Kusala 6:1-15
6 Na yâ ti alango ni so, tongana wungo ti adisciple angbâ ti gue na li ni, mbeni demango tere alondo na mbage ti aJuif so ayeke tene yanga ti Grec na tere ti aJuif so ayeke tene yanga ti Hébreu, ndali ti so a yeke bâ lege ti awomua ti ala nzoni pëpe na ngoi ti kangbingo kobe ti lâ na lâ.
2 Tongaso abazengele bale-oko na use airi adisciple mingi mingi so, na ala tene na ala: “A nzere na e pëpe ti zia kua ti fango ye na ndo ti tënë ti Nzapa ti sara kua ti kangbingo kobe na table.
3 Ni la, aita, ALA gi na popo ti ALA akoli mbasambala so ALA bâ ala tongana anzoni zo, so asi singo na yingo vulu nga na ndara, si e zia ala na ndo ti kpengba kusala so.
4 Me ti e, e yeke mû tere ti e kue na sambela nga na kusala ti fango ye na ndo ti tënë ti Nzapa.”
5 Na tënë so ala tene anzere na adisciple mingi mingi so kue. Tongaso ala soro Étienne, mbeni koli so asi singo na mabe nga na yingo vulu, Philippe, Prochore, Nicanor, Timon, Parménas na Nicolas, mbeni prosélyte* ti Antioche.
6 Ala zia akoli so na gbele abazengele, na tongana abazengele asambela awe, ala zia maboko ti ala na ndo ti akoli so.
7 Na tënë ti Nzapa angbâ ti maï, na wungo ti adisciple angbâ gi ti gue na li ni mingi na Jérusalem. Na gbâ ti aprêtre ayeke yeda na tënë ti mabe so.
8 Étienne, so asi singo na asarango ye so agbu bê ti zo mingi nga na ngangu, ayeke sara akota ye ti dongo bê nga na afä na popo ti azo.
9 Me ambeni koli so ayeke ti bungbi ti azo so a iri ni Synagogue ti azo so a zi ala na ngbâa, nga ambeni koli na popo ti azo ti Cyrène na ti Alexandrie, nga ti Cilicie na ti Asie, alondo ti dë gaba na Étienne.
10 Me ala lingbi ti gbu lê ni pëpe na ndara nga na yingo so lo yeke sara na tënë.
11 Na pekoni ala handa ambeni koli na gbemingo ti tene: “E mä lo na tenengo atënë so azonga Moïse na Nzapa.”
12 Na ala pusu azo, a-ancien na ascribe, si ala ga hio tongaso na ndo ti lo, ala gbu lo na ngangu na ala gue na lo na gbele Sanhédrin.
13 Na ala ga na atémoin ti wataka, so atene: “Koli so azia pëpe ti tene asioni tënë ti ndo so, so ayeke nzoni-kue, nga na ti Ndia.
14 Na tapande, e mä lo na tenengo so Jésus, zo ti Nazareth so, ayeke kungbi ande ndo so na sese na lo yeke changé angobo ti aye so Moïse azia na e.”
15 Na tongana azo kue so aduti na yâ ti Sanhédrin ayeke bâ gi lo, ala bâ so lê ti lo akpa lê ti mbeni ange.
