Jean 7:1-53
7 Na peko ti aye so, Jésus angbâ ti tambela na yâ ti Galilée, teti lo ye pëpe ti tambela na yâ ti Judée ngbanga ti so aJuif ayeke gi ti fâ lo.
2 Matanga ti aJuif, so a iri ni matanga ti atabernacle, aga nduru awe.
3 Tongaso aita ti lo atene na lo: “Mo londo na ndo so, mo gue na Judée si adisciple ti mo alingbi nga ti bâ akusala so mo sara.
4 Teti tongana mbeni zo aye ti tene azo ahinga lo, lo yeke sara ye na hondengo ni pëpe. Tongana mo yeke sara aye so, fa tere ti mo na lê ti azo kue ma.”
5 Biani, aita ti lo amä na bê na lo pëpe.
6 Tongaso Jésus atene na ala: “Ngoi ti mbi ade asi pëpe, me ngoi ti ALA ayeke dä lakue.
7 Dunia so ayeke na nda ti tënë oko pëpe ti ke ALA, me dunia ni ake mbi ngbanga ti so mbi sara tënë ti témoin na ndo ti lo, mbi tene akusala ti lo ayeke sioni.
8 ALA gue ti ALA na matanga ni; me mbi yeke gue fadeso na matanga ni pëpe ngbanga ti so ngoi ti mbi ade ti lingbi kue pëpe.”
9 Tongana lo sara atënë so na ala awe, lo ngbâ ti lo na Galilée.
10 Tongana aita ti lo ague ti ala na matanga ni awe, na pekoni lo kue lo gue. Lo gue na lê ti azo pëpe me na hondengo ni.
11 Tongaso na ngoi ti matanga ni, aJuif ayeke gi lo, ala tene: “Koli so ayeke na ndo wa?”
12 Na gbâ ti azo ayeke diko tënë na gbe ti go na ndo ti lo na popo ti ala. Ambeni ayeke tene: “Lo yeke nzoni zo.” Ambeni nde ayeke tene: “Lo yeke nzoni zo pëpe, me lo yeke handa gbâ ti azo ni handango.”
13 Biani, zo ti sara tënë ti lo dandara ayeke dä pëpe ngbanga ti so mbeto ti aJuif asara ala.
14 Na osio lango ti matanga ni, Jésus amontê na temple na lo yeke fa ye na azo.
15 Li ti aJuif akpe kue, na ala tene: “Zo so ahinga mbeti tongana nyen, so lo gue na a-ekole ti e pëpe so?”
16 Me, Jésus akiri tënë na ala, lo tene: “Ye so mbi fa ayeke ti mbi pëpe, me a yeke ti lo so atokua mbi.
17 Tongana mbeni zo aye ti sara ye so bê ti Lo aye, fade lo yeke hinga wala fango tënë so alondo na Nzapa wala mbi yeke sara gi tënë ti li ti mbi.
18 Zo so asara tënë ti li ti lo ayeke gi gloire ti lo wani. Me zo so agi gloire ti lo so atokua lo, zo so atene gi tâ tënë, na ye so ayeke mbilimbili pëpe ayeke na yâ ti bê ti lo pëpe.
19 Moïse amû lani Ndia na ALA, ni la pëpe? Me zo oko na popo ti ALA abata Ndia ni pëpe. Ngbanga ti nyen ALA yeke gi ti fâ mbi?”
20 Gbâ ti azo ni akiri tënë: “Mbeni sioni yingo ayeke na yâ ti mo. Zo wa la ayeke gi ti fâ mo?”
21 Jésus akiri tënë na ala, lo tene: “Mbi sara gi mbeni ye oko, na li ti ALA kue akpe.
22 Tongaso, ALA gbu li ti ALA na tënë so: Moïse amû lani ndia ti fango ganza na ALA (ndia ni alondo na Moïse pëpe, me a londo na akotara ti ALA), na ALA yeke fâ zo na ganza na lâ ti sabbat.
23 Tongana a fâ mbeni zo na ganza na lâ ti sabbat ti doro ndia ti Moïse pëpe, ALA sara ngonzo mingi na tere ti mbi ngbanga ti so mbi sara si tere ti mbeni zo aga nzoni na lâ ti sabbat?
24 ALA zia ti fâ ngbanga na ndo ti ye so lê ti ALA abâ, me ALA fâ gi ngbanga so ayeke mbilimbili.”
25 Tongaso, ambeni zo ti Jérusalem ayeke tene: “Koli so ala yeke gi lo ti fâ lo so la pëpe?
26 Me bâ, lo yeke sara tënë na lê ti azo kue, na ala sara tënë na lo oko pëpe. Amokonzi ni ahinga biani awe so lo yeke Christ?
27 Ye oko, e hinga ndo so koli so alondo dä. Me tongana Christ aga ande, mbeni zo ti hinga ndo so lo londo dä ayeke duti dä pëpe.”
