Jean 7:53–8:59
A yeke wara pëpe versê 53 ti si na chapitre 8 versê 11 na yâ ti ambeti tongana Codex Sinaiticus, Codex Vaticanus, Codex Sinaiticus so ayeke na yanga ti Syriaque. Na yâ ti ambeni mbeti ti yanga ti Grec ni nga na ambeni Bible, aversê so ayeke dä, na atënë ti yâ ni akpa tere kue pëpe. Atënë ti yâ ti aversê ni ayeke so:
53 Na pekoni, zo oko oko akiri na da ti lo.
8 Jésus ague na ndo ti Hoto ti akeke ti olive.
2 Me hio na ndapre, lo kiri lo si na temple na azo kue ayeke ga na mbage ti lo. Lo duti na lo to nda ti fa ye na ala.
3 Ascribe na aFarizien aga na mbeni wali so ala gbu lo na gingo mbeni koli nde. Ala zia wali ni aluti na popo ti ala,
4 na ala tene na Jésus: “Wafango ye, a gbu wali so na ngoi so lo ngbâ ti gi mbeni koli nde.
5 Na yâ ti Ndia, Moïse atene na e ti bo mara ti wali tongaso na tênë ti fâ lo. Biani, mo tene ti mo nyen?”
6 Ti tâ tënë ni, ala yeke sara tënë so ti tara Jésus si ala wara mbeni tënë ti bi na li ti lo. Me Jésus akuku, lo yeke sara mbeti na sese na li ti maboko ti lo.
7 So ala ngbâ gi ti hunda lo, lo londo na lo tene na ala: “Na popo ti ALA so, zia zo so ayeke na siokpari pëpe aduti kozo zo ti mû tênë ti bo na wali so.”
8 Lo kiri lo kuku na lo ngbâ ti sara mbeti na sese.
9 Me azo so amä tënë so lo tene ato nda ti hon oko na oko, a londo na a-ancien ni, si a zia gi Jésus oko na wali ni so ayeke fade na popo ti ala.
10 Jésus alondo, lo tene na wali ni: “Wali, azo ni ayeke na ndo wa? Zo oko afâ ngbanga na li ti mo pëpe?”
11 Wali ni atene: “Kota zo, zo oko afâ ngbanga na li ti mbi pëpe.” Jésus atene: “Mbi nga mbi fâ ngbanga na li ti mo pëpe. Mo gue, me ti londo na lango ti laso, mo ngbâ na yâ ti siokpari mbeni pëpe.”
12 Jésus akiri asara tënë na ala, lo tene: “Mbi yeke lumière ti dunia so. Zo so amû peko ti mbi, fade lo yeke tambela na yâ ti bingo lâ oko pëpe, me fade lo yeke wara lumière so amû fini na zo.”
13 Na aFarizien atene na lo: “Mo yeke sara tënë ti témoin na ndo ti mo wani. Tënë ti témoin ti mo so ayeke tâ tënë pëpe.”
14 Jésus akiri tënë na ala, lo tene: “Même tongana mbi sara tënë ti témoin na ndo ti mbi wani, tënë ti mbi ayeke tâ tënë ngbanga ti so mbi hinga ndo so mbi londo dä si mbi ga nga ndo so mbi yeke gue dä. Me ALA, ALA hinga pëpe ndo so mbi londo dä si mbi ga nga ndo so mbi yeke gue dä.
15 Ti ALA, ALA yeke fâ ngbanga na lege ti mitele, me mbi, mbi yeke fâ ngbanga na li ti zo oko pëpe.
16 Ye oko, tongana mbi fâ ngbanga, fango ngbanga ti mbi ayeke na lege ni, ndali ti so mbi yeke gi mbi oko pëpe, me Babâ so atokua mbi ayeke na mbi.
17 Nga, a sû tënë so na yâ ti Ndia ti ALA wani, a tene: ‘Tënë ti témoin ti azo use ayeke tâ tënë.’
18 Mbi yeke zo so asara tënë ti témoin na ndo ti mbi wani, na Babâ so atokua mbi asara tënë ti témoin na ndo ti mbi nga.”
