Kusala 27:1-44
27 Tongana a mû desizion ti tene e mû mangboko e gue na Italie, a mû Paul nga na ambeni zo ti kanga ni a zia ala na maboko ti mbeni turugu ti kota kamba so iri ti lo ayeke Julius, lo yeke ti bungbi ti aturugu ti Auguste.
2 Na Adramyttium, e ko na yâ ti mbeni mangboko so aye ti gue na ando so ayeke na yanga ti ngu ti kodoro-komanda ti Asie, na e londo na ndo so e gue. Aristarque, zo ti Macédoine so kodoro ti lo ayeke Thessalonique, ayeke na tere ti e.
3 Na ndade ni, e si na Sidon, na Julius asara nzoni na Paul, lo mû lege na Paul ti gue ti bâ akamarade ti lo ti tene ala bâ lege ti lo.
4 Tongana e londo na ndo so, e mû lê ti ngu-ingo ni ti gue, e ngoro na tere ti Chypre, ngbanga ti so pupu ni ayeke ga gi na dawa ti e.
5 Na e mû gi lê ti ngu-ingo ni e hon na tere ti Cilicie na Pamphylie na e si na Myre so ayeke na Lycie.
6 Me na ndo so, turugu ti kota kamba ni awara mbeni mangboko so alondo na Alexandrie si ayeke gue na Italie, na lo mû yanga na e ti ko na yâ ni.
7 Na peko ti so e kpe yeke yeke teti alango mingi na yâ ti akpale na e si na Cnide, ngbanga ti so pupu ni azia lege na e ti hon pëpe, e ngoro na tere ti Crête na mbage ti Salmoné,
8 e mû tere ni na yâ ti akpale na e si na mbeni ndo so a iri ni Nzoni-ndo-ti-lutingo-ti-amangboko, so gbata ti Lasée ayeke nduru na ni.
9 Teti so ngoi mingi ahon awe nga a yeke duti sioni ti mû lê ti ngu ni ngbanga ti so même ngoi ti mungo jeûne ti lango ti kangango ndo ti asiokpari ahon awe, Paul amû wango so na ala,
10 lo tene: “Azo, mbi bâ so tambela ti lê ti ngu ni ayeke ga ande na kpale nga e yeke girisa aye mingi, gi akungba nga na mangboko ni pëpe, me e yeke girisa nga âme ti e.”
11 Me, turugu ti kota kamba ni angbâ ti mä gi yanga ti zo ti kpengo na mangboko ni nga na wa ti mangboko ni ahon ti mä atënë so Paul atene.
12 Teti so ndo ti lutingo ti amangboko ni ayeke nzoni ndo pëpe ti duti dä na ngoi ti dê, mingi ti azo ni abâ so a yeke nzoni ti hon na ndo so, si ala lingbi ti bâ wala lege ayeke dä ti si na Phénix ti duti kâ na ngoi ti dê. Phénix ayeke mbeni ndo ti lutingo ti amangboko na Crête so abâ ndo na mbage ti Banga-To nga na mbage ti Mbongo-To.
13 Nga, tongana pupu so alondo na mbage ti Mbongo ayeke ya yeke yeke, ala bâ ti ala atene ye so ala ye ti sara aga nzoni awe, tongaso ala zi kale ti mangboko ni na ala to nda ti mû gi tere ti zoa ti Crête ni ti hon.
14 Me gi kete na pekoni, mbeni kota pupu so a iri ni Euraquilon aya ngangu na ndo ti zoa ni.
15 Teti pupu ni ayengi mangboko ni ngangu mingi na mangboko ni alingbi ti gbu lê ni pëpe na pupu ni, e sara ye oko pëpe me e zia pupu ni ahon na e.
16 Fadeso e ngoro tere ti mbeni kete zoa so a iri ni Cauda, me e sara ngangu mingi si e wara lege ti gbu biani kete ngo so a kanga na ngbonda ti mangboko ni.
17 Me na peko ti so ala gboto ni na yâ ti mangboko ni awe, ala to nda ti sara kusala na ambeni ye ti kanga mbeni kamba angoro tere ti mangboko ni kue si a gbu ni ngangu. Na teti ala sara mbeto ti tene ala gue ala tuku na mangboko ni na yanga ti ngu ti Syrte, ala zi voile ti mangboko ni ala zia na sese na tongaso pupu ahon na mangboko ni.
18 Me teti so kota pupu ni angbâ ti yengi e ngangu mingi, na ndade ni ala to nda ti mû ambeni kungba ti mangboko ni ti bi si mangboko ni ayapu.
19 Na ota lango ni, ala wani ala mû aye ti kua ti mangboko ni ala bi na ngu.
20 Alango mingi e bâ lâ wala atongoro pëpe na teti pupu so ayeke ya na ndo ti e ayeke kete pupu pëpe, beku kue so e yeke na ni ti sö kuâ ato nda ti hunzi.
21 Na peko ti so alango mingi azo ni agbanzi tere ti ala ti te kobe, Paul aluti na popo ti ala na lo tene: “Azo, tongana ALA hinga fade, ALA mä wango ti mbi na ALA londo na Crête ALA mû lê ti ngu-ingo ni ti hon pëpe, ka e wara kpale nga e girisa aye mingi tongaso pëpe.
