Matthieu 24:1-51
24 Tongana Jésus asigigi na yâ ti temple na lo yeke hon, adisciple ti lo aga na tere ti lo ti fa na lo ada ti temple ni.
2 Lo kiri tënë na ala, lo tene: “ALA bâ aye so kue? Ti tâ tënë ni, mbi tene na ALA: Tênë oko ayeke ngbâ ande ge na ndo ti mbeni pëpe. A yeke tuku ni ande kue na sese.”
3 Tongana lo yeke duti na ndo ti Hoto ti akeke ti olive, adisciple aga na tere ti lo na ngoi so lo yeke gi lo oko. Ala hunda ndo atene: “Tene na e: Lawa si aye so ayeke si ande? Na fade fä ti ngoi so mo yeke si na mo yeke duti dä nga ti ngoi so aye ti ngoi so ayeke gue ti hunzi ayeke nyen?”
4 Jésus akiri tënë na ala, lo tene: “ALA sara hange si mbeni zo ahanda ALA pëpe,
5 teti azo mingi ayeke ga na iri ti mbi, ala yeke tene: ‘Mbi si mbi yeke Christ ni,’ na fade ala yeke handa azo mingi.
6 ALA yeke mä ande tënë ti abira so atï nduru na ALA wala abira so atï yongoro na ALA. ALA zia si mbeto ni ahon ndo ti ALA pëpe, teti a lingbi aye so asi, me ade nda ni asi pëpe.
7 “Teti fade mara ayeke londo na bira na tere ti mbeni mara, na royaume ayeke londo na bira na tere ti mbeni royaume. Fade kota nzara ayeke tï nga sese ayeke yengi, na aye so ayeke si na ando nde nde na peko ti tere.
8 Aye so kue ayeke tongo nda ti aye ti vundu so akpa songo yâ so agbu wali so aye ti dü.
9 “Fade azo ayeke zia ALA na maboko ti ambeni zo ti sara pasi na ALA na a yeke fâ ALA. Fade ALA yeke ga azo so amara kue ake ALA ndali ti iri ti mbi.
10 Fade azo mingi ayeke zia lege ti mabe, ala yeke kä amba ti ala na popo ti ala nga fade ala ke tere na popo ti ala.
11 Fade aprophète ti wataka mingi ayeke londo, na ala yeke handa azo mingi,
12 na teti so kpengo ndia pëpe ayeke wu mingi, fade ndoye ti mingi ti azo ni ayeke dë.
13 Me zo so agbu ngangu juska na nda ni, lo si a yeke sö lo ande.
14 A yeke fa ande nzoni tënë ti royaume so na ndo ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.
15 “Tongana ALA bâ ye ti saleté so asara si ye kue abuba aduti na ndo so ayeke nzoni-kue, ye ti saleté so a fa tënë ni na lege ti prophète Daniel (zia zo so ayeke diko tënë ni abâ nda ni nzoni),
16 na ngoi ni so, zia ala so ayeke na Judée alondo akpe na li ti ahoto.
17 Zia zo so ayeke na li ti da azu na sese pëpe ti mû akungba so ayeke na yâ ti da ti lo ti hon na ni.
18 Nga, zia zo so ayeke na yaka akiri na yanga-da ti mû bongo ti lo ti ndo ni pëpe.
19 Mawa na awali so ayeke na ngo, nga na ala so angbâ ti mû me na molenge na alango ni so!
20 ALA ngbâ ti sambela si lango ti kpengo ti ALA ni asi pëpe na ngoi so dê ayeke mingi wala na lâ ti sabbat pëpe.
21 Teti na ngoi ni so, fade mbeni kota ye ti vundu ayeke si, ye ti vundu so mara ni ade ti si lâ oko pëpe ngbene ye so dunia abâ gigi juska fadeso, na mara ni ayeke kiri ti si ande mbeni pëpe.
22 Biani, tongana fade a kiri na alango ni so nduru pëpe, ka mitele oko ayeke sö kuâ pëpe. Me ndali ti azo so a soro ala, fade a yeke kiri na alango ni so nduru.
23 “Na tongana mbeni zo atene na ALA: ‘Bâ, Christ la ge so,’ wala ‘Bâ, lo la kâ so!’ ALA mä na bê na tënë ni so pëpe.
24 Teti aChrist ti wataka nga na aprophète ti wataka ayeke londo na ala yeke sara ande akota fä nga na aye ti dongo bê si, tongana lege ayeke dä, ala handa même azo so a soro ala.
25 Bâ, mbi gboto mê ti ALA kozoni awe.
26 Tongaso, tongana azo atene na ALA: ‘Bâ, lo yeke na yando,’ ALA gue kâ pëpe. Wala tongana azo ni atene: ‘Bâ, lo yeke kâ na yâ ti da,’ ALA mä na bê na tënë ni so pëpe.
