Marc 6:1-56
6 Lo londo kâ, lo kiri na kodoro so lo kono dä, na adisciple ti lo amû peko ti lo.
2 Tongana lâ ti sabbat alingbi awe, lo to nda ti fa ye na yâ ti synagogue. Mingi ti azo so ayeke mä lo, bê ti ala adö si ala tene: “Koli so awara ti lo aye so na ndo wa? A mû ndara tongaso na koli so ngbanga ti nyen? Ngbanga ti nyen lo yeke na ngangu ti sara akusala ti ngangu tongaso?
3 So sarapande so la pëpe? Lo yeke molenge ti Marie pëpe? Lo yeke ita ti Jacques, Joseph, Judas na Simon pëpe? Aita ti lo ti wali ayeke na popo ti e ge pëpe?” Na bê ti ala ato nda ti son na tere ti lo.
4 Me Jésus atene na ala: “A yeke ne ka prophète na yâ ti kodoro ti lo pëpe, na popo ti afami ti lo pëpe nga na yâ ti da ti lo wani pëpe, me gi na mbeni ndo nde.”
5 Tongaso, lo lingbi ti sara akusala ti ngangu kâ pëpe, me lo zia maboko ti lo gi na ndo ti ambeni zo ti kobela oko oko na lo sava ala.
6 Biani, lo gi li ti lo gbä na mabe so amanke ala. Na lo tambela na yâ ti akete kodoro ni oko oko kue, lo fa ye na azo.
7 Lo iri adisciple bale-oko na use, na lo to nda ti tokua ala use use na ti mû na ala komandema na ndo ti asioni yingo.
8 Nga, lo mû yanga na ala ti mû mbeni ye oko pëpe ndali ti lege, me ti mû gi keke ti tambelango na ni. Lo tene nga na ala ti mû mapa pëpe, bozo ti kobe pëpe nga ti mû nginza ti gengere pëpe na yâ ti abozo so ala kanga na gbe ti yâ ti ala.
9 Na lo mû yanga na ala ti yü poro na gere ti ala, me ti mû bongo ti gbe ni use pëpe.*
10 Nga, lo tene na ala: “Na ndo kue so ALA lï na yâ ti mbeni da, ALA ngbâ kâ juska na ngoi so ALA zia ndo ni ti hon.
11 Na ndo kue so a yeke yamba ALA ande dä pëpe wala a yeke mä tënë ti ALA pëpe, tongana ALA yeke sigigi kâ, ALA pika sese ti gbe ti gere ti ALA ti fa so azo ni asara sioni.”
12 Tongaso ala gue, ala fa tënë si azo alingbi ti changé bê ti ala.
13 Ala tomba gbâ ti asioni yingo nga ala sara mafuta na tere ti azo ti kobela mingi na ala sava ala.
14 Teti so iri ti Jésus amû ndo kue, a tï na mê ti Gbia Hérode. Azo ayeke tene: “A zingo Jean wabatizengo azo na popo ti akuâ awe, ni la si lo yeke sara akusala ti ngangu so.”
15 Me ambeni ayeke tene ti ala: “So Élie la.” Ambeni nde ayeke tene: “So ayeke mbeni prophète tongana tanga ti aprophète.”
16 Me tongana Hérode amä tënë ni, lo tene: “So ayeke Jean Baptiste so mbi dë go ti lo lani so la. A zingo lo na kuâ awe.”
17 Hérode atene tongaso ngbanga ti so lo la lo tokua lani ti gbu Jean, lo kanga lo na lo bi lo na da ti kanga ndali ti Hérodiade so ayeke wali ti Philippe ita ti Hérode ni, ngbanga ti so Hérode amû Hérodiade na wali.
