Jean 4:1-54
4 Tongana Seigneur ahinga so aFarizien amä a tene Jésus ayeke sara adisciple na lo yeke batize ala mingi ahon Jean,
2 atâa so a yeke biani Jésus wani si ayeke batize azo ni pëpe me adisciple ti lo,
3 lo zia Judée na lo kiri lo gue na Galilée.
4 Me a lingbi lo hon na yâ ti sese ti Samarie.
5 Ni la, lo si na mbeni gbata ti Samarie so a iri ni Sychar, nduru na yaka so Jacob amû lani na molenge ti lo Joseph.
6 Dungu ti Jacob ayeke na ndo so. Jésus awoko na peko ti tambela ni na lo yeke duti na tere ti dungu ni. A yeke nduru na ngbonga omene.
7 Mbeni wali ti Samarie aga ti tö ngu. Jésus atene na lo: “Mû na mbi ngu mbi nyon.”
8 (Andâ adisciple ti lo ague na yâ ti gbata ni ti vo kobe awe.)
9 Tongaso, wali ti Samarie ni atene na lo: “A sara tongana nyen si, mo so mo yeke Juif, mo hunda ngu ti nyongo na mbi so mbi yeke wali ti Samarie?” (Teti aJuif ayeke na songo oko pëpe na azo ti Samarie.)
10 Jésus akiri tënë na lo atene: “Tongana mo hinga fade matabisi so Nzapa amû senge senge na azo nga zo so atene na mo: ‘Mû na mbi ngu mbi nyon’, ka fade mo hunda lo, na lo yeke mû na mo ngu so ayeke mû fini na zo.”
11 Wali ni atene na lo: “Kota zo, mo yeke même na mbeni rambâi ti tö na ngu pëpe nga dungu ni alï mingi. Ka mo yeke wara ti mo ngu so ayeke mû fini na zo so na ndo wa?
12 Mo yeke kota ahon kotara ti e Jacob? lo so amû na e dungu ni nga lo wani, amolenge ti lo nga na abagara ti lo anyon ni?”
13 Jésus akiri tënë na lo atene: “Zo kue so anyon ngu so, nzara ti ngu ayeke kiri ti sara lo.
14 Zo so anyon ngu so mbi yeke mû ande na lo, nzara ti ngu ayeke sara lo oko pëpe, me ngu so mbi yeke mû na lo ayeke ga tongana mbeni li ti ngu na yâ ti lo na ayeke sigigi ti mû na zo fini ti lakue lakue.”
15 Wali ni atene na lo: “Kota zo, mû na mbi ngu ni so si nzara ti ngu asara mbi mbeni pëpe na mbi ngbâ ti ga ti tö ngu na ndo so mbeni pëpe.”
16 Jésus atene na lo: “Gue, mo iri koli ti mo na mo ga na ndo so.”
17 Wali ni akiri tënë atene: “Mbi yeke na koli pëpe.” Jésus atene na lo: “Mo tene tâ tënë tongana mo tene: ‘Mbi yeke na koli pëpe.’
18 Teti mo mû lani akoli oku, na koli so mo yeke duti na lo fadeso ayeke koli ti mo pëpe. Tâ tënë la mo tene so.”
19 Wali ni atene na lo: “Kota zo, mbi bâ so mo yeke mbeni prophète.
20 Akotara ti e avoro lani Nzapa na ndo ti hoto so. Me ALA, ALA tene a lingbi azo avoro Nzapa gi na Jérusalem.”
21 Jésus atene na lo: “Wali, mä tënë ti mbi so: Ngbonga ni ayeke ga so ALA yeke voro Babâ na ndo ti hoto so pëpe nga na Jérusalem pëpe.
22 ALA voro ye so ALA hinga ni pëpe. Me ti e, e voro ye so e hinga, ngbanga ti so salut alondo na aJuif.
23 Me, ngbonga ni ayeke ga, na a si awe, so atâ zo ti vorongo Nzapa ayeke voro Babâ na yingo nga na tâ tënë, teti, biani, Babâ ayeke gi mara ti azo tongaso ti voro lo.
24 Nzapa ayeke mbeni Yingo, na a lingbi azo so ayeke voro lo avoro lo na yingo nga na tâ tënë.”
25 Wali ni atene na lo: “Mbi hinga so Messie, lo so a iri lo Christ, ayeke ga. Tongana lo ga, fade lo yeke fa aye kue na e polele.”
26 Jésus atene na lo: “Mbi so mbi yeke sara tënë na mo so, mbi yeke lo.”
27 Gi na ndo ti tënë so, adisciple ti lo asi, na li ti ala akpe ngbanga ti so lo yeke sara lisoro na mbeni wali. Me, zo oko atene pëpe: “Mo yeke gi nyen?” wala “Ngbanga ti nyen mo sara tënë na wali so?”
