Matthieu 2:1-23
2 Na peko ti so a dü Jésus na Bethléhem ti Judée na ngoi ti Gbia Hérode, bâ, azo ti gingo nda ti aye na lege ti atongoro alondo na mbage ti Tö aga na Jérusalem.
2 Ala tene: “Lo so a dü lo gbia ti aJuif, lo yeke na ndo wa? Teti na ngoi so e yeke na mbage ti Tö, e bâ tongoro ti lo. Ni la, e ga ti ba li ti e na gbe ti lo.”
3 Tongana Gbia Hérode amä tënë so, li ti lo aga kirikiri, lo na azo ti Jérusalem kue.
4 Lo bungbi aprêtre-mokonzi kue ti kodoro ni nga na ascribe. Lo to nda ti hunda ala ti hinga ndo so a tene a yeke dü Christ dä.
5 Ala tene na lo: “Na Bethléhem ti Judée. Teti tënë so a sû ni na lege ti prophète ni atene:
6 ‘Na mo, Bethléhem ti kodoro ti Juda, biani, mo yeke pëpe gbata so ayeke kete mingi na popo ti amokonzi ti Juda. Teti na yâ ti mo, fade mbeni mokonzi ayeke sigigi, na fade lo yeke fa lege na mara ti mbi, Israël.’ ”
7 Na pekoni, Hérode airi na hondengo ni azo ti gingo nda ti aye na lege ti atongoro. Lo hunda ala ti hinga mbilimbili ngoi so si tongoro ni asigigi.
8 Na tongana lo tokua ala na Bethléhem, lo tene: “ALA gue, ALA gi kete molenge ni nzoni. Tongana ALA wara lo awe, ALA kiri ALA sara tënë ni na mbi, si mbi kue mbi gue mbi ba li ti mbi na gbe ti lo.”
9 Tongana ala mä tënë ti gbia ni awe, ala mû lege ala gue. Na bâ, tongoro so ala bâ lani tongana ala yeke na mbage ti Tö ayeke hon kozo na ala juska a luti na ndo ti ndo so kete molenge ni ayeke dä.
10 Tongana ala bâ tongoro ni, tere ti ala anzere mingi.
11 Na ngoi so ala lï na yâ ti da ni, ala bâ kete molenge ni na Marie, mama ti lo. Ala kuku na likuni ti ala na ala ba li ti ala na gbe ti lo. Ala zi nga aye ti mosoro ti ala, na ala mû amatabisi na kete molenge ni. Ala mû na lo lor, vuru dukani nga na fuku ti mbeni ye so afun pendere so a iri ni myrrhe.
12 Me, teti so Nzapa agboto mê ti ala na yâ ti bango li ti kiri na mbage ti Hérode pëpe, ala mû mbeni lege nde, ala kiri na kodoro ti ala.
13 Na peko ti so ala hon awe, bâ, ange ti Jéhovah aga na Joseph na yâ ti bango li, na lo tene: “Londo, mo mû kete molenge ni na mama ti lo kue na mo kpe na Égypte. Ngbâ kâ juska mbi mû na mo yanga si, ngbanga ti so Hérode aye fadeso ti gi kete molenge ni ti fâ lo.”
14 Tongaso lo londo na bï ni, lo mû kete molenge ni nga na mama ti lo kue, na lo gue na Égypte.
15 Lo ngbâ kâ juska Hérode akui. Ye ni asi tongaso si tënë so Jéhovah atene na lege ti prophète ti lo aga tâ tënë, tongana lo tene: “Mbi iri molenge ti mbi ti sigigi na Égypte.”
16 Tongana Hérode abâ so azo ti gingo nda ti aye na lege ti atongoro ni ahanda lo, lo sara ngonzo ngangu mingi. Lo tokua azo ti fâ amolenge ti koli kue na Bethléhem nga na ando so kue ayeke na tere ni. Ala fâ amolenge so ngu ti ala alondo na ngu use ti kiri na gbe ni. Ala fâ amolenge ti ngu ni so, a lingbi na ngoi so tongoro ni asigigi na ni, so azo ti gingo nda ti aye na lege ti atongoro afa na Hérode.
17 A yeke tongaso si tënë so a fa na lege ti prophète Jérémie aga tâ tënë, tongana a tene:
18 “A mä mbeni go na Rama, toto na demango tere mingi na kongo; a yeke Rachel si ayeke toto amolenge ti lo, na lo ye si a dë bê ti lo pëpe teti so amolenge ni ayeke dä mbeni pëpe.”
19 Tongana Hérode akui awe, bâ, ange ti Jéhovah aga na Joseph na yâ ti bango li na Égypte.
20 Lo tene: “Londo, mo mû kete molenge ni na mama ti lo kue na mo kiri na sese ti Israël, teti azo so ayeke gi fade âme ti kete molenge ni, ala kui awe.”
21 Tongaso lo londo, lo mû kete molenge ni na mama ti lo kue, na lo kiri na sese ti Israël.
22 Me tongana Joseph amä so Archélaüs ayeke gbia ti Judée na place ti babâ ti lo Hérode, mbeto asara lo ti gue kâ. Nga, teti so Nzapa awa lo na yâ ti mbeni bango li, lo gue na sese ti Galilée.
23 Lo gue lo sara kodoro na gbata so a iri ni Nazareth, tongaso si tënë so a tene na lege ti aprophète aga tâ tënë, tongana a tene: “Fade a yeke iri lo zo ti Nazareth.”
