Luc 19:1-48
19 Lo lï na Jéricho na lo yeke fâ yâ ti gbata ni ti hon.
2 Mbeni koli ayeke kâ so iri ti lo ayeke Zachée. Lo yeke mbeni mokonzi ti azo ti rongo nginza ti lapo, na lo yeke na mosoro mingi.
3 Biani, lo yeke gi ti bâ wala Jésus ni ayeke zo wa. Me lo lingbi ti bâ lo pëpe ndali ti gbâ ti azo ni teti lo yeke nduru zo.
4 Teti so lo hinga Jésus ayeke hon na lege ni so, lo kpe kozo, lo montê na yâ ti mbeni keke ti figue ti ngonda ti tene lo bâ Jésus.
5 Tongana Jésus asi na ndo ni so, lo bâ ndo na nduzu na lo tene na Zachée: “Zachée, zu hio na sese teti a lingbi mbi lango na da ti mo laso.”
6 Na ndo ti tënë so, hio, lo zu na sese, na ngia na bê lo yamba Jésus tongana gene ti lo.
7 Me tongana ala bâ ye so, ala kue ayeke kasa ndo, ala tene: “Lo gue ti lango na da ti mbeni koli so ayeke wasiokpari.”
8 Me Zachée aluti na lo tene na Seigneur: “Seigneur, bâ, mbi yeke mû na awayere ndambo ti aye so mbi yeke na ni, na ye kue so mbi gbu na likisi na maboko ti azo so mbi bi tënë ti wataka na li ti ala, mbi yeke kiri na ni na ala fani osio.”
9 Tongana Jésus amä tënë so, lo tene: “Laso, salut aga na da so, ndali ti so lo kue lo yeke mbeni molenge ti Abraham.
10 Teti Molenge ti zo aga ti gi na ti sö ye so agirisa awe.”
11 Tongana ala yeke mä aye so, lo tene nga mbeni toli ngbanga ti so lo yeke nduru na Jérusalem na ala bi bê ti ala so royaume ti Nzapa ayeke sigigi polele na ndembe ni so.
12 Tongaso lo tene: “Mbeni koli ayeke dä so a dü lo na yâ ti sewa ti akota zo. Lo gue na mbeni yongoro kodoro ti tene lo wara lege ti komande tongana gbia na ti kiri.
13 Lo iri ambeni ngbâa ti lo bale-oko, lo mû na ala amine bale-oko na lo tene na ala: ‘ALA dë buze na ni juska mbi kiri.’
14 Me azo ti kodoro ti lo ake lo, ala tokua alembe na peko ti lo ti tene na lo: ‘E ye pëpe ti tene koli so alë gbia na ndo ti e.’
15 “Na peko ti so lo wara lege ti komande tongana gbia awe, lo kiri na kodoro ti lo. Lo hunda ti tene a iri na lo angbâa so lo mû lani na ala nginza ti argent so. Lo ye ti hinga biani ye so ala wara na peko ti dengo buze ni.
16 Kozo ngbâa ni aga, lo tene: ‘Seigneur, mine ti mo adü ambeni bale-oko na ndo ni.’
17 Lo tene na ngbâa ni: ‘So nzoni, mo yeke nzoni ngbâa! Teti mo fa so mo yeke be-ta-zo na yâ ti ye so ayeke tâ kete mingi, komande na ndo ti agbata bale-oko.’
18 Use ngbâa ni aga, lo tene: ‘Seigneur, mine ti mo adü ambeni oku na ndo ni.’
19 Lo tene nga na ngbâa so: ‘Mo kue, bâ ndo na ndo ti agbata oku.’
20 Me mbeni nde aga, lo tene: ‘Seigneur, bâ mine ti mo la, mbi bata ni nde na yâ ti mbeni bongo.
21 Bâ, mbeto ti mo asara mbi ngbanga ti so mo yeke koli so mo son mingi. Mo yeke mû ye so mo si mo zia ni pëpe nga mo yeke ko ye so mo si mo lu ni pëpe.’
22 Lo tene na ngbâa so: ‘Mo sioni ngbâa so, mbi fâ ngbanga na li ti mo na lege ti tënë ti yanga ti mo wani. Mo hinga nzoni so mbi yeke koli so ason mingi, mbi yeke mû ye so mbi si mbi zia ni pëpe nga mbi yeke ko ye so mbi si mbi lu ni pëpe.
23 Tongaso, ngbanga ti nyen mo zia alê ti nginza ti mbi na ndo ti batango nginza pëpe? Si na singo ti mbi, mbi ro ni na mbeni ye na ndo ni.’
