Jean 9:1-41
9 Tongana Jésus ayeke hon na lege, lo bâ mbeni koli so a dü lo waziba.
2 Na adisciple ti lo ahunda lo: “Rabbi, zo wa la asara siokpari si a dü koli so waziba so? Lo koli ni wala babâ na mama ti lo?”
3 Jésus akiri tënë: “Koli so wala babâ na mama ti lo si asara siokpari pëpe, me ye so asi tongaso ti tene a bâ akusala ti Nzapa na yâ ti ye so asi na lo.
4 A lingbi e sara akusala ti lo so atokua mbi na ngoi so lâ angbâ. Bï ayeke ga, ngoi so zo alingbi ti sara kua pëpe.
5 Na ngoi kue so mbi yeke na yâ ti dunia so, mbi yeke lumière ti dunia ni.”
6 Tongana lo sara atënë so awe, lo tuku ngu ti yanga na sese, lo bungbi ni na sese si a ga popoto na lo zia ni na ndo ti lê ti koli so.
7 Jésus atene na lo: “Gue mo sukula lê ti mo na ngu ti Siloam” (so nda ni aye ti tene ‘So a tokua ni’). Koli so ague na lo sukula lê ti lo, na kiringo ti lo, lo bâ ndo fadeso.
8 Tongaso azo ti tere ti da ti lo nga na azo so abâ so kozo lo yeke zo ti iringo ye ato nda ti tene: “Koli so ayeke duti ka ti iri ye so la pëpe?”
9 Ambeni atene: “Lo la.” Ambeni atene: “A yeke lo la pëpe, me zo ni akpa lo kpango.” Koli ni ayeke tene: “So mbi la.”
10 Tongaso ala yeke tene na lo: “Lê ti mo azi tongana nyen?”
11 Lo kiri tënë: “A yeke koli so a iri lo Jésus si asara popoto, lo zia ni na lê ti mbi na lo tene na mbi: ‘Gue na ngu ti Siloam na mo sukula lê ti mo.’ Tongaso mbi gue, mbi sukula lê ti mbi na mbi bâ ndo.”
12 Na ndo ti tënë so, ala tene na lo: “Koli ni so ayeke na ndo wa?” Lo tene: “Mbi hinga pëpe.”
13 Ala mû koli so ayeke fade waziba, ala gue na lo na aFarizien.
14 Andâ a yeke na lâ ti sabbat si Jésus asara popoto ni nga lo zi lê ti koli so.
15 Fadeso aFarizien nga ato nda ti hunda lo ti hinga tongana nyen si lo bâ ndo. Lo tene na ala: “Lo zia popoto na lê ti mbi, mbi sukula lê ti mbi si na pekoni mbi bâ ndo.”
16 Tongaso ambeni na popo ti aFarizien ato nda ti tene: “Koli so alondo na Nzapa pëpe ngbanga ti so lo bata lâ ti sabbat pëpe.” Ambeni nde atene: “Mbeni zo so ayeke wasiokpari alingbi ti sara mara ti afä so tongana nyen?” Ni la kangbi atï na popo ti ala.
17 Tongaso ala kiri atene na waziba ni: “So koli so azi lê ti mo so, mo tene ti mo nyen na ndo ti lo?” Koli ni atene: “Lo yeke mbeni prophète.”
18 Me aJuif amä na bê pëpe so koli so ayeke ândö waziba si lo bâ ndo, juska ala iri babâ na mama ti lo.
19 Na aJuif so ahunda ala: “Molenge ti ALA so ALA tene ALA dü lo waziba so la? A sara tongana nyen si fadeso lo bâ ndo so?”
20 Tongaso, babâ na mama ti lo akiri tënë: “E hinga so molenge ti e la nga e dü lo waziba.
21 Me e hinga pëpe ye so asara si lo bâ ndo fadeso, na e hinga nga pëpe zo so azi lê ti lo. ALA hunda lo. Lo ga koli awe. A yeke na lo ti sara tënë ndali ti lo wani.”
22 Babâ na mama ti lo asara tënë so ndali ti so mbeto ti aJuif asara ala. Teti aJuif amä tere awe atene, tongana mbeni zo atene na yanga ti lo so Jésus ayeke Christ, a lingbi a tomba zo so na yâ ti synagogue.
23 Ndani la babâ na mama ti lo atene: “Lo ga koli awe. ALA hunda lo.”
24 Tongaso, ti fani use ni, ala iri koli so ayeke ândö waziba na ala tene na lo: “Mû gloire na Nzapa. E hinga so koli so ayeke mbeni wasiokpari.”
25 Lo kiri tënë na ala: “Wala lo yeke mbeni wasiokpari mbi hinga pëpe. Ye oko so mbi hinga ni ayeke so: mbi yeke ândö waziba, me fadeso mbi yeke bâ ndo.”
26 Tongaso, ala tene na lo: “Nyen la lo sara na mo? Lo zi lê ti mo ni tongana nyen?”
27 Lo kiri tënë na ala: “Mbi tene ni fade na ALA awe, me ALA mä pëpe. Ngbanga ti nyen ALA ye ti kiri ti mä ni? ALA nga ALA ye ti ga adisciple ti lo?”
28 Na mango tënë so, ala zonga lo, ala tene: “Mo si mo yeke mbeni disciple ti koli so, me e yeke ti e adisciple ti Moïse.
29 E hinga so Nzapa asara tënë ândö na Moïse. Me ti koli so, e hinga ndo so lo londo dä pëpe.”
30 Koli ni akiri tënë na ala, lo tene: “Ye so mbi gi li ti mbi dä gbä ayeke so: ALA hinga ndo so lo londo dä pëpe, me lo zi lê ti mbi.
31 E hinga so Nzapa ayeke mä awasiokpari pëpe, me tongana mbeni zo akpe mbeto ti Nzapa na lo sara ye so bê ti Nzapa aye, Nzapa ayeke mä zo so.
32 Ngbene ye giriri a mä lâ oko pëpe so mbeni zo azi lê ti mbeni zo so a dü lo waziba.
33 Tongana fade koli so alondo na Nzapa pëpe, ka lo lingbi ti sara mbeni ye oko pëpe.”
34 Ala kiri tënë na lo, ala tene: “A dü mo na ngbongboro tere ti mo kue na yâ ti siokpari, me mo yeke fa ye na e?” Na ala bi lo na gigi!
35 Jésus amä so ala bi koli so na gigi. Na tongana Jésus awara koli ni, lo tene: “Mo mä na bê na Molenge ti zo?”
36 Koli so akiri tënë: “Kota zo, lo yeke zo wa? tongaso si mbi mä na bê na lo.”
37 Jésus atene na lo: “Mo bâ lo awe, nga zo so ayeke sara tënë na mo so ayeke lo la.”
38 Na koli ni atene: “Seigneur, mbi mä na bê na lo.” Tongaso koli so aba li ti lo na gbe ti Jésus.
39 Na Jésus atene: “A yeke ndali ti fango ngbanga so si mbi ga na yâ ti dunia so: ti tene ala so abâ ndo pëpe abâ ndo na ala so abâ ndo aga awaziba.”
40 Ambeni na popo ti aFarizien so ayeke na tere ti lo amä atënë so, na ala tene na lo: “E nga e yeke awaziba?”
41 Jésus atene na ala: “Tongana ALA yeke fade awaziba, ka ALA yeke na siokpari pëpe. Me so ALA tene: ‘E yeke bâ ndo,’ siokpari ti ALA angbâ.”
