Luc 11:1-54
11 Na mbeni ngoi, lo yeke na mbeni ndo na lo yeke sambela. Tongana lo hunzi awe, mbeni disciple ti lo oko atene na lo: “Seigneur, fa na e tongana nyen ti sambela tongana ti so Jean afa ni nga na adisciple ti lo.”
2 Lo tene na ala: “Tongana ALA yeke sambela, ALA tene: ‘Babâ, zia a sara si iri ti mo aga nzoni-kue. Zia royaume ti mo aga.
3 Mû na e kobe* ti e ti laso alingbi na bezoin ti lango ni.
4 Mo pardone asiokpari ti e teti so e nga e pardone zo kue so kuda ti e ayeke na li ti lo. Na mo gue na e na yâ ti tara pëpe.’ ”
5 Nga, lo tene na ala: “Bâ so mbeni oko na popo ti ALA ayeke na mbeni kamarade, na lo gue na ndo ti kamarade ni na bê ti bï, lo tene na lo: ‘Kamarade ti mbi, mû na mbi mapa ota na fade mbi yeke kiri na ni na mo,
6 ngbanga ti so mbeni kamarade ti mbi alondo na yongoro ndo asi gi fade fadeso na mbi yeke na ye oko pëpe ti mû na lo ti te.’
7 Na kamarade ti lo so angbâ na yâ ti da kâ atene: ‘Zia ti son li ti mbi. Yanga-da akanga awe, na akete molenge ti mbi ayeke na tere ti mbi na ndo ti gbogbo. Mbi lingbi pëpe ti londo ti mû mbeni ye na mo.’
8 Mbi tene na ALA: Lo yeke londo ande pëpe ti mû mbeni ye na lo ngbanga ti so a yeke kamarade ti lo. Me teti so kamarade ti lo angbâ gi ti hunda ye ni, lo yeke londo ande biani ti mû na lo aye so lo yeke na bezoin ni.
9 Tongaso mbi tene na ALA: ALA ngbâ ti hunda ye, na fade a yeke mû ni na ALA. ALA ngbâ ti gi ye, na fade ALA yeke wara ni. ALA ngbâ ti pika yanga-da, na fade a yeke zi ni na ALA.
10 Teti zo kue so ayeke hunda ye ayeke wara ni, zo kue so ayeke gi ye ayeke wara ni, na zo kue so ayeke pika yanga-da, fade a yeke zi ni na lo.
11 Na popo ti ALA so, babâ wa tongana molenge ti lo ahunda susu, lo yeke mû na lo ngbo ahon ti mû na lo susu?
12 Wala tongana molenge ni ahunda nga para ti kondo, fade lo yeke mû na lo kpalakongo?
13 Asinga ALA so ALA yeke sioni, ALA hinga tongana nyen ti mû amatabisi so ayeke nzoni na amolenge ti ALA, si fade Babâ so ayeke na yayu ayeke mû yingo vulu na ala so ahunda ni na lo pëpe?”
14 Na pekoni, lo yeke tomba mbeni sioni yingo so asara si zo aga buburu. So sioni yingo ni asigigi awe, wabuburu ni asara tënë. Na bê ti gbâ ti azo ni adö.
15 Me ambeni zo na popo ti ala atene: “Lo tomba asioni yingo na ngangu ti Béelzéboub, mokonzi ti asioni yingo.”
16 Me ti tara lo, ambeni ato nda ti hunda lo ti sara mbeni fä so alondo na yayu.
17 Teti lo hinga tënë so ayeke na yâ ti bê ti ala, lo tene na ala: “Royaume kue so yâ ni akangbi ayeke futi, na da kue so yâ ni akangbi ayeke tï.
18 Tongaso, tongana yâ ti Satan akangbi, fade royaume ti lo angbâ na nduzu tongana nyen? Teti ALA tene mbi yeke tomba asioni yingo na ngangu ti Béelzéboub.
19 Tongana mbi yeke tomba asioni yingo na ngangu ti Béelzéboub, ka amolenge ti ALA ayeke tomba ti ala asioni yingo ni na ngangu ti zo wa? Ni la, amolenge ti ALA si ayeke duti awafango ngbanga na ndo ti ALA.