22 Ye oko, mbi wa ALA fadeso ti sara mbeto pëpe, teti âme oko na popo ti ALA ayeke girisa pëpe, me gi mangboko ni si ayeke girisa.
23 Teti, na bï so, mbeni ange ti Nzapa so mbi yeke zo ti lo nga so mbi yeke sara kusala so ayeke nzoni-kue na lo aluti na tere ti mbi,
24 lo tene: ‘Paul, sara mbeto pëpe, teti a lingbi mo luti na gbele César. Na bâ, na lege ti nzobe ti lo, Nzapa amû lege na ala kue so ayeke na tere ti mo na yâ ti mangboko ni ti sö fini ti ala.’
25 Tongaso ALA sara mbeto pëpe, teti mbi mä na bê na Nzapa so ye ni ayeke si ande gi tongana ti so a tene na mbi.
26 Me e yeke gue ti tuku na ndo ti mbeni zoa.”
27 Tongana a si na bï bale-oko na osio ni, na so pupu ni ayeke yengi e ngangu mbage na mbage na lê ti ngu-ingo ti Adria, na bê ti bï, azo so ayeke sara kua na yâ ti mangboko ni ayeke bâ ti ala atene ala yeke pusu nduru na mbeni sese.
28 Ala tara lingo ti ngu ni na ala wara brasse bale-use, tongaso ala hon kete na ala kiri ala tara lingo ti ngu ni na ala wara brasse bale-oko na oku.
29 Na teti ala sara mbeto ti tene e kpo tere ti e na akota tênë, ala ngbâ na ngbonda ti mangboko ni ala bi akale osio na ngu na ala ye ti tene ndo ahan hio.
30 Me tongana azo so ayeke sara kua na yâ ti mangboko ni ayeke gi lege ti kpe na yâ ti mangboko ni na ala sara si kete ngö ni azu na lê ti ngu-ingo ni, ala sara mo bâ mo tene ala ye ti bi akale na ngu na mbage ti hôn ti mangboko ni,
31 Paul atene na turugu ti kota kamba ni nga na aturugu ni: “ALA lingbi ti sö fini ti ALA pëpe tongana akoli so angbâ na yâ ti mangboko ni pëpe.”
32 Tongaso aturugu ni afâ akamba ti kete ngö ni na ala zia ni si a tï na yâ ti ngu.
33 Tongana a si nduru na ndapre, Paul ato nda ti wa azo ni kue ti te mbeni ye, lo tene: “Laso ayeke lango bale-oko na osio ni so ALA lango pëpe na ALA ngbâ ti ke ti te kobe, nga ye oko andu yanga ti ALA pëpe.
34 Tongaso mbi wa ALA ti te mbeni ye, teti a yeke ndali ti nzoni ti ALA. Bâ, kuä ti li ti ALA oko tongaso ayeke futi pëpe.”
35 Tongana lo sara tënë so awe, lo nga lo mû mbeni mapa, lo kiri singila na Nzapa na gbele ala kue, lo fâ yâ ni na lo to nda ti te ni.
36 Tongaso tere ti ala kue anzere, na ala wani ala to nda ti te mbeni ye.
37 E a-âme kue so e yeke na yâ ti mangboko ni, wungo ti e ayeke ngbangbo use na bale-mbasambala na omene.
38 Tongana ala te ye yâ ti ala asi awe, ala to nda ti mû ablé ni ti bi na ngu-ingo ti tene mangboko ni ayapu.
39 Tongana ndo ahan awe, ala hinga sese ni so pëpe, me ala yeke bâ gi mbeni ndo so mbutu ayeke dä na yanga ti ngu ni, na ala leke na bê ti ala ti gue na mangboko ni na ndo ti mbutu ni tongana lege ayeke dä.
40 Tongaso, ala fâ akale ti mangboko ni, ala zia ni a tï na yâ ti ngu-ingo ni. Na oko ngoi ni ala zi akamba ti akaî so ayeke fa lege na mangboko ni, na tongana ala kiri na voile ti mangboko ni na nduzu ti tene pupu apusu ni, ala gue na mbage ti mbutu ni.
41 Me tongana mangboko ni asi na mbeni ndo so mbutu ayeke dä nga so ngangu ti ngu-ingo ni ayeke ga dä mbage na mbage, ala sara si mangboko ni ague akpo mbutu so, na hon ni alï na yâ ni si a lingbi ti hon pëpe. Ngbonda ti mangboko ni ato nda ti fâ na ngangu ti tï oko na oko.
42 Na bango ye so, aturugu ni aye gi ti fâ azo ti kanga ni, tongaso si mbeni oko atï na ngu akpe pëpe.
43 Me turugu ti kota kamba ni aye ti sö fini ti Paul, tongaso lo kanga lege na ala ti sara ye so ala ye ti sara so. Lo mû yanga na ala so ahinga ngu ti huru na yâ ti ngu-ingo ni na ti si kozo na sese.
44 Na atanga ni asara nga tongaso, ambeni na ndo ti anduru keke na ambeni na ndo ti ambeni ye ti mangboko ni. A yeke tongaso si azo ni kue asi na sese na nzoni tere.
