Luc 22:1-71
22 Matanga ti amapa so a sara na mama ni pëpe, so a iri ni Pâque, ayeke pusu nduru.
2 Nga, aprêtre-mokonzi na ascribe ayeke gi tâ nzoni lege ti fâ lo, teti ala sara mbeto ti azo ni.
3 Me Satan alï na yâ ti Judas, lo so a iri lo Iscariote, so a diko lo na popo ti adisciple bale-oko na use.
4 Ni la, Judas ague asara tënë na aprêtre-mokonzi nga na amokonzi ti temple na ndo ti tâ nzoni lege ti kä Jésus na ala.
5 Tere ti ala anzere na ala yeda ti mû na lo alê ti nginza ti argent.
6 Tongaso lo yeda na lo to nda ti gi mbeni nzoni lege ti kä Jésus na ala na ngoi so gbâ ti azo ayeke dä pëpe.
7 Lango ti matanga ti amapa so a sara na mama ni pëpe asi fadeso awe. Na lango ni so, a lingbi a fâ nyama ndali ti Pâque ni.
8 Jésus atokua Pierre na Jean, lo tene: “ALA gue ALA leke kobe ti Pâque ti tene e te.”
9 Ala hunda lo: “Mo ye e leke ye ni na ndo wa?”
10 Lo tene na ala: “Bâ, tongana ALA lï na yâ ti gbata so, mbeni koli so ayô ta ti sese na ngu na yâ ni ayeke tingbi ande na ALA. ALA mû peko ti lo na yâ ti da so lo lï dä.
11 A lingbi ALA tene na wa ti da ni: ‘Wafango ye atene na mo: “Kubu ti agene so mbi lingbi ti te kobe ti Pâque dä na adisciple ti mbi ayeke na ndo wa?” ’
12 Na fade koli so ayeke fa na ALA mbeni kota kubu so ayeke na nduzu, so ye kue ayeke na yâ ni. ALA leke aye ni kâ.”
13 Tongaso adisciple ni ague na ala wara ye ni gi tongana ti so Jésus atene fade na ala. Ala leke aye ti matanga ti Pâque ni.
14 Tongana ngbonga ni alingbi awe, lo duti na tere ti table, na abazengele ni ayeke na tere ti lo.
15 Na lo tene na ala: “Mbi ye mingi ti te kobe ti Pâque so na ALA kozoni si mbi bâ pasi.
16 Teti mbi tene na ALA, mbi yeke te ni mbeni pëpe juska a ga tâ tënë na yâ ti royaume ti Nzapa.”
17 Lo mû kopo ti vin, lo kiri singila na Nzapa na lo tene: “ALA mû ni, ALA mû na mba na popo ti ALA.
18 Teti mbi tene na ALA: Ti londo laso mbi yeke kiri ande ti nyon ngu ti lê ti vigne mbeni pëpe juska royaume ti Nzapa aga.”
19 Nga, lo mû mbeni mapa, lo kiri singila na Nzapa, lo kungbi yâ ni na lo mû ni na ala, lo tene: “So ayeke fä ti tere ti mbi so a yeke mû ni ndali ti ALA. ALA ngbâ ti sara ye so ti dabe ti ALA na mbi.”
20 Na peko ti so ala te kobe ti lakui ni awe, lo mû nga kopo ti vin, na lo tene: “Kopo ti vin so ayeke fä ti fini mbele na lege ti mênë ti mbi so biani ayeke tuku ande ndali ti ALA.
21 “Me bâ, maboko ti zo ti kango mbi ayeke na mbi na table so.
22 Teti Molenge ti zo ayeke hon tongana ti so a fa ni kozo awe. Me, mawa na zo so na lege ti lo si a yeke kä Molenge ti zo!”
23 Ni la, ala to nda ti hunda tere na popo ti ala ti hinga biani zo wa na popo ti ala ayeke nduru ti sara ye so.
24 Me, mbeni ngangu papa alondo nga na popo ti ala ti hinga zo wa na popo ti ala a bâ lo tongana zo so ayeke kota ahon atanga ni kue.
25 Me lo tene na ala: “Agbia ti amara ayeke sara mokonzi na ndo ti amara ni, na azo so ayeke na komandema na ndo ti amara, azo airi ala Azo ti sarango nzoni na zo.
