Matthieu 28:1-20
28 Na peko ti lâ ti sabbat, na kozo lango ti yenga ni, tongana ndo ayeke han, Marie ti Magdala na mbeni Marie ni aga ti bâ dû ti kuâ ni.
2 Bâ, sese ayengi fade ngangu, ngbanga ti so ange ti Jéhovah alondo na yayu aga, lo gue lo pusu fade kota tênë ni na lo yeke duti na ndo ni.
3 Tere ti lo aza zango tongana wâ ti bekpa, na bongo ti lo avuru mingi.
4 Mbeto ti lo ahon ndo ti azo so ayeke bata dû ti kuâ ni, tere ti ala adö na ala ga tongana akuâ.
5 Me ange ni atene na awali so: “ALA sara mbeto pëpe. Mbi hinga so ALA yeke gi Jésus, lo so a kanga lo na ndo ti keke.
6 Lo yeke ge pëpe, teti a zingo lo na kuâ awe, tongana ti so lo tene lani. ALA ga, ALA bâ ndo so a zia lo fade dä.
7 ALA gue hio atene na adisciple ti lo so a zingo lo na kuâ awe. Nga ALA tene na adisciple ni: ‘Bâ, lo yeke gue kozo ti ALA na Galilée, na kâ si fade ALA yeke bâ lo. Bâ, gi tënë ni la mbi tene na ALA awe so.’ ”
8 Tongaso, ala zia sende ti kuâ ni hio, na mbeto nga na kota ngia na bê, ala kpe ti gue ti sara tënë ni na adisciple ti lo.
9 Mo ye ti bâ, Jésus atingbi na ala, na lo tene: “Bara ALA!” Tongaso, ala ga nduru na tere ti lo, ala gbu gere ti lo na ala ba li ti ala na gbe ti lo.
10 Jésus atene na ala: “ALA sara mbeto oko pëpe! ALA gue, ALA tene na aita ti mbi so ala lingbi ti gue na Galilée, na a yeke kâ si ala yeke bâ mbi ande.”
11 Na ngoi so ala yeke mû lege ti hon, bâ, ambeni na popo ti aturugu ni alï na yâ ti gbata ni na ala fa peko ti ye so kue asi na aprêtre-mokonzi.
12 Na peko ti so aprêtre-mokonzi abungbi tere legeoko na a-ancien na ala mä tere, ala mû gbâ ti alê ti nginza ti argent na aturugu ni,
13 na ala tene: “ALA gue atene: ‘Adisciple ti lo aga na bï na anzi kuâ ni na ngoi so e ngbâ na lango.’
14 Me tongana tënë ni atï na mê ti gouverneur ni, fade e yeke dë bê ti lo na e yeke sara ti tene ALA wara tënë pëpe.”
15 Tongaso aturugu ni amû alê ti nginza ni na ala sara gi tongana ti so a fa na ala. Na tënë ni amû ndo na popo ti aJuif juska laso.
16 Me, adisciple bale-oko na oko ague na Galilée na ndo ti hoto so Jésus afa ni ti tene ala gue awara lo dä.
17 Tongana ala bâ lo, ala ba li ti ala na gbe ti lo, me ambeni adë kite.
18 Jésus aga nduru na ala, lo sara tënë na ala, lo tene: “A mû na mbi komandema kue na yayu nga na sese.
19 Tongaso ALA gue, ALA sara si azo na popo ti amara kue aga adisciple. ALA batize ala na iri ti Babâ, na ti Molenge na ti yingo vulu.
20 ALA fa na ala ti bata aye kue so mbi mû yanga na ALA ti sara. Bâ, mbi yeke na tere ti ALA juska na lâ ni so aye ti ngoi so ayeke gue ti hunzi.”
