Luc 15:1-32
15 Azo kue ti rongo nginza ti lapo nga na awasiokpari kue angbâ ti ga nduru na lo ti mä lo.
2 Ndani la, aFarizien nga na ascribe angbâ ti diko tënë na gbe ti go ti ala, ala tene: “Koli so ayeke yamba awasiokpari na lo yeke te kobe na ala.”
3 Na lo tene toli so na ala:
4 “Zo wa na popo ti ALA tongana lo yeke na angasangbaga ngbangbo oko, na oko ti ala agirisa, lo yeke zia pëpe atanga ni bale-gumbaya na gumbaya na peko ti lo na yando ti gue ti gi oko so agirisa juska lo wara lo?
5 Na tongana lo wara ngasangbaga ni, lo yô lo na ndo ti go ti lo na tere ti lo anzere.
6 Na tongana lo si na yanga-da, lo iri akamarade ti lo nga na azo ti tere ti da ti lo, na lo tene na ala: ‘Zia tere ti ALA anzere legeoko na mbi, ngbanga ti so mbi wara ngasangbaga ti mbi so agirisa so awe.’
7 Mbi tene na ALA so ngia ayeke duti ande mingi na yayu ndali ti wasiokpari oko so achangé bê ti lo ahon azo ti mbilimbili bale-gumbaya na gumbaya so ayeke na bezoin ti changé bê ti ala pëpe.
8 “Wala wali wa so ayeke na alê ti nginza bale-oko ti drachme, na tongana oko agirisa, lo yeke zia wâ na lampe pëpe na lo yeke balêe yâ ti da ti lo ti gi ni nzoni juska ti tene lo wara ni?
9 Na pekoni, tongana lo wara lê ti nginza so, lo iri akamarade ti lo ti wali nga na azo ti tere ti da ti lo, na lo tene: ‘Zia tere ti ALA anzere legeoko na mbi, ngbanga ti so mbi wara lê ti nginza ti drachme so agirisa so awe.’
10 Ni la, mbi tene na ALA: Ngia ayeke na popo ti a-ange ti Nzapa ndali ti wasiokpari oko so achangé bê ti lo.”
11 Na pekoni, lo tene: “Mbeni koli ayeke na amolenge-koli use.
12 Ngambe ni atene na babâ ti lo: ‘Babâ, mû na mbi akungba so ayeke ti mbi ti wara ni na peko ti mo.’ Tongaso, babâ ni akangbi yâ ti akungba ti lo na popo ti amolenge ni.
13 Alango mingi pëpe na pekoni, ngambe ni so abungbi aye ti lo kue, lo hon na mbeni yongoro kodoro. Kâ, lo buba aye ti lo na sarango aye ti kirikiri.
14 Na ngoi so lo buba aye ni kue awe, mbeni kota nzara atï na yâ ti kodoro so kue, na ye ato nda ti tia lo.
15 Tongaso lo gue même lo hule na tere ti mbeni zo ti kodoro ni, na zo ni atokua lo na yâ ti ayaka ti lo ti bata agaduru.
16 Na lo ye lakue ti te akobe so agaduru ni ayeke te, nga zo ti mû mbeni ye na lo ayeke pëpe.
17 “Tongana li ti lo aga dä awe, lo tene: ‘Na ngoi so mbi yeke kui nzara ge, azo ti kua ti babâ ti mbi mingi ayeke na gbâ ti mapa ti te!
18 Fade mbi londo ti kiri na babâ ti mbi ti tene na lo: “Babâ, mbi sara siokpari na tere ti yayu nga na tere ti mo.
19 Mbi kpa ti tene a iri mbi molenge ti mo mbeni pëpe. Mû mbi tongana oko ti azo ti kua ti mo.” ’
20 Tongaso lo londo lo gue na babâ ti lo. Tongana lo ngbâ ayo, lê ti babâ ti lo atï na ndo ti lo na mawa ti lo asara babâ ni. Babâ ni akpe loro atï na ndo ti go ti lo na lo su ngbangba ti lo a ninga.
21 Tongaso, molenge ni atene na babâ ti lo: ‘Babâ, mbi sara siokpari na tere ti yayu nga na tere ti mo. Mbi kpa ti tene a iri mbi molenge ti mo mbeni pëpe. Mû mbi tongana oko ti azo ti kua ti mo.’
22 Me babâ ni atene na angbâa ti lo: ‘ALA kpe hio, ALA ga na mbeni yongoro bongo, so ayeke pendere ahon atanga ni kue, ALA yü na lo, ALA zia bague na maboko ti lo nga poro na gere ti lo.
23 ALA ga na kete bagara ti mafuta so, ALA fâ ni na zia e te na e sara ngia,
24 ngbanga ti so molenge ti mbi ti koli so akui lani, me lo kiri na fini awe. Lo girisa lani, me a wara lo awe.’ Na ala to nda ti sara ngia.
25 “Molenge ti lo ti koli, yaya ni, ayeke na yaka. Tongana lo ga, na lo si nduru na da ni, lo mä mozoko nga na azo so ayeke dodo.
26 Tongaso lo iri mbeni zo ti kua ni na lo hunda ti hinga nda ti aye so.
27 Zo ti kua so atene na lo: ‘Ita ti mo ti koli akiri, na babâ ti mo afâ kete bagara ti mafuta so, ngbanga ti so lo kiri lo wara ita ti mo na nzoni tere.’
28 Me ngonzo asara lo mingi na lo ye pëpe ti lï na da. Tongaso babâ ti lo asigigi na lo to nda ti voro yanga na lo.
29 Lo kiri tënë na babâ ti lo, lo tene: ‘A sara ngu mingi so mbi yeke sara kua na mo ge tongana ngbâa, mbi doro commandement ti mo lâ oko pëpe, me mo mû na mbi mbeni kete ngasa lâ oko pëpe ti tene mbi sara na ngia na akamarade ti mbi.
30 Me gi so molenge ti mo so aga, lo so abuba akungba ti mo na tere ti awali-ndumba, mo fâ kete bagara ti mafuta so na lo.’
31 Na babâ ni atene na lo: ‘Molenge ti mbi, mo yeke lakue na tere ti mbi, na aye ti mbi kue ayeke aye ti mo.
32 Me a yeke ndali ti e ti sara ngia nga ti tene tere ti e anzere ngbanga ti so ita ti mo ti koli so akui lani, me lo kiri na fini awe. Lo girisa lani, me a wara lo awe.’ ”
