Kusala 28:1-31
28 Na peko ti so e sigigi na yâ ti kpale ni awe, e mä so iri ti zoa ni ayeke Malte.
2 Azo ti ndo ni so ayeke tene yanga ti kodoro nde asara tâ nzoni mingi na e, teti ala tingo mbeni wâ na ala yamba e kue nzoni ndali ti so ngu-nzapa ayeke pika lani nga dê ayeke mingi.
3 Me tongana Paul ayeke ro ambeni hulengo keke na lo yeke zia na lê ti wâ ni, wâ ni asara si mbeni sioni ngbo asigigi na lo dë maboko ti Paul si lo hule na tere ni.
4 Tongana lê ti azo ti ndo ni so ayeke tene yanga ti kodoro nde atï na ndo ti sioni nyama so ahule na tere ti maboko ti Paul so, ala to nda ti tene na popo ti ala: “Biani koli so ayeke mbeni zo ti fango zo, na atâa so lo sigigi na yâ ti kpale ti lê ti ngu-ingo, ngbanga so mbilimbili afâ azia lege na lo pëpe ti ngbâ na fini.”
5 Me lo yengi sioni nyama so si nyama ni atï na lê ti wâ ni na ye ti sioni asi na Paul pëpe.
6 Me ala yeke ku ti tene tere ti lo asuku wala lo tï hio tongaso ti kui. Tongana ala ku a ninga na ala bâ mbeni ye oko ti sioni asi na lo pëpe, ala changé yanga ti ala na ala yeke tene so lo yeke mbeni nzapa.
7 Nduru na ndo ni so, kota zo ti zoa ni so iri ti lo ayeke Publius ayeke na ambeni sese na lo wara e na ndo ti lo tongana agene ti lo, na lo sara nzoni bê lo mû na e ndo ti lango teti lango ota.
8 Me babâ ti Publius ayeke lango na ndo ti gbogbo, lo yeke na kobela so asara si tere ti lo ayeke wâ mingi nga lo yeke sasa na mênë. Paul alï na ndo ti lo na lo sambela, lo zia maboko ti lo na ndo ti babâ ni na lo sava lo.
9 Na peko ti ye so, tanga ti azo ti zoa ni so ayeke nga na akobela ato nda ti ga na mbage ti Paul na lo sava ala.
10 Na ala ne e na mungo na e gbâ ti amatabisi. Na tongana e yeke mû mangboko ti hon, ala mû na e aye nde nde so e yeke duti ande na bezoin ni.
11 Nze ota na pekoni, e mû mbeni mangboko so alondo na Alexandrie na aluti fade na zoa ni ndali ti ngoi ti dê. Marque so ayeke na hon ti mangboko ni ayeke: “Amolenge ti Zeus ti koli.”
12 Na tongana e luti na Syracuse, e ngbâ na ndo so lango ota.
13 E londo na ndo so, e ngoro ngorongo si e si na Regium. Lango oko na pekoni, mbeni pupu so alondo na mbage ti Mbongo aya, na e gue e si na Putéolie na use lango ni.
14 E wara aita na ndo so na ala voro yanga na e ti ngbâ na tere ti ala lango mbasambala. Na a yeke tongaso si e mû lege ti gue na Rome.
15 Na ndo so, tongana aita amä sango ti e, ala ga juska na Gara ti Appius na Da-ota-ti-lango-ti-agene ti tingbi na e. Tongana lê ti Paul atï na ndo ti ala, lo kiri singila na Nzapa na lo kiri lo wara ngangu.
16 Na nda ni, tongana e lï na Rome awe, a mû lege na Paul ti duti na mbeni da nde, lo na turugu so ayeke bata lo.
17 Me, lango ota na pekoni, lo iri ala so ayeke akota zo ti aJuif. Tongana ala bungbi awe, lo to nda ti sara tënë na ala, lo tene: “Aita, atâa so mbi sara mbeni ye oko pëpe na tere ti azo ti mara ti e wala na tere ti angobo ti akotara ti e, na Jérusalem a zia mbi na maboko ti aRomain tongana zo ti kanga.
18 Na peko ti so aRomain ni agi nda ti tënë ti mbi, ala ye ti zi mbi, teti ala wara pëpe na li ti mbi mbeni ye so alingbi na kuâ.
19 Me tongana aJuif angbâ gi ti ke ti tene a zi mbi, mbi bâ gbä mbi hunda ti gue na tënë ni na gbele César, me a ye ti tene pëpe so mbi yeke na mbeni tënë ti bi na li ti azo ti mara ti mbi.
20 Ti tâ tënë ni, a yeke ndali ti tënë so si mbi voro yanga na ALA ti bâ ALA na ti sara tënë na ALA, ngbanga ti so a yeke ndali ti beku ti Israël si mbi yeke na zingiri so na tere ti mbi.”
21 Ala tene na lo: “E wara pëpe ambeti so alondo na Judée na ndo ti mo, nga mbeni oko ti aita so asi afa peko ti mbeni sioni tënë wala asara mbeni sioni tënë na ndo ti mo pëpe.
22 Me e bâ so a yeke nzoni ti mä na yanga ti mo atënë ti bê ti mo, teti biani âdu ti secte so, e hinga so na ndo kue a yeke sara gi sioni tënë ni.”
23 Ala mä tere na lo na ndo ti mbeni lango, na ala ga gbani ahon ti kozo na mbage ti lo na da so lo lango dä. Na lo zi nda ti tënë ni na ala na fango na ala nda ti tënë ni kue na ndo ti royaume ti Nzapa, nga ti londo na ndia ti Moïse na ambeti ti aProphète lo gi ti ga na ala ti yeda na tënë ti lo na ndo ti Jésus. Lo to nda ni na ndapre juska na lakui.
24 Ambeni ato nda ti mä na bê na aye so lo tene, me ambeni amä na bê na ni pëpe.
25 Na teti so ala mä tere na popo ti ala pëpe, ala to nda ti hon, na oko ngoi ni Paul asara gi tënë so, lo tene:
“A yeke na lege ni si yingo vulu asara tënë so na akotara ti ALA na lege ti prophète Ésaïe,
26 lo tene: ‘Gue na mbage ti azo so na mo tene: “Ti mango ni, ALA yeke mä, me fade ALA yeke mä yâ ni oko pëpe. Ti bango ni, ALA yeke bâ ndo, me fade ALA yeke bâ ye oko pëpe.
27 Teti bê ti azo so akpengba. Mê ti ala ayeke mä ndo, me ala ye ti sara ye alingbi na ni pëpe, na ala kanga lê ti ala. Ala sara tongaso ti tene lê ti ala abâ ye oko pëpe, na mê ti ala amä ye oko pëpe, na bê ti ala agbu nda ti ye oko pëpe na ala changé lege ti ala pëpe si mbi sava ala.” ’
28 Tongaso, zia ALA hinga ye so: A tokua na mbage ti azo ti amara sango ti lege so Nzapa ayeke sö na azo, na fade ala yeke mä ti ala ni biani.”
29* ——
30 Na lo ngbâ ngu use kue na yâ ti da so lo wani lo loué, lo yeke yamba na nzoni bê ala kue so aga ti bâ lo;
31 lo yeke fa tënë ti royaume ti Nzapa na ala, lo yeke fa nga aye so andu Seigneur Jésus Christ, lo yeke sara ni tâ na kamene oko pëpe nga ye oko akanga lege na lo pëpe.
