Matthieu 6:1-34
6 “ALA sara hange si ALA sara kusala ti ALA ti mbilimbili na lê ti azo pëpe ti tene azo abâ ALA. Tongaso pëpe, fade Babâ ti ALA so ayeke na yayu ayeke mû na ALA futa oko pëpe.
2 Ni la, tongana mo yeke gue ti mû amatabisi na azo ti mawa, mo huru trompette na gbele mo pëpe, tongana ti so awahandango lê ti zo ayeke sara ni na yâ ti asynagogue nga na ndo ti alege ti tene azo agonda ala. Ti tâ tënë ni, mbi tene na ALA: Azo ni so awara futa ti ala kue awe.
3 Me ti mo, tongana mo yeke mû amatabisi na azo ti mawa, zia si maboko ti mo ti wali ahinga pëpe ye so maboko ti mo ti koli ayeke sara,
4 tongaso si amatabisi ti mo ni alingbi ti ngbâ na hondengo ni. Na fade Babâ ti mo, so ayeke bâ ye na ndo so ahonde, ayeke futa mo.
5 “Nga, tongana ALA yeke sambela, a lingbi ALA sambela pëpe tongana ti awahandango lê ti zo. Teti azo ni so aye ti luti ti sambela na yâ ti asynagogue nga na ando so akota lege atingbi tere dä ti tene azo abâ ala. Ti tâ tënë ni, mbi tene na ALA: Azo ni so awara futa ti ala kue awe.
6 Me mo, tongana mo yeke sambela, mo lï na yâ ti kubu ti mo na mo kanga yanga-da na peko ti mo. Mo sambela Babâ ti mo so ayeke na ndo so ahonde, na fade Babâ ti mo so abâ ye na ndo so ahonde ayeke futa mo.
7 Me tongana mo yeke sambela, mo kiri gi na ndo ti tënë oko fani mingi pëpe. Azo ti amara ayeke sara tongaso, ngbanga ti so ala bâ ti ala atene na sarango tënë mingi si fade Nzapa ayeke mä ala.
8 Ni la, ALA sara ye tongana ti azo so pëpe, teti Nzapa, Babâ ti ALA, ahinga aye so ALA yeke na bezoin ni kozoni si ALA hunda ni na lo.
9 “A lingbi ALA sambela tongaso:
“ ‘Babâ ti e so mo yeke na yayu, zia a sara si iri ti mo aga nzoni-kue.
10 Zia royaume ti mo aga. Zia a sara ye so bê ti mo aye, na yayu legeoko nga na ndo ti sese.
11 Laso mû na e kobe* ti e ti lango ni.
12 Mo pardone akuda so ayeke na li ti e tongana ti so e nga e pardone ti azo so kuda ti e ayeke na li ti ala.
13 Na mo gue na e na yâ ti tara pëpe, me mo zi e na maboko ti Zo ti sioni.’
14 “Teti tongana ALA pardone afaute ti azo, fade Babâ ti ALA so ayeke na yayu ayeke pardone ALA nga.
15 Me tongana ALA pardone afaute ti azo pëpe, Babâ ti ALA ayeke pardone ande afaute ti ALA nga pëpe.
16 “Tongana ALA yeke mû jeûne, ALA zia ti fa so lê ti ALA ayeke na vundu tongana ti awahandango lê ti zo, ngbanga ti so azo ni so asara si lê ti ala ayeke na vundu ti tene azo alingbi ti bâ so ala yeke mû jeûne. Ti tâ tënë ni, mbi tene na ALA: Azo ni so awara futa ti ala kue awe.
17 Me mo, tongana mo yeke mû jeûne, mo sara mafuta na li ti mo na mo sukula lê ti mo.
18 Tongaso si a lingbi ti bâ so mo yeke mû jeûne, ndali ti lê ti azo pëpe, me ndali ti Babâ ti mo so ayeke na ndo so ahonde. Na fade Babâ ti mo so ayeke bâ ye na ndo so ahonde ayeke futa mo.