28 Tongaso, wali ni azia ta ti ngu ti lo, lo gue na yâ ti gbata ni na lo tene tënë so na akoli ti gbata ni:
29 “ALA ga, ALA bâ mbeni koli so afa na mbi peko ti aye kue so mbi sara ândö. Âmanke Christ ni la pëpe?”
30 Ala sigigi na yâ ti gbata ni na ala to nda ti ga na mbage ti Jésus.
31 Na oko ngoi ni, adisciple ayeke wa lo, ala tene: “Rabbi, mo te kobe si.”
32 Me lo tene na ala: “Mbi yeke na mbeni kobe ti tengo ni so ALA hinga ni pëpe.”
33 Adisciple ato nda ti sara tënë na popo ti ala, ala tene: “Mbeni zo aga na lo fade mbeni ye ti tengo ni?”
34 Jésus atene na ala: “Kobe ti mbi ayeke ti sara ye so bê ti lo so atokua mbi aye nga ti hunzi kusala ti lo.
35 ALA tene so a ngbâ nze osio ti tene ngoi ti kongo lê ti kobe aga pëpe? Bâ, mbi tene na ALA: ALA yô lê ti ALA na nduzu na ALA bâ ayaka ni, akobe ni abe awe ti tene a ko ni.
36 Zo ti kongo lê ti kobe ni ato nda ti wara futa ti lo awe nga lo yeke bungbi alê ti kobe ni teti fini ti lakue lakue, tongaso si zo ti lungo ye ni nga na zo ti kongo ni alingbi ti sara ngia legeoko.
37 Biani, a yeke tongaso si tënë so ayeke tâ tënë: Mbeni oko ayeke zo ti lungo ye ni na mbeni oko ayeke zo ti kongo ni.
38 Mbi tokua ALA ti ko ye so ALA sara kua ngangu ngbanga ni pëpe. Ambeni zo nde asara kua ni ngangu, na ti ALA, ALA bâ nzoni na lege ti ngangu kua ti azo so.”
39 Na azo ti Samarie mingi so ayeke na yâ ti gbata so amä na bê na lo ndali ti tënë ti wali ni so lo tene: “Lo fa na mbi peko ti aye kue so mbi sara ândö.”
40 Ni la, tongana azo ti Samarie aga na mbage ti Jésus, ala hunda lo ti ngbâ na ala. Na lo ngbâ na ndo so lango use.
41 Tongaso, ambeni zo mingi nga amä na bê ndali ti ye so lo tene.
42 Na ala to nda ti tene na wali ni: “Ti fadeso, a yeke ngbanga ti tënë ti mo pëpe si e mä na bê, teti e mä na mê ti e wani nga e hinga so koli so ayeke biani sauveur ti dunia so.”
43 Lango use na pekoni, lo zia ndo so lo gue na Galilée.
44 Me, Jésus atene so a yeke ne mbeni prophète na kodoro ti lo wani pëpe.
45 Tongana lo si na Galilée, azo ti Galilée ayamba lo ndali ti so ala bâ aye kue so lo sara lani na ngoi ti matanga na Jérusalem, teti ala nga ague lani na matanga ni.
46 Lo kiri lo ga na Cana na sese ti Galilée, ndo so lo sara lani si ngu aga vin dä. Mbeni zo ti kua ti gbia ayeke dä so molenge ti lo ti koli ayeke na kobela na Capernaüm.
47 Tongana koli so amä so Jésus alondo na Judée aga na Galilée, lo gue na mbage ti Jésus na lo to nda ti hunda lo ti tene lo ga lo sava molenge ti lo ti koli, teti molenge ni aga nduru ti kui.
48 Me Jésus atene na lo: “Ti ALA, tongana ALA bâ afä nga na aye ti dongo bê pëpe, fade ALA yeke mä na bê oko pëpe.”
49 Zo ti kua ti gbia ni atene na lo: “Seigneur, ga hio si kete molenge ti mbi akui pëpe.”
50 Jésus atene na lo: “Mo gue, molenge ti mo ti koli ayeke na fini.” Koli so amä na bê na tënë so Jésus atene na lo, na lo gue.
51 Me so lo yeke na lege ti gue, angbâa ti lo atingbi na lo si ala tene na lo so molenge ti lo ti koli ni angbâ na fini.
52 Ye oko, lo to nda ti hunda ala ti hinga ngbonga so tere ti molenge ni akaï. Ala tene na lo: “A yeke biri nduru na ngbonga mbasambala si kobela so asara si tere ti molenge ni amû wâ mingi akaï.”
53 Tongaso babâ ni ahinga so a yeke tâ na ngbonga ni so si Jésus atene na lo: “Molenge ti mo ti koli ayeke na fini.” Na pekoni, lo na azo ti da ti lo kue amä na bê.
54 So ayeke use fä so Jésus asara tongana lo londo na Judée lo si na Galilée.