28 Tongaso, tongana Jésus ayeke fa ye na yâ ti temple, lo dekongo, lo tene: “ALA hinga mbi, na ALA hinga nga ndo so mbi londo dä. Mbi ga na bê ti mbi wani pëpe, me lo so atokua mbi ayeke dä biani na ALA hinga lo pëpe.
29 Ti mbi, mbi hinga lo ngbanga ti so mbi yeke zo so aga na iri ti lo, na a yeke lo si atokua mbi.”
30 Tongaso ala yeke gi ti gbu lo, me mbeni zo ti zia maboko na ndo ti lo ayeke dä pëpe, ngbanga ti so ngbonga ti lo ade ti lingbi pëpe.
31 Ye oko, mingi na popo ti gbâ ti azo ni amä na bê na lo, na ala yeke tene: “Tongana Christ aga ande, lo yeke sara afä ahon ti so koli so asara so?”
32 A-Farizien amä gbâ ti azo so ayeke diko atënë so na gbe ti go ti ala na tere ti Jésus, na aprêtre-mokonzi nga na aFarizien atokua aturugu ti gbu lo.
33 Tongaso Jésus atene: “Mbi yeke ngbâ na tere ti ALA teti kete ngoi kozoni si mbi gue na lo so atokua mbi.
34 ALA yeke gi mbi ande, me ALA yeke wara mbi pëpe, nga ndo so mbi yeke dä, ALA lingbi ti si dä pëpe.”
35 Na mango tënë so, aJuif ayeke tene na popo ti ala: “Koli so aye ti gue na ndo wa si e wara lo pëpe? Lo ye ti gue na aJuif so akangbi na ndo nde nde na popo ti aGrec si lo fa ye na aGrec?
36 Lo ye ti tene nyen tongana lo tene: ‘ALA yeke gi mbi ande, me ALA yeke wara mbi pëpe, nga ndo so mbi yeke dä, ALA lingbi ti si dä pëpe’?”
37 Na ndangba lango ni, so ayeke kota lango ti matanga ni, Jésus aluti na lo dekongo, lo tene: “Tongana nzara ti ngu asara mbeni zo, zia lo ga na mbi lo nyon ngu.
38 Zo so amä na bê na mbi, tongana ti so Mbeti ti Nzapa atene, ‘Fade ngu so amû fini na zo ayeke londo na yâ ti bê ti lo kâ asua.’ ”
39 Andâ lo tene tënë so ti sara tënë ti yingo so ala so amä na bê na lo ayeke wara ni ande. Teti yingo ni ade ti ga pëpe, ngbanga ti so Jésus ade awara gloire pëpe.
40 Tongaso, na popo ti gbâ ti azo so amä tënë so, ambeni ayeke tene: “Lo so ayeke biani Prophète ni.”
41 Ambeni nde ayeke tene: “So ayeke Christ la.” Me ambeni nga ayeke tene: “Christ ayeke londo biani na Galilée si lo ga?
42 Mbeti ti Nzapa atene so Christ ayeke ti hale ti David, nga lo yeke londo na Bethléhem, kete kodoro so David alango lani dä, ni la pëpe?”
43 Tongaso, kangbi atï na popo ti gbâ ti azo ni ndali ti lo.
44 Ye oko, ambeni na popo ti ala aye ti gbu lo, me zo oko azia maboko na ndo ti lo pëpe.
45 Aturugu ni akiri na mbage ti aprêtre-mokonzi nga na aFarizien ni. Tongaso ala hunda aturugu ni: “Ngbanga ti nyen ALA ga na lo pëpe?”
46 Aturugu so akiri tënë: “Mbeni zo asara tënë tongaso lâ oko pëpe.”
47 Me aFarizien atene: “Lo handa ALA nga kue?
48 Mbeni zo na popo ti amokonzi wala na popo ti aFarizien amä na bê na lo?
49 Me gbâ ti azo so, so ahinga Ndia pëpe, ayeke azo so a deba ala awe.”
50 Nicodème, so ague lani ti bâ Jésus, nga so ayeke mbeni oko ti ala, atene na ala:
51 “Ndia ti e ayeke fâ ngbanga na li ti mbeni zo gi tongana a mä lo kozoni ti hinga ye so lo yeke sara, ni la pëpe?”
52 Ala kiri tënë na lo, ala tene: “Mo kue mo yeke zo ti Galilée? Gi na yâ ti Mbeti ti Nzapa na mo yeke bâ so mbeni prophète ayeke londo lâ oko pëpe na Galilée.”
A yeke wara pëpe versê 53 ti si na chapitre 8 versê 11 na yâ ti ambeti tongana Codex Sinaiticus, Codex Vaticanus, Codex Sinaiticus so ayeke na yanga ti Syriaque. Na yâ ti ambeni mbeti ti yanga ti Grec ni nga na ambeni Bible, aversê so ayeke dä, na atënë ti yâ ni akpa tere kue pëpe. Atënë ti yâ ti aversê ni ayeke so:
53 Na pekoni, zo oko oko akiri na da ti lo.
