierre ayeke wara ande ti mû gloire na Nzapa. Tongaso, na peko ti so lo sara tënë so awe, lo tene na Pierre: “Ngbâ ti mû peko ti mbi.”
20 Tongana Pierre aturnê, lo bâ disciple so Jésus andoye ka lo mingi so ayeke mû peko ti ala, lo so lani na ngoi ti tengo kobe ti lakui lo ba na mbage ti peko na kate ti Jésus si lo tene: “Seigneur, zo so ayeke kä mo so ayeke zo wa?”
21 Tongaso, na ngoi so lê ti Pierre atï na ndo ti disciple ni, lo tene na Jésus: “Seigneur, lo so lo yeke sara ti lo nyen ande?”
22 Jésus atene na lo: “Tongana a yeke ti bê ti mbi ti tene lo ngbâ juska mbi ga, ti mo dä nyen? Ti mo, ngbâ ti mû peko ti mbi.”
23 Me tënë so amû ndo na popo ti aita a tene disciple so ayeke kui pëpe. Ye oko, Jésus atene pëpe so lo yeke kui pëpe, me lo tene: “Tongana a yeke ti bê ti mbi ti tene lo ngbâ juska mbi ga, ti mo dä nyen?”
24 A yeke disciple so si asara tënë ti témoin ti aye so, na lo si asû aye so na mbeti, na e hinga so tënë ti témoin so lo fa ayeke tâ tënë.
25 Ti tâ tënë ni, ambeni ye mingi nga ayeke dä so Jésus asara lani, so tongana a sû fade anzene nzene ye ni kue na mbeti, mbi bâ ti mbi so ambeti ni so a sû, dunia so alingbi ti wara ndo ti zia ni kue dä pëpe.
