Marc 3:1-35
3 Lo kiri lo lï na yâ ti mbeni synagogue, na mbeni koli so maboko ti lo oko abuba ayeke kâ.
2 Lê ti ala ayeke gi na tere ti lo ti bâ wala lo yeke sava koli ni so na lâ ti sabbat, tongaso si ala wara mbeni tënë ti bi na li ti lo.
3 Na lo tene na koli so maboko ti lo abuba so: “Londo mo ga mo luti na popo ti e ge.”
4 Na pekoni, lo tene na ala: “Na lâ ti sabbat, ndia amû lege na zo ti sara mbeni nzoni kusala wala ti sara mbeni sioni ni? ti sö mbeni âme wala ti fâ lo?” Me ala zi yanga pëpe.
5 Na peko ti so lo yô lê ti lo si lo bâ ala kue, bê ti lo ason mingi. Vundu asara lo mingi teti so bê ti ala akpengba. Na pekoni, lo tene na koli ni: “Yôro yâ ti maboko ti mo.” Na koli ni ayôro ni, na a kiri a ga nzoni.
6 Na ndo ti ye so, aFarizien asigigi, na hio ala gue ala bungbi na azo ti Hérode ti mä tere na ndo ti Jésus ti tene ala fâ lo.
7 Me Jésus na adisciple ti lo ague ti ala na kota ngu. Azo mingi mingi alondo na Galilée nga na Judée na ala mû peko ti lo.
8 Azo mingi mingi, so amä tënë ti aye mingi so lo yeke sara, alondo même na Jérusalem, na Idumée nga na mbage ti Ngu ti Jourdain nga na akodoro so ayeke na tere ti Tyr na Sidon, na ala ga na mbage ti lo.
9 Na lo tene na adisciple ti lo ti zia lakue mbeni kete ngö ndali ti lo tongaso si gbâ ti azo ni alingbi ti pete lo pëpe.
10 So lo sava azo mingi, a sara si azo kue so ayeke na akota kobela ayeke bungbi na li ti lo ti ndu lo.
11 Même asioni yingo, na ngoi kue so ala yeke bâ lo, ala yeke kuku na gbele lo na ala yeke dekongo, ala tene: “Mo yeke Molenge ti Nzapa.”
12 Me fani mingi, lo gboto mê ti ala ngangu ti tene ala fa lo na azo pëpe.
13 Lo gue na ndo ti mbeni hoto na lo iri ala so bê ti lo aye, na ala gue na peko ti lo.
14 Na lo soro mbeni kete bungbi ti akoli bale-oko na use so lo di iri ti ala nga “abazengele,” si ala lingbi ti ngbâ lakue na tere ti lo, si lo lingbi ti tokua ala ti fa tënë
15 nga ti tomba asioni yingo.
16 Ala bale-oko na use so lo soro ala ayeke: Simon, so lo mû na lo nga iri ti Pierre;
17 Jacques na ita ti lo Jean so ayeke amolenge ti Zébédée (lo mû nga na ala iri ti Boanergès, so nda ni aye ti tene, aMolenge ti Bekpa);
18 André, Philippe, Barthélemy, Matthieu, Thomas, Jacques molenge ti Alphée, Thaddée na Simon, lo so ayapu na sarango ye,
19 nga Judas Iscariote, so na pekoni akä Jésus.
Na lo lï na yâ ti mbeni da.
20 Gbâ ti azo akiri abungbi na da ni, ye so asara si ala wara même lege ti te kobe pëpe.
21 Me na ngoi so afami ti lo amä tënë ni, ala gue ti gbu lo, ngbanga ti so ala yeke tene ti ala: “Ye asara li ti lo awe.”
22 Nga, ascribe so alondo na Jérusalem si aga ayeke tene: “Béelzéboub ayeke na yâ ti lo, na lo yeke tomba asioni yingo na ngangu ti mokonzi ti asioni yingo.”
23 Tongaso, na peko ti so lo iri ala na tere ti lo, lo to nda ti sara tënë na ala na lege ti atapande, lo tene: “Satan alingbi ti tomba Satan tongana nyen?
24 ALA bâ, tongana yâ ti mbeni royaume akangbi, royaume ni so alingbi ti ngbâ na nduzu pëpe;
25 na tongana yâ ti mbeni da akangbi, da ni so alingbi ande ti ngbâ na nduzu pëpe.
26 Legeoko nga, tongana Satan alondo ti tiri na lo wani si yâ ti lo akangbi, lo lingbi ti ngbâ na nduzu pëpe, me lo yeke gue ti tï biani.
27 Mbeni zo alingbi pëpe ti lï na da ti mbeni wangangu na ti gbu akungba ti lo tongana lo kanga wangangu ni kozoni pëpe. A yeke gi tongana lo kanga wangangu ni awe si fade lo yeke gbu akungba ti da ti lo.
28 Ti tâ tënë ni, mbi tene na ALA: Aye kue so amolenge ti azo ayeke sara, fade a yeke pardone ni na ala, atâa asiokpari wa so ala sara wala asioni zonga wa so ala zonga.
29 Me, zo so azonga yingo vulu, fade a yeke pardone lo lâ oko pëpe, me siokpari ni ayeke ngbâ lakue lakue na li ti lo.”
30 Jésus atene tongaso ngbanga ti so ala tene: “Lo yeke na mbeni sioni yingo na yâ ti lo.”
31 Fadeso, mama ti lo na aita ti lo aga. Tongana ala yeke luti na gigi, ala tokua ti tene a iri lo na ala.
32 Na gbâ ti azo ayeke duti na tere ti lo, na a tene na lo: “Bâ, mama ti mo na aita ti mo ayeke na gigi na ala yeke hunda ti bâ mo.”
33 Me lo kiri tënë na ala, lo tene: “Azo wa la ayeke mama ti mbi na aita ti mbi ni?”
34 Na lo yô lê ti lo, lo bâ azo so aduti si angoro lo so, lo tene: “Bâ, mama ti mbi na aita ti mbi ni la!
35 Zo so asara ye so bê ti Nzapa aye, zo so la ayeke ita ti mbi ti koli, ita ti mbi ti wali nga mama ti mbi.”
