Luc 17:1-37
17 Lo tene na adisciple ti lo: “Aye so akanga lege na mabe ti zo ayeke ga biani na a lingbi ti kpe ni pëpe. Me, mawa na zo so aye ni so aga na lege ti lo!
2 A yeke nzoni teti lo tongana a kanga gi kota tênë ti nekango na ye na go ti lo, na a bi lo na yâ ti ngu-ingo ahon ti tene lo sara si mbeni oko ti akete zo so atï.
3 ALA sara hange. Tongana ita ti mo asara mbeni siokpari, suku na lo. Na tongana lo changé bê ti lo, mo pardone lo.
4 Atâa tongana lâ oko oko lo sara siokpari na tere ti mo fani mbasambala, na lo kiri na mo fani mbasambala, lo tene: ‘Mbi changé bê ti mbi awe,’ a lingbi mo pardone lo.”
5 Abazengele atene na Seigneur: “Sara si mabe ti e akiri akono.”
6 Tongaso, Seigneur atene: “Tongana ALA yeke na mabe so konongo ni ayeke tongana ti lê ti keke ti moutarde, ka ALA yeke tene na keke ti mûrier so: ‘Mo londo na gunda ti mo kue, mo gue mo lu tere ti mo na yâ ti ngu-ingo!’ na keke so ayeke mä yanga ti ALA.
7 “Zo wa na popo ti ALA, tongana lo yeke na ngbâa so ayeke sara kua na yaka wala ayeke bata anyama, si ngbâa ni alondo na yaka akiri, lo yeke tene na lo: ‘Ga ge hio mo duti na tere ti table mo te kobe’?
8 Ahon ti tene tongaso, lo yeke tene ande tënë so na ngbâa ni: ‘Leke ye na mbi si mbi te kobe ti lakui. Yü bongo ti kua na mo mû na mbi kobe juska mbi te na mbi nyon, na pekoni fade mo lingbi ti te na ti nyon ti mo.’
9 Lo yeke bi bê ti lo ande ti kiri singila na ngbâa ni pëpe ngbanga ti so ngbâa ni asara gi aye so a fa na lo ti sara.
10 Tongaso ALA nga, tongana ALA sara aye kue so a fa na ALA ti sara, ALA tene: ‘E yeke gi asenge senge ngbâa. Ye so e sara ayeke gi ye so a lingbi e sara ni.’ ”
11 Na ngoi so lo yeke gue na Jérusalem, lo hon na yâ ti Samarie nga na Galilée.
12 Tongana lo yeke lï na yâ ti mbeni kete kodoro, azo ti buruma bale-oko atingbi na lo, me ala luti yongoro.
13 Ala dekongo, ala tene: “Jésus, Wafango ye, sara nzoni bê na e!”
14 Tongana Jésus abâ ala, lo tene na ala: “ALA gue ALA fa tere ti ALA na aprêtre.” Tongana ala yeke na lege ti guengo ni, tere ti ala aga nzoni.
15 Mbeni oko ti ala, tongana lo bâ so a sara si tere ti lo aga nzoni awe, lo kiri, na mungo gloire na Nzapa na kota go.
16 Lo tï na sese na lê ti lo na gere ti Jésus, lo kiri singila na lo. Lo yeke nga zo ti kodoro ti Samarie.
17 Jésus atene: “Ala yeke bale-oko so a sara si tere ti ala aga nzoni so pëpe? Ka atanga ni gumbaya ayeke na ndo wa?
18 A wara mbeni zo oko pëpe so akiri ti mû gloire na Nzapa, me gi koli so, so ayeke zo ti mbeni mara nde?”
19 Jésus atene na lo: “Londo mo gue, teti mabe ti mo asava mo awe.”
20 Me tongana aFarizien ahunda lo lawa si royaume ti Nzapa ayeke ga, lo kiri tënë na ala, lo tene: “Royaume ti Nzapa ayeke ga dandara tongaso pëpe,
21 nga azo ayeke tene ande pëpe: ‘Bâ ndo ge!’ wala: ‘Bâ ndo kâ!’ Teti, bâ, royaume ti Nzapa ayeke na popo ti ALA.”
22 Na pekoni, lo tene na adisciple: “Alango ayeke ga ande so ALA yeke sara nzara ti bâ mbeni oko ti alango ti Molenge ti zo, me fade ALA yeke bâ ni pëpe.
23 Azo ayeke tene ande na ALA: ‘ALA bâ ndo kâ!’ wala: ‘ALA bâ ndo ge!’ ALA sigigi pëpe wala ALA kpe na peko ti azo ni pëpe.
24 Teti legeoko tongana wâ ti bekpa so ayeke za alondo na mbeni mbage ti ndo na gbe ti yayu ti si na mbeni mbage ni na gbe ti yayu, lango so Molenge ti zo ayeke fa tere ti lo na gigi ayeke duti ande nga tongaso.
25 Me, kozoni, a lingbi lo bâ pasi mingi nga azo ti ngoi so ake lo.
26 Nga, gi tongana ti so a si lani na ngoi ti Noé, a yeke duti ande nga tongaso na ngoi ti Molenge ti zo:
27 Lani ala yeke te, ala yeke nyon, akoli ayeke sara mariage, awali nga ayeke sara mariage juska ti si na lango ni so Noé alï na yâ ti arche, na kota ngu aga lani na afuti ala kue.
28 Legeoko nga, a si ândö tongaso na ngoi ti Lot: Lani ala yeke te, ala yeke nyon, ala yeke vo ye, ala yeke kä ye, ala yeke lu ye nga ala yeke leke ada.
29 Me na lango so Lot asigigi na Sodome, wâ na soufre alondo na yayu atï na ndo ti ala tongana ngu-nzapa na afuti ala kue.
30 A yeke duti tongaso nga na lango ni so Molenge ti zo ayeke fa tere ti lo na gigi.
31 “Na lango ni so, zia zo so ayeke na li ti da me so akungba ti lo ayeke na yâ ti da ni azu pëpe ti mû ni, na zo so ague na yaka, zia lo kue lo kiri pëpe ndali ti aye so angbâ na peko.
32 ALA dabe ti ALA na wali ti Lot.
33 Zo so agi ti bata âme ti lo nzoni teti lo wani, fade lo girisa ni. Me zo so agirisa âme ti lo, fade lo bata ni.
34 Mbi tene na ALA: Na bï ni so, fade akoli use ayeke na ndo ti gbogbo oko, a yeke mû oko a hon na lo, me fade a dö oko ni a zia.
35 Fade awali use ayeke neka ye na oko tênë ti nekango na ye, a yeke mû oko ahon na lo, me fade a dö oko ni a zia.
36* ——
37 Tongaso ala hunda lo atene: “Seigneur, na ndo wa?” Lo tene na ala: “Na ndo so kuâ ayeke dä, fade angualo nga ayeke bungbi tere kâ.”