26 Ye oko, a lingbi ALA sara tongaso pëpe. Me zia zo so ayeke kota ahon tanga ti ALA kue aga lo so ayeke ngambe ti ALA kue; na lo so ayeke mokonzi ti ALA aga zo so ayeke sara kua na ALA.
27 Na popo ti zo so aduti na table ti te kobe nga na zo so ayeke sara kua na lo, zo wa si ayeke kota ahon mba ti lo? A yeke pëpe lo so aduti na table ti te kobe? Me mbi yeke na popo ti ALA tongana lo so ayeke sara kua na ALA.
28 “Ye oko, ALA yeke azo so angbâ na tere ti mbi na yâ ti atara so asi na mbi.
29 Ni la mbi te mbele na ALA, legeoko tongana Babâ ti mbi ate lani mbele na mbi, ndali ti mbeni royaume,
30 tongaso si ALA lingbi ti te na ti nyon na table ti mbi na yâ ti royaume ti mbi, nga ti duti na ndo ti atrône ti fâ ngbanga na li ti akete mara bale-oko na use ti Israël.
31 “Simon, Simon, bâ, Satan ahunda ti mû ALA ti tene lo yengere ALA na yengere tongana blé.
32 Me mbi voro tere na Nzapa ndali ti mo si mabe ti mo awoko pëpe. Ti mo, tongana mo kiri awe, kpengba aita ti mo.”
33 Na Pierre atene na lo: “Seigneur, mbi yeke nduru ti gue legeoko na mo na da ti kanga nga juska na kuâ.”
34 Me Jésus atene: “Pierre, mbi tene na mo: Mbeni koli-kondo ayeke toto laso pëpe juska mo tene fani ota so mo hinga mbi pëpe si.”
35 Lo tene nga na ala: “Lani so mbi tokua ALA na bozo ti nginza pëpe, na bozo ti kobe pëpe nga na poro pëpe, mbeni ye atia ALA?” Ala tene: “Ên-ën!”
36 Tongaso lo tene na ala: “Me ti londo laso, zia zo so ayeke na bozo ti nginza, lo mû ni, na zo so ayeke na bozo ti kobe asara tongaso nga. Zia zo so ayeke na épée pëpe lo kä bongo ti lo ti ndo ni na lo vo mbeni épée.
37 Teti mbi tene na ALA, a lingbi tënë so a sû na yâ ti Mbeti ti Nzapa aga tâ tënë na ndo ti mbi, tënë so atene: ‘A diko lo na popo ti azo so akpe ndia pëpe.’ Teti ye so a sara tënë ni na ndo ti mbi angbâ ti ga tâ tënë na ndembe so.”
38 Ala tene na lo: “Seigneur, bâ a-épée use la!” Lo tene na ala: “So alingbi awe.”
39 Tongana ti so lo yeke sara ka lakue, lo sigigi lo gue na ndo ti Hoto ti akeke ti olive, na adisciple nga ague na peko ti lo.
40 Tongana lo si na ndo ni, lo tene na ala: “ALA ngbâ ti sambela, si ALA tï na yâ ti tara pëpe.”
41 Ti lo, lo gue ayo kete na ala alingbi na ndo so tongana zo abi tênë, a tï dä, lo kuku na likuni ti lo na lo to nda ti sambela,
42 lo tene: “Babâ, tongana mo ye, mo zi kopo so yongoro na mbi. Ye oko, zia a sara ye so bê ti mbi aye pëpe, me a sara ye so bê ti mo aye.”
43 Na pekoni, mbeni ange alondo na yayu asi na tere ti lo, na ange ni akpengba lo.
44 Me teti so vundu agbu lo mingi, lo ngbâ ti sambela ngangu ahon ti kozo, na gbiki ti tere ti lo aga tongana mênë si ayeke tï oko oko na sese.
45 Tongana lo sambela awe, lo londo lo gue na mbage ti adisciple na lo wara ala na lango ndali ti so vundu asara ala.
46 Lo tene na ala: “ALA yeke lango ngbanga ti nyen? ALA londo na ALA sambela, si ALA tï na yâ ti tara pëpe.”
47 So tënë angbâ na yanga ti lo, bâ, gbâ ti azo ayeke ga, na lo so a iri lo Judas, mbeni oko na popo ti adisciple bale-oko na use, ayeke tambela na li ni. Lo pusu na tere ti Jésus ti su ngbangba ti lo.