24 “Na ndo ti tënë so, lo tene na azo so ayeke luti na tere ni: ‘ALA mû mine ni na maboko ti lo, ALA mû na lo so ayeke na amine bale-oko.’
25 Me ala tene na lo: ‘Seigneur, lo yeke na amine bale-oko!’
26 ‘Mbi tene na ALA: Zo kue so ayeke na ye, fade a mû mbeni na lo na ndo ni. Me zo so ayeke na ye pëpe, même ye so lo yeke na ni, fade a yeke zi ni.
27 Nga awato ti mbi so aye pëpe ti tene mbi lë gbia na ndo ti ala, ALA ga na ala ge, ALA fâ ala na lê ti mbi.’ ”
28 Na peko ti so lo sara atënë so awe, lo mû li ni ti montê na Jérusalem.
29 Na tongana Jésus asi nduru na Bethphagé nga na Béthanie, na hoto so a iri ni Hoto ti akeke ti olive, lo tokua ambeni disciple ti lo use,
30 lo tene: “ALA gue na yâ ti kete kodoro so ALA yeke bâ so. Na tongana ALA lï na yâ ni awe, fade ALA yeke wara mbeni kete lele so a kanga lo, kete lele so zo ade ti duti na ndo ti lo pëpe. ALA zi lo na ALA ga na lo.
31 Me tongana mbeni zo ahunda ALA atene: ‘Ngbanga ti nyen ALA yeke zi nyama ni?’ A lingbi ALA tene tënë so: ‘A yeke Seigneur si aye nyama ni.’ ”
32 Azo so lo tokua ala ague, ala wara nyama ni gi tongana ti so lo tene na ala.
33 Me na ngoi so ala yeke zi kete lele ni, awa ti lo atene na ala: “ALA yeke zi kete lele ni ngbanga ti nyen?”
34 Ala tene: “A yeke Seigneur si aye nyama ni.”
35 Ala gue na kete lele so na Jésus, ala bi abongo ti ala ti ndo ni na ndo ti lele ni na ala zia Jésus na ndo ti lo.
36 Na ngoi so lo yeke hon, ala yeke gbara abongo ti ala ti ndo ni na ndo ti lege ni.
37 Gi so lo si nduru na lege so alondo na Hoto ti akeke ti olive si azu, gbâ ti adisciple ato nda ti fa ngia ti bê ti ala nga ti sepela Nzapa na kota go ndali ti akusala ti ngangu so ala bâ lani,
38 ala tene: “Tënë nzoni ayeke na ndo ti Lo so aga tongana Gbia na iri ti Jéhovah! Siriri na yayu, na gloire na lo so ayeke na ando so ayeke na nduzu ahon atanga ni kue!”
39 Me, ambeni Farizien so ayeke na popo ti gbâ ti azo ni atene na lo: “Wafango ye, suku na adisciple ti mo.”
40 Me lo kiri tënë, lo tene: “Mbi tene na ALA: Tongana azo so aduti kpô, fade atênë ayeke dekongo.”
41 Tongana lo si nduru, lo bâ gbata ni na lo toto ndali ni,
42 lo tene: “Mo, âdu tongana mo hinga laso aye so andu tënë ti siriri . . . me fadeso a honde aye so na lê ti mo awe.
43 Teti alango ayeke ga ande so awato ti mo ayeke sara mbeni gbagba ti akeke so a leke yanga ni tongana likongo ti ngoro tere ti mo, ala yeke ngoro mo nga ala yeke sara ngangu na mo mbage na mbage,
44 fade ala yeke bi mo na amolenge ti mo na sese, ala yeke zia mbeni tênë ti ngbâ na ndo ti mbeni na mo pëpe, ngbanga ti so mo gi ti hinga pëpe ngoi so a bâ lani kusala ti mo.”
45 Lo lï na yâ ti temple, lo to nda ti tomba azo so ayeke kä ye,
46 lo tene na ala: “A sû na Mbeti ti Nzapa a tene: ‘Fade da ti mbi ayeke duti da ti sambela,’ me ALA sara si da ni aga kota dû ti azo ti gbungo aye ti azo na ngangu.”
47 Nga, lo yeke fa ye na yâ ti temple lâ na lâ. Me aprêtre-mokonzi na ascribe nga na akota zo ti mara ni ayeke gi lege ti fâ lo.
48 Me ala wara tâ lege ti sarango ni pëpe, ngbanga ti so azo ni kue angbâ gi ti mä lo na nzara ni.