20 Me tongana a yeke na lege ti li ti maboko ti Nzapa si mbi yeke tomba asioni yingo, biani royaume ti Nzapa asi na ALA awe si ALA hinga pëpe so.
21 Tongana mbeni ngangu koli, so ayeke na aye ti bira kue, abata da ti lo, akungba ti lo ayeke ngbâ nzoni.
22 Me tongana mbeni zo so ayeke ngangu ahon lo aga atiri na lo na ahon lo na ngangu, zo ni ayeke mû aye ti bira ti lo kue so lo zia fade bê ti lo dä, na zo ni ayeke mû akungba so lo gbu na ngangu na maboko ti lo ti kangbi yâ ni na ambeni zo.
23 Zo so ayeke na mbage ti mbi pëpe ake mbi, na zo so abungbi ye na mbi pëpe akangbi yâ ti aye kirikiri.
24 “Tongana mbeni sioni yingo asigigi na yâ ti mbeni zo, lo yeke hon na ando so ngu ayeke dä pëpe ti gi ndo ti wu tere ti lo dä, me tongana lo wara ndo oko pëpe, lo tene: ‘Mbi yeke kiri na da ti mbi so mbi zia ni si mbi hon so.’
25 Na tongana lo kiri, lo bâ so a balêe yâ ti da ni avuru na a leke yâ ni pendere.
26 Na pekoni, lo kiri lo gue na lo mû ambeni yingo mbasambala so ayeke sioni mingi ahon lo. Ala lï na yâ ti da ni, na ala lango dä. Na nda ni, dutingo ti zo so aga sioni mingi ahon ti kozoni.”
27 Tongana lo ngbâ ti tene atënë so, mbeni wali asara tënë na kota go na popo ti gbâ ti azo ni, lo tene na Jésus: “Ngia ayeke na yâ so lani ayô mo nga na me so mo nyon!”
28 Me Jésus atene: “Ên-ën. Ngia ayeke na ala so amä tënë ti Nzapa na abata ni!”
29 Tongana gbâ ti azo abungbi tere ti ala mingi mingi, lo to nda ti tene: “Azo ti ngoi so ayeke asioni zo. Ala hunda ti bâ mbeni fä. Me a yeke fa na ala mbeni fä oko pëpe, gi fä ti Jonas.
30 Legeoko tongana ti so Jonas aga mbeni fä teti azo ti Ninive, Molenge ti zo nga ayeke duti ande mbeni fä teti azo ti ngoi so.
31 Gbia-wali ti mbage ti Mbongo ayeke londo ande na lâ ti ngbanga legeoko na azo ti ngoi so, na lo yeke fâ ngbanga na ndo ti azo so, ndali ti so lo londo na nda ti sese ti ga ti mä ndara ti Salomon. Me, bâ, mbeni zo ayeke ge so ayeke kota ahon Salomon.
32 Azo ti Ninive ayeke londo ande na lâ ti ngbanga legeoko na azo ti ngoi so, na ala yeke fâ ngbanga na ndo ti azo so, ndali ti so ala changé bê ti ala na peko ti tënë so Jonas afa lani. Me, bâ, mbeni zo ayeke ge so ayeke kota ahon Jonas.
33 Tongana mbeni zo azia wâ na lampe, lo yeke zia ni pëpe na mbeni ndo so a bata ye dä wala lo yeke zia ni na gbe ti sakpa pëpe, me lo yeke zia ni na ndo ti mbeni ye ti yongo lampe si azo so alï na da abâ lumière ni.
34 Lampe ti tere ti mo ayeke lê ti mo. Tongana lê ti mo abâ ye nzoni, tere ti mo kue ayeke za. Me tongana lê ti mo ayeke sioni, fade tere ti mo nga kue ayeke na yâ ti bingo.
