Kusala 11:1-30
11 Abazengele na aita so ayeke na Judée amä so azo ti amara nga ayeda na tënë ti Nzapa.
2 Tongaso, tongana Pierre asi na Jérusalem, azo so aye tënë ti fango ganza ato nda ti dë gaba na lo,
3 ala tene so lo lï na da ti azo so afâ ganza pëpe na lo te kobe na ala.
4 Na ndo ti tënë so, Pierre ato nda ti sara tënë na ti fa nda ti aye ni oko na oko na ala, lo tene:
5 “Mbi yeke lani na gbata ti Joppé, mbi yeke sambela, na mbi bâ mbeni ye tongana suma: Mbeni ye ayeke zu tongana mbeni kota bongo ti lin so a gbu ayanga ni osio na yayu si a yeke ga na ni, na a si juska na tere ti mbi.
6 Tongana mbi bâ ndo na yâ ni, mbi bâ ye ni mbilimbili na mbi bâ anyama ti sese ti gere osio, anyama ti ngonda, anyama so ayeke hara harango nga na andeke ti nduzu.
7 Mbi mä nga mbeni go so asara tënë na mbi atene: ‘Pierre, londo, fâ anyama so mo te!’
8 Me mbi tene: ‘Ên-ën, Seigneur, mbeni sioni ye wala mbeni ye ti saleté andu yanga ti mbi lâ oko pëpe.’
9 Ti fani use ni, go ni so alondo na yayu akiri tënë na mbi atene: ‘Ye so Nzapa asara si aga nzoni awe, mo zia ti iri ni sioni ye.’
10 Go ni asara tënë ti fani ota ni, na a mû aye ni kue a kiri na ni na yayu.
11 Na bâ, gi na ndembe ni so, azo ota ayeke luti na yanga ti da so e yeke na yâ ni. Ala yeke azo so alondo na Césarée na a tokua ala na mbi.
12 Na yingo atene na mbi ti gue legeoko na ala, ti dë kite oko pëpe. Me aita omene so kue ague legeoko na mbi, na e lï na da ti koli ni.
13 “Lo fa peko ti ye ni na e, tongana nyen lo bâ ange so aluti na yâ ti da ti lo na atene: ‘Tokua azo na Joppé na iri Simon, so mbeni iri ti lo ayeke Pierre, ti ga,
14 na fade lo yeke fa na mo aye so ayeke mû lege na mo nga na azo ti da ti mo kue ti sö fini ti ALA.’
15 Me na ngoi so mbi to nda ti sara tënë, yingo vulu atï na ndo ti ala gi tongana ti so a tï lani na ndo ti e na tongo nda ni.
16 Na bango ye so, mbi dabe ti mbi na tënë ti Seigneur so lo yeke tene lakue na e: ‘Jean abatize ti lo azo na ngu, me ti ALA, fade a yeke batize ALA na yingo vulu.’
17 Ni la, tongana Nzapa amû na azo so oko matabisi so a mû senge senge gi tongana ti so lo sara nga lani na e, e so e mä na bê na Seigneur Jésus Christ, mbi yeke ti mbi zo wa si mbi lingbi ti kanga lege na Nzapa?”
18 Tongana ala mä atënë so, ala yeda, na ala mû gloire na Nzapa, ala tene: “Biani, Nzapa amû lege na azo ti amara nga ti changé bê ti ala si ala wara fini.”
19 Tongaso ala so akangbi kirikiri ndali ti ye ti vundu so alondo lani na ndo ti Étienne ague juska na Phénicie, Chypre nga na Antioche. Me ala tene tënë ti Nzapa ni na ambeni zo nde pëpe, gi na aJuif awe.
20 Me, na popo ti ala, ambeni koli ti Chypre na ti Cyrène so aga na Antioche ato nda ti sara tënë na azo so ayeke tene yanga ti Grec, ala fa na ala nzoni tënë ti Seigneur Jésus.
21 Nga, maboko ti Jéhovah ayeke na ala, na azo mingi so aga azo so amä na bê achangé lege ti ala ti ga na Seigneur.
22 Sango ti ala atï na mê ti congrégation so ayeke na Jérusalem na ala tokua Barnabas ti gue juska na Antioche.
23 Tongana lo si kâ si lo bâ kota nzobe ti Nzapa, tere ti lo anzere na lo to nda ti kpengba ala kue ti leke na bê ti ala ti ngbâ na yâ ti Seigneur,
24 teti lo yeke mbeni nzoni zo na lo si singo na yingo vulu nga na mabe. Na azo mingi mingi angbâ ti ga na Seigneur.
25 Tongaso lo gue na Tarse ti gi Saul nzoni,
26 na tongana lo wara Saul awe, lo ga na lo na Antioche. Na teti ngu oko kue, ala bungbi oko na azo ni na yâ ti congrégation na ala fa ye na gbâ ti azo. Na a yeke na Antioche si ti kozoni Nzapa asara si a iri adisciple ni aChrétien.
27 Na yâ ti alango ni so, ambeni prophète alondo na Jérusalem azu na Antioche.
28 Mbeni oko na popo ti ala, so iri ti lo ayeke Agabus, alondo na lo to nda ti fa na lege ti yingo so mbeni kota nzara ayeke nduru ti tï na ndo ti sese kue so azo ayeke dä. Kota nzara so atï biani na ngoi ti Claude.
29 Tongaso adisciple so aleke na bê ti ala ti tene zo oko oko amû ye alingbi na ye so lo yeke na ni, ti tokua ni si a mû maboko na aita so alango na Judée;
30 na a yeke ye so ala sara, ala tokua ni na a-ancien na maboko ti Barnabas na Saul.