18 Teti fani mingi Jean ayeke tene lani na Hérode: “Ndia amû lege na mo ti mû wali ti ita ti mo pëpe.”
19 Na Hérodiade ayeke bata lani Jean na bê na lo ye ti fâ lo, me lo wara lege ni pëpe
20 ngbanga ti so Hérode ayeke sara mbeto ti Jean. Hérode ahinga so Jean ayeke zo ti mbilimbili nga lo yeke nzoni-kue, ni la lo ngbâ ti bata lo nzoni. Na peko ti so Hérode amä tënë so Jean afa na lo, lo hinga ye so lo lingbi ti sara pëpe, me lo ngbâ ti mä Jean lakue na ngia na bê ti lo.
21 Me lango so Hérodiade ayeke ku asi na ngoi so Hérode asara mbeni matanga na lango ti dungo lo, na lo tisa anene zo ti lo, amokonzi ti aturugu na akota zo ti kodoro ti Galilée.
22 Na molenge ti Hérodiade ti wali alï, na lo dodo. Lo zia ngia na bê ti Hérode nga na bê ti azo so ayeke te kobe legeoko na lo. Gbia ni atene na maseka-wali ni: “Mo hunda na mbi ye so mo ye na fade mbi yeke mû ni na mo.”
23 Lo deba na maseka-wali ni, lo tene: “Ye so mo hunda, fade mbi yeke mû na mo, même juska ndambo ti royaume ti mbi.”
24 Maseka-wali ni ague atene na mama ti lo: “A yeke nzoni mbi hunda nyen?” Mama ni atene: “Hunda li ti Jean wabatizengo azo.”
25 Fade fade, lo lï hio na gbia ni kâ na lo hunda ye so lo ye, lo tene: “Mbi ye mo mû na mbi fade fadeso li ti Jean Baptiste na yâ ti kpangbala sembe.”
26 Atâa so vundu agbu lo mingi, gbia ni aye ti ke tënë ti maseka-wali ni pëpe, ngbanga ti so lo deba yanga ti lo awe, nga ngbanga ti azo so ayeke te kobe na table legeoko na lo.
27 Tongaso, gbia ni atokua hio mbeni turugu ti batango lo, lo mû yanga na lo ti ga na li ti Jean. Turugu ni ague, lo dë go ti Jean na da ti kanga kâ,
28 lo ga na li ti Jean na yâ ti mbeni kpangbala sembe na lo mû ni na maseka-wali ni. Maseka-wali ni ague na ni na mama ti lo.
29 Tongana adisciple ti Jean amä tënë ni, ala ga na ala mû kuâ ni, ala lu ni na yâ ti mbeni sende ti kuâ.
30 Abazengele abungbi na gbele Jésus na ala fa na lo peko ti aye kue so ala sara na so ala fa na azo.
31 Na lo tene na ala: “ALA ga ALA duti na mbeni ndo so zo ayeke dä pëpe na ALA wu tere ti ALA kete.” Lo tene tongaso ngbanga ti so azo mingi ayeke ga na ayeke gue, na ala wara même ngoi ti wu tere ti te kobe pëpe.
32 Tongaso ala ko na yâ ti ngö ti gue na mbeni ndo so zo ayeke dä pëpe.
33 Me azo abâ ala na guengo ni nga mingi ti azo ahinga tënë ni. Tongaso, azo ni alondo na yâ ti agbata ni kue, ala kpe loro juska na ndo ni kâ, na azo ni asi kozo ti ala.
34 Tongana lo sigigi na yâ ti ngö ni, lo bâ azo mingi mingi, na mawa ti ala asara lo, teti so ala yeke tongana angasangbaga so ayeke na berger pëpe. Na lo to nda ti fa aye mingi na ala.
35 Na ngoi so lâ aga nduru ti lï awe, adisciple ti lo aga na ala to nda ti tene na lo: “Ndo ni ge ayeke yâ ti benyama na ngbonga ni ahon mingi awe.
36 Mo tene na azo so ti gue, tongaso si ala gue na ando so ayeke na yanga ti yaka nga na yâ ti akete kodoro na ala vo ye ti te.”
