Marc 16:1-20
16 Tongana lâ ti sabbat ahon awe, Marie ti Magdala na Marie mama ti Jacques, nga na Salomé avo akugbe so afun pendere ti tene ala gue ala kpaka ni na tere ti Jésus.
2 Na kota ndapre ti kozo lango ti yenga ni, ala ga na yanga ti sende ti kuâ ni, na ngoi so lâ asigigi awe.
3 Na ala yeke tene na popo ti ala: “Zo wa si ayeke pusu ande na e tênë so ayeke na yanga ti sende ti kuâ ni?”
4 Me na ngoi so ala bâ ndo, ala bâ so, atâa so tênë ni akono mingi, a pusu ni a zia nde awe.
5 Tongana ala lï na yâ ti sende ti kuâ ni, ala bâ mbeni maseka-koli so ayeke duti na mbage ti koti na lo yü mbeni yongoro vuru bongo, na li ti ala akpe.
6 Lo tene na ala: “Zia li ti ALA akpe pëpe. ALA yeke gi Jésus, zo ti Nazareth, lo so a kanga lo na ndo ti keke! Lo yeke na ndo so pëpe, a zingo lo na kuâ awe. ALA bâ ndo so a zia lo fade dä.
7 Me ALA gue, ALA tene na adisciple ti lo nga na Pierre, ALA tene: ‘Lo yeke gue kozo ti ALA na Galilée, na kâ si fade ALA yeke bâ lo tongana ti so lo tene na ALA kozo awe.’ ”
8 Tongaso, ala sigigi na yâ ti sende ti kuâ ni ala kpe ahon, ngbanga ti so tere ti ala adö dongo nga bê ti ala adö ngangu mingi. Na ala sara tënë ni na mbeni zo pëpe teti so mbeto ahon ndo ti ala.
NDURU TËNË TI NDA NI
Na yâ ti ambeni ngbene mbeti ti Nzapa so asû ni na maboko nga na ti ambeni ngbene Bible so a wara ni aninga pëpe, a yeke wara gi mbeni nduru tënë na peko ti Marc 16:8, nduru tënë ni ayeke so:
Me aye kue so a mû yanga na ala ti sara, ala fa pekoni gi nduru tongaso na azo so ayeke na tere ti Pierre. Nga, na peko ti aye so, Jésus wani atokua ala na mbage ti Tö nga na mbage ti Do ti fa tënë ti salut ti lakue lakue so ayeke nzoni-kue nga so alingbi ti buba pëpe.
YONGORO TËNË TI NDA NI
Na yâ ti ambeni ngbene mbeti ti Nzapa so a sû ni na maboko, na tapande Codex Alexandrinus, Codex Ephraemi, Codex de Bèze, a yeke wara mbeni yongoro tënë ti nda ni dä. Nga a yeke wara ni na yâ ti ambeni Bible so a kiri pekoni na ayanga ti kodoro nde, na tapande Bible ti Vulgate, Bible so ayeke na yanga ti Syriaque ti Cureton, nga na Bible ti Peshitta so ayeke na yanga ti Syriaque. Me a yeke wara yongoro tënë ti nda ni so pëpe na yâ ti ambeti tongana Codex Sinaiticus, Codex Vaticanus, Codex Sinaiticus so ayeke na yanga ti Syriaque nga na Bible ti Arménien. Yongoro tënë ni ayeke so:
9 Na peko ti so lo zingo na kuâ, hio na kozo lango ti yenga ni, lo fa tere ti lo kozoni na Marie ti Magdala, so lo tomba lani asioni yingo mbasambala na yâ ti lo.
10 Marie ti Magdala ague asara tënë ni na ala so ayeke lani na tere ti lo, na ngoi so ala yeke sara mawa na ala yeke toto.
11 Me tongana ala mä so lo kiri na fini awe na so Marie ti Magdala abâ lo na lê ti lo, ala yeda na tënë ni pëpe.
12 Nga, na peko ti aye so, lo mû mbeni tere nde si lo fa tere ti lo na ambeni disciple use so ayeke tambela na lege, na ngoi so ala yeke gue na yâ ti kete kodoro ni.
13 Ala kiri ala fa peko ti tënë ni na atanga ni. Atâa so kue, ala yeda na ni pëpe.
14 Me na pekoni, lo fa tere ti lo na ala bale-oko na oko na ngoi so ala yeke te kobe na table, lo suku na ala teti so mabe atia ala nga so bê ti ala akpengba ngbanga ti so ala yeda pëpe na azo so abâ lo na lê na peko ti so lo zingo na kuâ.
15 Na lo tene na ala: “ALA gue na yâ ti dunia kue na ALA fa nzoni tënë na azo kue.
16 Zo so amä na bê si a batize lo, fade a yeke sö lo. Me zo so amä na bê pëpe, fade a yeke dë ngbanga na li ti lo.
17 Nga, ala so amä na bê, fade ala yeke sara afä so: Na iri ti mbi, fade ala yeke tomba asioni yingo, ala yeke sara tënë na ayanga ti kodoro nde nde,
18 ala yeke gbu angbo na maboko ti ala, na tongana ala nyon mbeni sioni yorö ti fango zo, a yeke sara sioni na ala pëpe. Fade ala yeke zia maboko ti ala na ndo ti azo ti kobela na tere ti ala ayeke ga nzoni.”
19 Tongaso, na peko ti so Seigneur Jésus asara tënë na ala awe, a mû lo a gue na lo na yayu na lo duti na koti ti Nzapa.
20 Ndani la si ala gue, ala fa tënë na ndo kue. Nga na oko ngoi ni, Seigneur ayeke sara kusala legeoko na ala na lo mû ngangu na tënë ni na lege ti afä so ala yeke sara ni.
