Marc 8:1-38
8 Na ngoi ni so, azo akiri abungbi gbani na ala yeke na ye ti tengo ni pëpe. Tongaso, lo iri adisciple si lo tene na ala:
2 “Mawa ti gbâ ti azo so asara mbi, ngbanga ti so a sara laso lango ota awe si ala ngbâ na tere ti mbi na ala yeke na ye ti tengo ni pëpe.
3 Na tongana mbi tene na ala ti gue na kodoro na nzara na yâ ti ala, fade ala yeke woko na lege, teti so ambeni alondo ayo.”
4 Me adisciple ti lo atene na lo: “Ge na yâ ti benyama tongaso, zo ayeke wara ande mapa na ndo wa ti mû na gbâ ti azo so si ala te, yâ ti ala asi?”
5 Me lo hunda ala: “ALA yeke na mapa oke?” Ala tene: “Mbasambala.”
6 Na lo mû yanga na gbâ ti azo so ti duti na sese. Lo mû amapa mbasambala ni, lo kiri singila na Nzapa, lo fâ yâ ni na lo mû ni na adisciple ti lo, si ala kangbi ni na gbâ ti azo so.
7 Ala yeke nga na ambeni kete susu so ayeke mingi pëpe. Na tongana lo iri tënë nzoni na ndo ni awe, lo tene na ala ti kangbi ni nga.
8 Tongaso ala te ni na yâ ti ala asi. A ro tanga ti anduru ni so angbâ, na a si akota sakpa mbasambala.
9 Akoli so ayeke dä ayeke saki osio tongaso. Na nda ni, lo tene na ala ti gue.
10 Hio na pekoni, lo na adisciple ti lo ako na yâ ti ngö na ala si na mbage ti sese ti Dalmanutha.
11 Ge, aFarizien aga na ala to nda ti dë gaba na lo. Ti tara lo, ala hunda lo ti sara mbeni fä ti yayu.
12 Lo dema na lo wu ngangu, lo tene: “Ngbanga ti nyen azo ti ngoi so ahunda mbeni fä? Ti tâ tënë ni, mbi tene na ALA: A yeke fa mbeni fä oko pëpe na azo ti ngoi so.”
13 Na peko ti tënë so, lo zia ala, lo kiri lo ko na yâ ti ngö na lo gue na mbage ti ngu ni kâ.
14 Ye oko, ala girisa ti mû mapa, na ala yeke na mbeni ye ti tengo ni pëpe na yâ ti ngö ni, gi mapa oko.
15 Tongaso, Jésus agboto mê ti ala ngangu, lo tene: “ALA zi lê ti ALA, ALA sara hange na mama ti mapa ti aFarizien nga na mama ti mapa ti Hérode.”
16 Na ala to nda ti papa na popo ti ala ngbanga ti so ala yeke na mapa pëpe.
17 Tongana lo bâ ye so, lo tene na ala: “Ndali ti nyen si ala papa na popo ti ALA ngbanga ti so ALA yeke na mapa pëpe? Ade ALA mä yâ ti tënë so pëpe? Ade ALA gbu nda ni pëpe? A yeke ngangu na ALA ti gbu nda ti ye na bê ti ALA?
18 ‘Atâa so lê ti ALA ayeke dä, ALA bâ ndo pëpe? Atâa so mê ti ALA ayeke dä, ALA mä ndo pëpe?’ ALA girisa awe,
19 lani so mbi fâ yâ ti mapa oku ndali ti akoli saki oku so, tanga ti anduru ni so ALA ro asi sakpa oke?” Ala tene na lo: “Bale-oko na use.”
20 “Lani so mbi fâ yâ ti amapa mbasambala ndali ti akoli saki osio so, tanga ti anduru ni so ALA ro asi kota sakpa oke?” Ala tene na lo: “Mbasambala.”
21 Na ndo ti tënë so, lo tene na ala: “Ade ALA gbu nda ni pëpe?”
22 Ala si na Bethsaïda. Na azo aga na lo mbeni koli so ayeke waziba, ala voro yanga na Jésus ti ndu lo.
23 Lo gbu maboko ti waziba so, lo gue na lo na gigi ti kete kodoro ni. Lo tuku ngu ti yanga na ndo ti alê ti lo, lo zia maboko ti lo na ndo ti koli ni, na Jésus ato nda ti hunda lo: “Mo bâ mbeni ye?”
24 Na koli ni ayo lê ti lo, lo tene: “Mbi bâ azo, ngbanga ti so mbi bâ ambeni ye so akpa akeke, me ala yeke tambela.”
25 Na pekoni, lo kiri lo zia maboko ti lo na ndo ti alê ti koli ni, na koli ni abâ ndo nzoni, lê ti lo akiri aga nzoni na lo yeke bâ ye kue polele.
26 Tongaso, lo tene na koli ni ti kiri na da ti lo, me lo tene: “Mo lï na yâ ti kete kodoro ni pëpe.”
27 Na pekoni, Jésus na adisciple ti lo alondo na ndo so ti gue na akete kodoro ti Césarée ti Philippe. Na tongana ala yeke na lege, Jésus ahunda adisciple ti lo, lo tene: “Azo ayeke tene ti ala so mbi yeke zo wa?”
28 Ala tene na lo: “Ambeni zo atene mo yeke Jean Baptiste, ambeni atene mo yeke Élie, ambeni nga atene mo yeke mbeni oko ti aprophète.”
29 Lo hunda ala: “Me ti ALA, ALA tene mbi yeke zo wa?” Pierre akiri tënë na lo: “Mo yeke Christ.”
30 Na ndo ti tënë so, lo gboto mê ti ala ti sara tënë ti lo na mbeni zo pëpe.
31 Nga, Jésus ato nda ti fa na ala so a lingbi Molenge ti zo abâ pasi mingi, fade a-ancien, aprêtre-mokonzi nga na ascribe ake lo. A yeke fâ lo ande, me lango ota na pekoni, lo yeke zingo na kuâ.
32 Biani, lo sara tënë so na mbeto pëpe. Me Pierre agboto Jésus yongoro kete si lo to nda ti suku na lo.
33 Jésus aturnê, lo bâ adisciple ti lo na lo suku na Pierre, lo tene: “Hon na peko ti mbi kâ, Satan, ngbanga ti so mo yeke na abibe ti Nzapa pëpe, me mo yeke na abibe ti azo!”
34 Na pekoni, Jésus airi gbâ ti azo ni nga na adisciple ti lo na tere ti lo, na lo tene na ala: “Tongana mbeni zo aye ti ga na peko ti mbi, zia lo ke tere ti lo wani na lo yô keke ti pasi ti lo na lo mû peko ti mbi lakue lakue.
35 Teti zo so aye ti sö âme ti lo, fade lo yeke girisa ni. Me zo so agirisa âme ti lo ndali ti mbi nga ndali ti nzoni tënë, fade lo yeke sö ni.
36 Ti tâ tënë ni, tongana mbeni zo awara dunia so kue me lo girisa âme ti lo, ye ti nzoni wa lo wara dä?
37 Biani, nyen la si zo ayeke mû na place ti âme ti lo?
38 Teti zo so asara kamene ti mbi nga na kamene ti tënë ti mbi na gbele azo ti ngoi so, so ayeke be-ta-zo na Nzapa pëpe* na so ayeke azo ti sarango siokpari, fade Molenge ti zo ayeke sara nga kamene ti lo na ngoi so lo yeke si na yâ ti gloire ti Babâ ti lo legeoko na a-ange so ayeke nzoni-kue.”