19 Tongaso ala to nda ti tene na lo: “Babâ ti mo ayeke na ndo wa?” Jésus akiri tënë: “ALA hinga mbi pëpe na ALA hinga nga Babâ ti mbi pëpe. Tongana ALA hinga mbi, ka ALA yeke hinga nga Babâ ti mbi.”
20 Lo yeke sara atënë so na ndo so asanduku ti nginza ayeke dä tongana lo yeke fa ye na azo na yâ ti temple. Me zo oko agbu lo pëpe ndali ti so ngbonga ti lo ade ti lingbi pëpe.
21 Lo kiri lo tene na ala: “Mbi yeke hon, na ALA yeke gi mbi ande, me fade ALA yeke kui na yâ ti siokpari ti ALA. Ndo so mbi yeke gue dä, ALA lingbi ti si dä pëpe.”
22 Tongaso aJuif ayeke tene: “Lo yeke fâ tere ti lo ande? Teti lo tene: ‘Ndo so mbi yeke gue dä, ALA lingbi ti si dä pëpe.’ ”
23 Ni la lo tene na ala: “ALA yeke ti ALA ti gbe ni, me mbi yeke ti mbi ti nduzu. ALA yeke ti dunia so, mbi yeke ti dunia so pëpe.
24 A yeke tongaso si mbi tene fade na ALA, mbi tene: Fade ALA yeke kui na yâ ti asiokpari ti ALA. Teti tongana ALA mä na bê pëpe so mbi yeke lo, fade ALA yeke kui na yâ ti asiokpari ti ALA.”
25 Tongaso ala tene na lo: “Mo yeke zo wa?” Jésus atene na ala: “Ka mbi yeke sara tënë na ALA ngbanga ti nyen?
26 Mbi yeke na atënë mingi ti tene na ndo ti ALA na ti fâ ngbanga na ndo ni. Biani, lo so atokua mbi ayeke tene gi tâ tënë, na aye so mbi mä na yanga ti lo, mbi yeke sara tënë ni na yâ ti dunia so.”
27 Jésus ayeke sara tënë ti Babâ ni na ala, me ala gbu nda ni pëpe.
28 Tongaso Jésus atene: “Tongana ALA yä Molenge ti zo na nduzu awe, fade ALA yeke hinga so mbi yeke lo na so mbi yeke sara ye oko pëpe na bê ti mbi wani. Me mbi yeke tene gi aye so Babâ afa na mbi.
29 Lo so atokua mbi ayeke na mbi. Lo zia mbi gi mbi oko pëpe, ngbanga ti so mbi yeke sara lakue aye so anzere na bê ti lo.”
30 Tongana lo yeke sara atënë so, azo mingi amä na bê na lo.
31 Tongaso Jésus akiri atene na aJuif so amä na bê na lo: “Tongana ALA ngbâ na yâ ti tënë ti mbi, ALA yeke biani adisciple ti mbi,
32 na ALA yeke hinga ande tâ tënë, na tâ tënë ayeke zi ALA.”
33 Ala kiri tënë na lo: “E yeke hale ti Abraham na mbeni zo agbu e na ngbâa lâ oko pëpe. Tongana nyen si mo tene: ‘A yeke zi ALA ande’?”
34 Jésus akiri tënë na ala: “Biani, ti tâ tënë ni, mbi tene na ALA: Zo kue so angbâ ti sara siokpari ayeke ngbâa ti siokpari.
35 Nga, ngbâa ayeke ngbâ na popo ti azo ti da ni lakue lakue pëpe, me molenge ti da ni ayeke ngbâ ti lo lakue lakue.
36 Tongaso, tongana Molenge ni si azi ALA, ALA yeke duti biani azo so a zi ALA awe.
37 Mbi hinga so ALA yeke hale ti Abraham, me ALA yeke gi lege ti fâ mbi ngbanga ti so tënë ti mbi amaï na yâ ti bê ti ALA pëpe.
38 Aye so mbi bâ ni na mbage ti Babâ ti mbi, mbi sara tënë ni. Me ti ALA, ALA sara aye so ALA mä na mbage ti babâ ti ALA.”
39 Ala kiri tënë na Jésus, ala tene: “Babâ ti e ayeke Abraham.” Jésus atene na ala: “Tongana ALA yeke amolenge ti Abraham, zia ALA sara aye so Abraham asara.
