Matthieu 19:1-30
19 Tongana Jésus ahunzi tënë so awe, lo zia Galilée, lo si na akatikati ti sese ti Judée, na mbage ti Ngu ti Jourdain.
2 Azo mingi mingi amû nga peko ti lo, na lo sava ala kâ.
3 Na aFarizien aga na tere ti lo, ala ye ti tara lo. Tongaso, ala tene: “Ndia amû lege na koli ti sara divorce na wali ti lo ndali ti mara ti atënë nde nde kue?”
4 Lo kiri tënë, lo tene: “ALA diko na yâ ti Mbeti ti Nzapa pëpe? Na tongo nda ni, lo so asara ala, lo sara ala koli na wali,
5 na lo tene: ‘Ndani la, koli ayeke zia ande babâ na mama ti lo, na lo gue ande ti duti na wali ti lo na ala use ayeke ga mitele oko.’
6 Tongaso ala yeke use mbeni pëpe, me mitele oko. Ni la, ye so Nzapa abungbi ni na gbe ti joug oko, zia mbeni zo akangbi yâ ni pëpe.”
7 Ala tene na lo: “Ka ngbanga ti nyen si Moïse amû yanga lani ti mû mbeni mbeti ti divorce na wali ni na ti tomba lo?”
8 Lo tene na ala: “A yeke ndali ti kpengbango bê ti ALA si Moïse abâ gbä lo mû lege na ALA ti sara divorce na awali ti ALA. Me, na tongo nda ni, ye ni ayeke lani tongaso pëpe.
9 Mbi tene na ALA: Tongana a yeke ndali ti lango-sioni pëpe, si mbeni zo asara divorce na wali ti lo na lo sara mariage na mbeni wali nde, lo gi mbeni wali nde la.”
10 Adisciple atene na lo: “Tongana tënë ti mungo tere ti koli na wali ni ayeke tongaso, a yeke nzoni pëpe ti sara mariage.”
11 Lo tene na ala: “A yeke azo kue si ayeke yeda na tënë so pëpe, me gi ala so ayeke na matabisi ni.
12 Teti ambeni zo ayeke dä so ayeke ambaïwa ngbanga ti so mama ti ala adü ala gi tongaso. Ambeni ayeke ambaïwa ndali ti so azo asara si ala ga ambaïwa. Me, ambeni zo ayeke dä so asara tere ti ala wani ambaïwa ngbanga ti royaume ti yayu. Zia zo so alingbi ti yeda na ni ayeda na ni.”
13 Na pekoni, azo amû akete molenge aga na ala na lo ti tene lo zia maboko ti lo na ndo ti ala na lo sambela. Me adisciple asuku na ala.
14 Me Jésus atene: “ALA zia akete molenge ni kpô. ALA kanga lege na ala pëpe ti ga na mbi, teti royaume ti yayu ayeke ti azo so ayeke tongana akete molenge so.”
15 Na Jésus azia maboko ti lo na ndo ti ala. Na pekoni, lo zia ndo ni, lo hon.
16 Bâ, mbeni koli aga nduru na Jésus na lo tene: “Wafango ye, a lingbi mbi sara ye ti nzoni wa ti wara fini ti lakue lakue?”
17 Jésus atene na lo: “Ngbanga ti nyen mo hunda na mbi tënë na ndo ti ye so ayeke nzoni? Gi zo oko si ayeke nzoni. Me, tongana mo ye ti wara fini, ngbâ ti bata acommandement lakue.”
18 Lo hunda Jésus: “Acommandement wa?” Jésus atene: “Mo fâ zo pëpe. Mo gi wali wala koli nde pëpe. Mo nzi ye pëpe. Mo tene mvene na li ti mbeni zo na gbele ngbanga pëpe.
19 Mo ne babâ na mama ti mo. Mo ndoye mba ti mo tongana mo wani.”
20 Maseka-koli ni atene na lo: “Mbi bata aye so kue awe. Nyen la amanke mbi, nyen?”
21 Jésus atene na lo: “Tongana mo ye ti ga zo so alingbi kue, gue mo kä aye ti mo kue na mo mû nginza ni na awayere, na fade mo yeke wara mosoro na yayu; na mo ga mo mû peko ti mbi.”
22 Tongana maseka-koli ni amä tënë so, lo hon na vundu na bê ti lo, ngbanga ti so lo yeke na aye mingi.
23 Jésus atene na adisciple ti lo atene: “Ti tâ tënë ni, mbi tene na ALA: A yeke duti ande ngangu na mbeni zo ti mosoro ti lï na yâ ti royaume ti yayu.
24 Mbi kiri mbi tene na ALA: A yeke ngangu pëpe na mbeni chameau ti lï na yâ ti dû ti suä ahon mbeni zo ti mosoro ti lï na yâ ti royaume ti Nzapa.”
25 Tongana adisciple amä tënë so, li ti ala akpe kue, na ala tene: “Zo wa si alingbi ti wara fini biani?”
26 Jésus abâ yâ ti lê ti ala, na lo tene: “Azo alingbi ti sara ye so pëpe, me Nzapa alingbi ti sara ye kue.”
27 Na pekoni, Pierre ahunda lo, atene: “Bâ, e dö aye ti e kue e zia na e mû peko ti mo. E yeke wara ande nyen biani?”
28 Jésus atene na ala: “Ti tâ tënë ni, mbi tene na ALA: Na ngoi so a yeke kiri ti leke aye kue ti ga fini, tongana Molenge ti zo ayeke duti na ndo ti trône ti lo ti gloire, ALA so amû peko ti mbi, fade ALA nga kue ayeke duti na ndo ti atrône bale-oko na use, na ALA yeke fâ ngbanga ti akete mara bale-oko na use ti Israël.
29 Na zo kue so azia ada ti lo, aita ti lo ti koli, aita ti lo ti wali, babâ ti lo, mama ti lo, amolenge ti lo, na ayaka ti lo ngbanga ti iri ti mbi, fade lo yeke wara fani mingi ahon so, na lo yeke wara ande fini ti lakue lakue.
30 “Me azo mingi so ayeke na li ni, fade ala ga azo ti ndangba ni, na azo so ayeke na ndangba ni ayeke ga azo so ayeke na li ni.