37 Lo kiri tënë na ala, lo tene: “ALA wani amû ye ti tengo ni na azo so.” Na ndo ti tënë so, ala tene na lo: “Mo ye e gue e vo mapa ti denier ngbangbo use si e mû ni na azo so si ala te?”
38 Lo tene na ala: “ALA yeke na mapa oke? ALA gue abâ si!” Tongana ala gue ala bâ ni awe, ala tene: “Mapa ayeke oku na susu use na tere ni.”
39 Na lo mû yanga na azo ni kue ti bungbi tere ti ala nde nde na ti duti na ndo ti pere.
40 Na ala bungbi tere ti ala, ambeni abungbi tere ti ala ngbangbo oko, na ambeni abungbi tere ti ala bale-oku.
41 Lo mû mapa oku na susu use so, lo yô lê ti lo na nduzu, na lo iri tënë nzoni na ndo ni. Lo fâ yâ ti amapa ni, lo mû na adisciple ti tene ala zia ni na gbele azo ni. Lo kangbi nga yâ ti asusu use so na azo ni kue.
42 Azo ni kue ate, yâ ti ala asi.
43 Na ala ro anduru ni so angbâ na a si sakpa bale-oko na use. Ala ro nga tanga ti asusu ni.
44 Nga, akoli saki oku si ate mapa ni.
45 Hio, lo mû yanga na adisciple ti lo ti montê na yâ ti ngö na ti hon kozo na lo na mbage ti ngu ni ti gue na mbage ti Bethsaïda, nga na oko ngoi ni, lo tene na gbâ ti azo so ti gue.
46 Me tongana lo tene na azo ni ti gue nzoni awe, lo gue na ndo ti mbeni hoto ti sambela.
47 Tongana ndo avuko awe, ngö ni ayeke kâ na lê ti kota ngu, me Jésus angbâ gi lo oko na sese.
48 Lo bâ so ala yeke na kpale ti gbï kâî ndali ti so pupu ayeke ga gi gango na mbage ti ala. Nduru na kota ndapre, lo ga na mbage ti ala, lo yeke tambela na ndo ti kota ngu ni. Me lo ye ti hon ala hongo.
49 Tongana lê ti ala atï na ndo ti Jésus so ayeke tambela na ndo ti kota ngu ni, ala tene: “So ye ti ndima la!” Na ala dekongo,
50 ngbanga ti so ala kue abâ lo, na li ti ala aga kirikiri. Me hio lo tene na ala: “ALA dë bê ti ALA, mbi la. ALA sara mbeto pëpe.”
51 Tongana lo ko na yâ ti ngö ni na tere ti ala, pupu ni akaï. Na bango ye so, bê ti ala adö ngangu,
52 teti so ala gbu nda ti ye ti kpene so lo sara fade ti mû na azo mapa so pëpe. Ade ala wara lege ti gbu nda ni na bê ti ala pëpe.
53 Tongana ala fâ ngu ni awe, ala si na Gennésareth na ala kanga ngö ni na yanga ti ngu.
54 Me gi so ala sigigi na yâ ti ngö ni, azo ahinga lo.
55 Na azo ni amû loro ague na yâ ti ndo ni kue na ala to nda ti mû azo ti kobela, ala yô ala na ndo ti agbogbo na ala ga na ala na ndo so ala mä a tene lo yeke dä.
56 Na ando kue so lo yeke lï dä, atâa na yâ ti akete kodoro, agbata nga na ando so ayeke na yanga ti yaka, ala yeke zia azo ti kobela ni na gara, na ala yeke voro yanga na lo ti tene ala ndu gi yanga ti bongo ti lo ti ndo ni. Na azo kue so andu ni, tere ti ala aga nzoni.
Akete tënë na terê ni
^ Na Grec: “ti yü bongo ti gbe ni use pëpe.”