40 Me fadeso ALA yeke gi lege ti fâ mbi, mbi so mbi yeke tene na ALA tâ tënë so mbi mä na mbage ti Nzapa. Abraham asara ândö ye so pëpe.
41 ALA yeke sara aye so babâ ti ALA asara.” Ala tene na lo: “A dü e na lege ti lango-sioni pëpe. Babâ ti e ayeke gi oko, Nzapa.”
42 Jésus atene na ala: “Tongana Nzapa ayeke fade Babâ ti ALA, ka ALA yeke ndoye mbi, teti mbi londo na Nzapa si mbi ga na ndo so. Mbi ga ti bê ti mbi pëpe, me a yeke Lo si atokua mbi.
43 Ngbanga ti nyen ALA hinga pëpe ye so mbi yeke sara tënë ni? A yeke ngbanga ti so ALA lingbi ti mä tënë ti mbi pëpe.
44 ALA yeke ti babâ ti ALA Zabolo, na ALA ye ti sara aye so bê ti babâ ti ALA aye. Na ngoi so lo to nda ni, lo yeke wafango zo na lo ngbâ na yâ ti tâ tënë pëpe, ngbanga ti so tâ tënë ayeke na yâ ti lo pëpe. Tongana lo tene mvene, lo tene ni alingbi na tënë ti bê ti lo wani, ngbanga ti so lo yeke zo ti mvene na babâ ti mvene.
45 Me ti mbi, teti so mbi tene tâ tënë, ALA mä na bê na mbi pëpe.
46 Zo wa na popo ti ALA alingbi ti fa so siokpari ayeke na li ti mbi? Tongana mbi tene tâ tënë, ngbanga ti nyen si ALA mä na bê na mbi pëpe?
47 Zo so ayeke ti Nzapa amä atënë ti Nzapa. Ndani la ALA mä tënë pëpe, ngbanga ti so ALA yeke ti Nzapa pëpe.”
48 A-Juif akiri tënë na lo, ala tene: “So e tene: Mo yeke zo ti Samarie nga mbeni sioni yingo ayeke na yâ ti mo, a yeke na lege ni pëpe?”
49 Jésus atene: “Sioni yingo ayeke na yâ ti mbi pëpe, me mbi yeke ne Babâ ti mbi, na ALA, ALA bi kamene na lê ti mbi.
50 Ye oko, mbi yeke gi gloire ndali ti mbi wani pëpe. Mbeni Zo ayeke dä so ayeke gi ni nga lo yeke wafango ngbanga.
51 Biani, ti tâ tënë ni, mbi tene na ALA: Tongana mbeni zo abata tënë ti mbi, fade lo kui lâ oko pëpe.”
52 A-Juif atene na lo: “Fadeso e hinga awe so mbeni sioni yingo ayeke na yâ ti mo. Abraham akui, aprophète nga akui, me mo, mo tene: ‘Tongana mbeni zo abata tënë ti mbi, fade lo kui lâ oko pëpe.’
53 Mo yeke ti mo kota ahon babâ ti e Abraham so akui? Même aprophète nga akui. Mo ye ti tene so mo yeke ti mo zo wa?”
54 Jésus akiri tënë: “Tongana mbi yeke mû gloire na mbi wani, gloire ti mbi ni ayeke senge senge. A yeke Babâ ti mbi si ayeke mû gloire na mbi, lo so ALA tene lo yeke Nzapa ti ALA.
55 Ye oko, ALA hinga lo pëpe. Me mbi, mbi hinga lo. Na tongana mbi tene so mbi hinga lo pëpe, mbi yeke duti nga mbeni zo ti mvene tongana ALA. Me mbi hinga lo na mbi yeke bata tënë ti lo.
56 Tere ti babâ ti ALA Abraham anzere lani mingi ngbanga ti so lo ku ti bâ lango ti mbi. Lo bâ ni na tere ti lo anzere.”
57 Tongaso aJuif atene na lo: “Mo de mo wara ngu bale-oku pëpe, na mo bâ Abraham awe?”
58 Jésus atene na ala: “Biani, ti tâ tënë ni, mbi tene na ALA: Kozo si Abraham abâ gigi, mbi yeke lani dä.”
59 Tongaso, ala ro atênë ti bo na lo, me Jésus ahonde tere ti lo na lo sigigi na yâ ti temple ni.
