Kusala 18:1-28
18 Na peko ti aye so, Paul azia Athènes na lo gue na Corinthe.
2 Na lo wara mbeni Juif so iri ti lo ayeke Aquila, lo na wali ti lo Priscille. Aquila ayeke zo so a dü lo na kodoro ti Pont na lo londo na Italie lo ga ade ti ninga pëpe, ngbanga ti so Claude amû lani yanga na aJuif kue ti zia gbata ti Rome. Tongaso Paul ague na ndo ti ala,
3 na teti so ala yeke sara oko kua, lo ngbâ na da ti ala, na ala sara kua, teti kua ti ala ayeke ti lekengo atente.
4 Me, na lâ ti sabbat oko oko Paul ayeke mû tënë na yâ ti synagogue na lo yeke gi ti ga na aJuif nga na aGrec ti yeda na tënë ni.
5 Tongana Silas na Timothée alondo na Macédoine ala ga awe, Paul ato nda ti mû ngoi ti lo kue na tënë ni, lo yeke sara tënë na aJuif ti fa so Jésus ayeke Christ.
6 Me tongana ala ngbâ gi ti ke tënë ni na ti tene asioni tënë, Paul ayengi yâ ti abongo ti lo na lo tene na ala: “Mênë ti ALA angbâ na li ti ALA. Tënë oko ayeke na li ti mbi pëpe. Ti fadeso mbi yeke gue na mbage ti azo ti amara.”
7 Tongaso lo zia ndo so, lo gue lo lï na da ti mbeni koli so iri ti lo ayeke Titius Justus, mbeni zo ti vorongo Nzapa so da ti lo atingbi na synagogue ni.
8 Me Crispus, mokonzi ti synagogue ni, aga mbeni zo so amä na bê na Seigneur, na azo ti da ti lo kue asara tongaso. Na azo ti Corinthe mingi so amä tënë ni ato nda ti mä na bê, na a batize ala.
9 Nga, na bï, na lege ti mbeni ye tongana suma Seigneur atene na Paul: “Mo sara mbeto pëpe, me mo ngbâ ti sara tënë ni na mo kanga yanga ti mo pëpe,
10 teti mbi yeke na tere ti mo na mbeni zo alingbi ande ti tï na ndo ti mo ti sara sioni na mo pëpe; ndali ti so mbi yeke na azo mingi na yâ ti gbata so.”
11 Tongaso lo ngbâ na ndo so ngu oko na nze omene, lo yeke fa tënë ti Nzapa na popo ti ala.
12 Na ngoi so Gallion ayeke proconsul ti Achaïe, aJuif amä tere, ala londo na tere ti Paul na ala gue na lo na ndo ti fango ngbanga,
13 ala tene: “Koli so ayeke ga na azo ti voro Nzapa na mbeni lege so ague nde na ndia.”
14 Me na ngoi so Paul aye ti zi yanga, Gallion atene na aJuif ni: “Biani, Ô aJuif, tongana a yeke fade ndali ti mbeni ye so ayeke na lege ni pëpe wala ndali ti mbeni ye ti sioni, ka a yeke na lege ni ti tene mbi kanga bê ti duti kpô ti mä ALA.
15 Me tongana a yeke adengo gaba na ndo ti atënë, na ndo ti airi nga na ndo ti ndia na popo ti ALA, a lingbi ALA wani ALA bâ ni. Mbi ye pëpe ti duti wafango ngbanga ti aye tongaso.”
16 Na ndo ti tënë so, lo tomba ala na ndo ti fango ngbanga ni.
17 Tongaso ala kue azia maboko na ndo ti Sosthène mokonzi ti synagogue ni na ala to nda ti pika lo na dawa ti ndo ti fango ngbanga ni. Me Gallion abi bê ti lo oko pëpe na aye so kue.
18 Me, na peko ti so Paul akiri angbâ na ndo so alango mingi, lo tene na aita ni ti ngbâ nzoni na lo mû mangboko ti gue na Syrie, Priscille na Aquila ague legeoko na lo. Na Cenchrées, a fâ fade kuä ti li ti lo nduru, teti lo mû lani mbeni zendo.
19 Tongaso ala si na Éphèse, na Paul azia ala na ndo so. Me lo lï na yâ ti synagogue na lo pika patara na aJuif.
20 Atâa so ala ngbâ ti hunda lo ti kiri ti duti na ala a ninga, lo yeda pëpe,
21 me lo tene na ala ti ngbâ nzoni na lo tene: “Mbi yeke kiri na mbage ti ALA ande tongana Jéhovah aye.” Na lo londo na Éphèse, lo mû lê ti ngu-ingo ni
22 na lo zu na Césarée. Lo montê si lo bara congrégation, na pekoni lo zu na Antioche.
23 Na tongana lo duti na ndo so teti kete ngoi awe, lo zia ndo ni lo gue na ando nde nde na yâ ti kodoro ti Galatie na ti Phrygie, lo yeke kpengba adisciple kue.
24 Mbeni Juif asi na Éphèse, iri ti lo ayeke Apollos, a dü lo na Alexandrie. Lo yeke mbeni koli so ahinga ti sara tënë. Lo hinga tënë ti Mbeti ti Nzapa mingi.
25 A fa lege ti Jéhovah na koli so gi na yanga, na teti so yingo ayeke tongana wâ na yâ ti tere ti lo, lo yeke sara tënë na lo yeke fa aye na ndo ti Jésus tâ na lege ni, me lo hinga gi batême ti Jean.
26 Na koli so ato nda ti sara tënë ti Nzapa na mbeto pëpe na yâ ti synagogue ni. Na ngoi so Priscille na Aquila amä lo, ala mû lo na tere ti ala na ala kiri azi nda ti lege ti Nzapa na lo nzoni mingi ahon ti kozo.
27 Nga, teti lo ye ti fâ ngu ti gue na Achaïe, aita asû mbeti na adisciple na ala wa ala ti yamba lo nzoni. Tongaso, na ngoi so lo si kâ, lo mû maboko mingi na ala so amä na bê awe ndali ti kota nzobe ti Nzapa.
28 Teti, na ngangu, lo yeke fa polele na lê ti azo so tënë ti aJuif ayeke wataka, na oko ngoi ni, lo mû atënë na yâ ti Mbeti ti Nzapa ti fa so Jésus ayeke Christ.
