Jean 3:1-36
3 Mbeni koli ayeke na popo ti aFarizien. Iri ti lo ayeke Nicodème, lo yeke mbeni mokonzi ti aJuif.
2 Koli so aga ti bâ Jésus na bï na lo tene na lo: “Rabbi, e hinga so mo yeke mbeni wafango ye so mo londo na Nzapa. Teti mbeni zo alingbi ti sara afä so mo yeke sara so pëpe, gi tongana Nzapa ayeke na lo si.”
3 Jésus akiri tënë na lo atene: “Biani, ti tâ tënë ni, mbi tene na mo: Tongana a kiri a dü zo mbeni pëpe, lo lingbi pëpe ti bâ royaume ti Nzapa.”
4 Nicodème atene na lo: “Tongana mbeni zo aga kangba awe, tongana nyen si a lingbi ti dü lo? Lo lingbi pëpe ti lï na yâ ti mama ti lo ti fani use ni ti tene a dü lo, ni la pëpe?”
5 Jésus akiri tënë: “Biani, ti tâ tënë ni, mbi tene na mo: Tongana a dü zo na ngu nga na yingo pëpe, lo lingbi pëpe ti lï na yâ ti royaume ti Nzapa.
6 Ye so mitele adü ayeke mitele, na ye so yingo adü ayeke yingo.
7 Zia bê ti mo adö pëpe ngbanga ti so mbi tene na mo: A lingbi a dü ALA mbeni si.
8 Pupu ayeke ya na ndo so bê ti lo aye, na mo yeke mä toto ni, me mo yeke hinga ndo so pupu ni alondo dä pëpe nga ndo so lo yeke gue dä pëpe. Zo kue so yingo adü lo ayeke tongaso.”
9 Nicodème akiri tënë na lo atene: “Aye so alingbi ti si tongana nyen?”
10 Jésus akiri tënë na lo atene: “Mo yeke mbeni wafango ye na Israël, me mo hinga aye so pëpe?
11 Biani, ti tâ tënë ni, mbi tene na mo: Ye so e hinga, e sara tënë ni. Nga ye so e bâ, e sara tënë ni, me ALA yeda pëpe na tënë so e fa.
12 Tongana mbi yeke sara na ALA tënë ti aye ti sese me ALA mä na bê na ni pëpe, ka tongana mbi sara na ALA tënë ti aye ti yayu, ALA yeke mä na bê na ni ande tongana nyen?
13 Nga, zo oko ade amontê na yayu pëpe, gi lo so alondo na yayu si azu na sese, Molenge ti zo.
14 Legeoko tongana Moïse ayä ngbo na nduzu na yando, a lingbi a yä Molenge ti zo na nduzu nga,
15 si zo kue so amä na bê na lo alingbi ti wara fini ti lakue lakue.
16 “Nzapa andoye tâ azo ti dunia so mingi si lo mû gi oko Molenge* ti lo ndali ti ala, si zo kue so amä na bê na lo, a lingbi ti futi lo pëpe, me lo wara fini ti lakue lakue.
17 Nzapa atokua Molenge ti lo na yâ ti dunia so ti tene lo fâ ngbanga ti dunia ni pëpe, me ti tene a sö dunia ni na lege ti lo.
18 Na zo so amä na bê na lo, a yeke fâ ngbanga na li ti lo pëpe. Me zo so amä na bê na lo pëpe, a fâ ngbanga na li ti lo awe, teti lo mä na bê pëpe na iri ti oko Molenge so Nzapa adü.
19 Ye so amû lege ti fâ ngbanga ni ayeke so: Lumière aga na yâ ti dunia so, me azo aye bingo ahon lumière, teti akusala ti ala ayeke sioni.
20 Teti zo so angbâ ti sara aye ti sioni, lo ke tënë ti lumière na lo ye ti ga na mbage ti lumière pëpe si a fa akusala ti lo na gigi pëpe.
21 Me zo so asara aye ti mbilimbili aga na mbage ti lumière, si a fa akusala ti lo na gigi tongana akusala so a sara ni alingbi na ye so bê ti Nzapa aye.”
22 Na peko ti aye so, Jésus na adisciple ti lo ague na sese ti Judée. Lo na ala aduti kâ teti mbeni ngoi na lo yeke batize azo.
23 Me Jean nga ayeke batize azo na Aenon nduru na Salim, ngbanga ti so ngu ayeke kâ mingi. Na azo angbâ gi ti ga, na lo yeke batize ala,
24 teti ade a bi Jean na da ti kanga lani pëpe.
25 Mbeni papa alondo na popo ti adisciple ti Jean na mbeni Juif na ndo ti tënë ti sukulango sioni na tere ti zo tongana ti so ndia afa.
26 Tongaso ala ga na mbage ti Jean, ala tene na lo: “Rabbi, koli so ayeke lani na tere ti mo na mbage ti Ngu ti Jourdain so, lo so mo sara tënë ti lo, bâ, lo yeke batize azo na azo kue ayeke gue na mbage ti lo.”
27 Jean atene na ala: “Mbeni zo alingbi ti wara ye oko tongaso pëpe gi tongana ye so lo wara alondo na yayu si.
28 ALA wani ALA yeke atémoin ti tënë so mbi tene lani, so mbi yeke ti mbi Christ pëpe, me a tokua mbi kozo na lo.
29 Zo so amû wali fini fini ayeke koli ti wali ni. Ye oko, na ngoi so kamarade ti koli so amû wali fini fini aluti na amä lo, lo yeke na kota ngia ndali ti go ti koli ti wali ni so lo mä. Ni la, ngia ni, so ayeke ti mbi, alingbi kue awe.
30 A lingbi lo so lo gue gi guengo na li ni, me a lingbi mbi kiri gi kiringo na gbe ni.”
31 Zo so alondo na nduzu si aga ayeke na ndo ti tanga ti azo kue. Zo so ayeke ti sese ayeke ti sese na lo sara tënë ti aye so ayeke ti sese. Zo so alondo na nduzu si aga ayeke na ndo ti tanga ti azo kue.
32 Lo sara tënë ti ye so lo bâ na lo mä, me zo oko ayeda na tënë ti lo pëpe.
33 Zo so ayeda na tënë ti lo azia nzoroko ti lo na ndo ti tënë ni ti fa so Nzapa ayeke tene gi tâ tënë.
34 Teti zo so Nzapa atokua lo, lo fa peko ti atënë ti Nzapa ngbanga ti so lo yeke haka yingo ni kete kete pëpe si lo mû ni na zo.
35 Babâ ni andoye Molenge ni na lo zia aye kue na maboko ti lo.
36 Zo so amä na bê na Molenge ni, lo yeke na fini ti lakue lakue. Me zo so ake yanga ti Molenge ni ayeke wara ande fini pëpe, me ngonzo ti Nzapa angbâ na ndo ti lo.
Akete tënë na terê ni
^ Na Grec: “oko molenge so Nzapa wani si asara lo.”