48 Me Jésus atene na lo: “Judas, mo kä Molenge ti zo na lege so mo su ngbangba ti lo?”
49 Na ngoi so ala so ayeke na tere ti Jésus abâ ye so aye ti si, ala tene: “Seigneur, a lingbi e dë zo na épée ni?”
50 Mbeni oko na popo ti ala adë ngbâa ti kota prêtre na lo fâ mê ti lo ti mbage ti koli.
51 Me Jésus atene na ala: “A ngbâ tongaso!” Na lo ndu mê ti zo ti kua ni, lo sava lo.
52 Jésus atene na aprêtre-mokonzi, amokonzi ti temple nga na a-ancien so aga ndali ti lo: “ALA ga na a-épée nga na anduru keke tongana ti so a yeke sara na mbeni zo ti gbungo aye ti azo na ngangu?
53 So lâ na lâ mbi yeke na tere ti ALA na yâ ti temple, ALA tara ti gbu mbi pëpe. Me so ayeke ngbonga ti ALA nga ngbonga ti tene bingo akomande.”
54 Na pekoni ala gbu lo, ala gue na lo, ala lï na lo na yâ ti da ti kota prêtre. Pierre amû peko ti lo, me lo ngbâ ayo.
55 Na ngoi so ala sara wâ na bê ti yâ ti gbagba ni na ala duti na tere ni, Pierre ayeke duti na popo ti ala.
56 Me mbeni maseka-wali so ayeke zo ti kua abâ Pierre so ayeke duti na tere ti wâ so aza mingi, lo bâ yâ ti lê ti Pierre na lo tene: “Koli so kue ayeke fade na tere ti lo.”
57 Me Pierre abere tënë ni, lo tene: “Wali, mbi hinga lo pëpe.”
58 Kete na pekoni, mbeni zo so abâ lo atene: “Mo kue mo yeke oko ti ala.” Me Pierre atene: “Koli, mbi yeke oko ti ala pëpe.”
59 Ngbonga oko tongaso na pekoni, mbeni koli nde ato nda ti tene na ngangu: “Ti tâ tënë ni, koli so kue ayeke lani na tere ti lo, teti lo yeke biani mbeni zo ti Galilée!”
60 Me Pierre atene: “Koli, mbi hinga tënë so mo yeke tene so pëpe.” Tongana lo ngbâ ti sara tënë, mo ye ti bâ, mbeni koli-kondo atoto.
61 Na Seigneur aturnê, lo bâ Pierre; na Pierre adabe ti lo na tënë so Seigneur atene fade na lo: “Kozo si mbeni koli-kondo atoto laso, fani ota mo yeke tene so mo hinga mbi pëpe.”
62 Na lo sigigi, lo toto ngangu mingi.
63 Azo so agbu Jésus si ayeke bata lo ato nda ti he lo nga ti pika lo.
64 Tongana ala kanga lê ti lo awe, ala yeke hunda lo, ala tene: “Tongana mo yeke prophète, fa na e zo so apika mo.”
65 Na ala to nda ti zonga lo na gbâ ti atënë nde nde.
66 Na nda ni, tongana ndo ahan awe, bungbi ti a-ancien ti azo ni, aprêtre-mokonzi nga na ascribe abungbi tere ti ala ndo oko, ala gue na lo na yâ ti kota da ti Sanhédrin ti ala, ala tene:
67 “Tongana mo yeke Christ, mo tene na e.” Me lo tene na ala: “Même tongana mbi tene ni na ALA, ALA yeke mä na bê na ni oko pëpe.
68 Nga, tongana mbi hunda ALA, ALA yeke kiri tënë oko pëpe.
69 Me, ti londo laso, Molenge ti zo ayeke duti ande na ngangu koti ti Nzapa.”
70 Na ndo ti tënë so, ala kue atene: “Tongaso, mo yeke Molenge ti Nzapa?” Lo tene na ala: “ALA wani atene awe so mbi yeke lo.”
71 Ala tene: “E yeke na bezoin ti mbeni tënë nde ngbanga ti nyen? So e wani e mä ye so asigigi na yanga ti lo awe so.”