35 Tongaso, sara hange. Peut-être lumière so ayeke na yâ ti mo ayeke bingo.
36 Ni la, tongana tere ti mo kue ayeke lumière na mbeni mbage ni ayeke na yâ ti bingo oko pëpe, fade tere ti mo ni kue ayeke za tongana ti so mbeni lampe ayeke za lumière ti lo na mo.”
37 Tongana lo sara tënë so awe, mbeni Farizien atisa lo ti ga na da ti lo ti te kobe. Tongaso lo lï na da ni na lo duti na tere ti table ti te kobe ni.
38 Ye oko, bê ti Farizien so adö ti bâ so Jésus asukula maboko ti lo pëpe kozo ti te kobe ti midi ni.
39 Me Seigneur atene na lo: “ALA aFarizien, ALA yeke sukula peko ti kopo na ti sembe, me yâ ti bê ti ALA asi na nzara ti gbu aye ti zo na ngangu nga na nzara ti sara aye ti sioni.
40 ALA, azo so li ti ALA ayeke dä pëpe so! Zo so asara peko ti ye ni, lo sara nga yâ ni pëpe?
41 ALA mû aye so ayeke na yâ ti bê ti ALA ti sara na nzoni bê na azo ti mawa, na bâ, ALA yeke ga nzoni na yâ ti tanga ti aye ni kue.
42 Me mawa na ALA aFarizien, ngbanga ti so ALA yeke mû dîme ti menthe, ti rue na ti akugbe ti kasa nde nde kue. Me ALA zia yamba mbilimbili nga na ndoye ti Nzapa. A yeke fade kungba ti ALA ti sara aye so, me a lingbi ALA girisa nga pëpe ambeni ye ni so.
43 Mawa na ALA aFarizien ngbanga ti so ALA ye gi akozo ngende na yâ ti asynagogue nga ALA ye si azo abara ALA na agara!
44 Mawa na ALA ngbanga ti so ALA yeke tongana asende ti kuâ so a bâ ni pëpe, na azo ayeke tambela na ndo ni, me ala hinga pëpe!”
45 Mbeni oko ti azo so ahinga Ndia mingi atene na Jésus: “Wafango ye, na tenengo atënë so, mo yeke zonga e nga.”
46 Tongaso, Jésus atene: “Mawa nga na ALA, ALA so ahinga Ndia mingi, ngbanga ti so ALA yeke kanga anengo kungba na ALA zia na ndo ti azo ti yô, me ALA wani ALA yeke ndu ni na li ti maboko ti ALA pëpe!
47 “Mawa na ALA, ngbanga ti so ALA yeke leke asende ti kuâ ti aprophète, me akotara ti ALA si afâ aprophète ni!
48 Biani, ALA hinga akusala ti akotara ti ALA nga ALA yeda na ni, teti akotara so afâ aprophète ni, me ALA, ALA yeke leke adû ti kuâ ti aprophète ni.
49 Ndani la si ndara ti Nzapa atene nga: ‘Mbi yeke tokua ande na ala aprophète na abazengele. Fade ala yeke fâ ambeni na ala yeke sara ye ti ngangu na ambeni nga,
50 tongaso si a hunda na tïtî azo ti ngoi so mênë ti aprophète kue so atuku na sese ngbene ye so a zia gere ti dunia,
51 ti londo na mênë ti Abel juska ti si na mênë ti Zacharie so a fâ lo na popo ti gbalaka na da ni.’ Biani mbi tene na ALA: A yeke hunda ande ni na tïtî azo ti ngoi so.
52 “Mawa na ALA, ALA so ahinga Ndia mingi, ngbanga ti so ALA lungula kelele ti hingango ye. ALA wani ALA lï na yâ ni pëpe nga azo so aye ti lï dä, ALA kanga lege na ala!”
53 Tongaso, tongana lo sigigi na ndo so ti hon, ascribe na aFarizien ato nda ti bungbi gbani ti ngoro lo, na ti hunda lo na gbâ ti atënë na ndo ti ambeni ye,
54 ala yeke bembe lo ti gbu lo na mbeni tënë ti yanga ti lo.
Akete tënë na terê ni
^ Na Grec: “mapa.”