27 Teti legeoko tongana wâ ti bekpa alondo na mbage ti Tö na aza juska na mbage ti Do, ngoi so Molenge ti zo ayeke si na lo yeke duti dä ayeke duti ande nga tongaso.
28 Teti na ndo so kuâ ayeke dä, fade angualo ayeke bungbi tere na ndo ni so.
29 “Hio na peko ti kota ye ti vundu ti alango ni so, fade lâ ayeke vuko, na nze ayeke su pëpe, na atongoro ayeke londo ande na nduzu ti tï, na angangu ti yayu ayeke yengi ande.
30 Na pekoni, fade fä ti Molenge ti zo ayeke sigigi na yayu, na akete mara kue ti sese ayeke pika tere ti ala ti fa so ala yeke na vundu. Ala yeke bâ ande Molenge ti zo so ayeke ga na ndo ti ambinda ti yayu, na ngangu nga na kota gloire.
31 Na kota totongo ti trompette, fade lo yeke tokua a-ange ti lo, si ti londo na apupu osio, nga na mbeni mbage ti yayu ti si na mbeni mbage ni, ala yeke bungbi na ndo oko azo ti lo so a soro ala.
32 “Fadeso, zia ALA manda ye so na ndo ti tapande ti keke ti figue: Gi na ngoi so akete maboko ni ato nda ti sigigi na afini kugbe ni nga asigigi, ALA hinga so ngoi ti maïngo ti akobe ti yaka aga nduru awe.
33 Legeoko nga, tongana ALA bâ aye so kue, zia ALA hinga so lo si nduru awe, lo yeke na yanga-da.
34 Ti tâ tënë ni, mbi tene na ALA: Azo ti ngoi ni so ayeke hon pëpe juska aye so kue asi awe si.
35 Fade yayu na sese ayeke hon, me atënë ti mbi ayeke hon oko pëpe.
36 “Na ndo ti tënë ti lango ni so nga na ngbonga ni so, zo oko ahinga ni pëpe, atâa a-ange so ayeke na yayu, wala Molenge ni ahinga ni pëpe, me gi Babâ ni.
37 Legeoko tongana ti so a si lani na ngoi ti Noé, ye ni ayeke duti ande tongaso nga na ngoi so Molenge ti zo ayeke si na lo yeke duti dä.
38 Na ngoi ni so, kozo si kota ngu apika, azo asara lani ye tongaso: Ala yeke te, ala yeke nyon, akoli ayeke sara mariage, awali nga ayeke sara mariage juska ti si na lango ni so Noé alï na yâ ti arche.
39 Ala gbu li lani na ndo ti ye so ayeke si so pëpe juska kota ngu apika na ahon na ala kue. Ye ni ayeke duti ande tongaso nga na ngoi so Molenge ti zo ayeke si na lo yeke duti dä.
40 Na lâ ni so, akoli use ayeke duti na yaka: fade a yeke mû oko a hon na lo, na a dö oko ni a zia.
41 Awali use ayeke neka ye na tênë ti nekango na ye: fade a yeke mû oko a hon na lo, na a dö oko ni a zia.
42 Ni la, ALA lango pëpe, ngbanga ti so ALA hinga pëpe lango so Seigneur ti ALA ayeke ga na ni.
43 “Me zia ALA hinga mbeni ye oko: Tongana wa ti da ahinga ngbonga ti bï so zo ti nzi ayeke ga na ni, ka lo lango pëpe na lo zia lege pëpe ti tene a kungbi yanga-da ti lo.
44 Na ndo ti tënë so, ALA nga, ALA leke tere ti ALA, ngbanga ti so a yeke na mbeni ngbonga so ALA bi bê ti ALA na ni pëpe si Molenge ti zo ayeke ga.
45 “Zo wa mbilimbili si ayeke ngbâa be-ta-zo so ayeke sara ye na ndara? Lo so wa ti lo azia lo na ndo ti azo ti kua ti lo ti mû na ala kobe ti ala na ngoi ni so alingbi?
46 Ngia ayeke na ngbâa so tongana wa ti lo aga na awara lo na sarango tongaso!
47 Ti tâ tënë ni, mbi tene na ALA: Fade wa ti lo ni ayeke zia lo na ndo ti akungba ti lo kue.
48 “Me tongana a si so sioni ngbâa so atene na bê ti lo: ‘Wa ti mbi ayeke si fade fadeso pëpe,’
49 na lo to nda ti pika amba ti lo angbâa ni na ti te ye nga ti nyon ye na akota ngbâa ti sämba,
50 wa ti ngbâa so ayeke ga ande na mbeni lango so ngbâa so aku ni pëpe nga na mbeni ngbonga so lo hinga ni pëpe,
51 fade wa ti lo ni ayeke se lo tâ ngangu mingi na lo yeke zia lo na popo ti awahandango lê ti zo. Kâ la si fade lo yeke toto na lo yeke te pembe ti lo.