19 “Zia ti bungbi amosoro ndali ti mo wani na ndo ti sese so, ndo so makongo ti tengo bongo na soko ayeke te ni, na so azo ti nzi ayeke lï na ngangu ti nzi ni.
20 Me, mo bungbi amosoro ndali ti mo wani na yayu, ndo so makongo ti tengo bongo wala soko ayeke te ni pëpe, nga azo ti nzi ayeke lï na ngangu ti nzi ni pëpe.
21 Teti ndo so mosoro ti mo ayeke dä, bê ti mo ayeke nga dä.
22 “Lampe ti tere ti zo ayeke lê. Tongana lê ti mo abâ ye nzoni, fade tere ti mo kue ayeke za.
23 Me tongana lê ti mo ayeke sioni, fade tere ti mo kue ayeke bingo. Biani, tongana lumière so ayeke na yâ ti mo ayeke gi bingo, bingo ni so ayeke kota mingi!
24 “Mbeni zo alingbi ti duti ngbâa ti azo use pëpe. Teti fade lo ke mbeni oko na lo ndoye mbeni. Wala lo yeke ngbâ na mbeni oko na lo ke mbeni. ALA lingbi ti duti ngbâa ti Nzapa nga na ti Mosoro pëpe.
25 “Na ndo ti tënë so, mbi tene na ALA: ALA zia ti gi bê ti ALA na ndo ti âme ti ALA, wala ALA yeke te nyen, wala ALA yeke nyon nyen. Nga, ALA zia ti gi bê ti ALA na ndo ti tere ti ALA, wala ALA yeke yü bongo ti nyen. Âme ayeke kota mingi ahon kobe pëpe? Na tere ayeke kota mingi ahon bongo pëpe?
26 ALA bâ andeke ti nduzu nzoni. Ala yeke lu ye wala ala yeke ko ye wala ala yeke bata ye na gogoro pëpe. Atâa so kue, Babâ ti ALA so ayeke na yayu ayeke bata andeke so. Ngere ti ALA ahon ngere ti andeke so pëpe?
27 Zo wa na popo ti ALA, tongana lo ngbâ ti gi bê ti lo, lo lingbi ti zia mbeni kete lango* na ndo ti fini ti lo?
28 Na ndo ti tënë ti bongo, ngbanga ti nyen ALA yeke gi bê ti ALA? ALA bâ akongo ti ngonda mbilimbili, ALA bâ mbilimbili tongana nyen akongo so ayeke kono. Ala yeke sara ngangu kua pëpe wala ala yeke pe kamba ti sara na bongo nga pëpe.
29 Atâa so kue, mbi tene na ALA so même Salomon na yâ ti gloire ti lo kue ayü bongo tongana mbeni oko ti akongo so pëpe.
30 So Nzapa si ayeke yü bongo na apere ti ngonda, apere so ayeke gi laso na kekereke a bi ni na four, fade a yeke nzere mingi na lo ti yü bongo na ALA pëpe? ALA, azo ti kete mabe.
31 Ni la, ALA gi bê ti ALA lâ oko pëpe, ti tene: ‘E yeke te ande nyen?’ wala ‘E yeke nyon ande nyen?’ wala ‘E yeke yü ande nyen?’
32 Aye so kue, a yeke aye so amara ayeke gi ni gingo na bê ti ala kue. Me Babâ ti ALA so ayeke na yayu ahinga so ALA yeke na bezoin ti aye so kue.
33 “Ni la, ALA ngbâ ti gi royaume ti Nzapa na mbilimbili ti lo kozoni, na fade a yeke zia na ALA aye so kue na ndo ni.
34 Tongaso, ALA gi bê ti ALA lâ oko pëpe ngbanga ti kekereke, teti fade kekereke ayeke na agingo bê ti lo wani. Akpale ti lango oko oko alingbi na lango ni.
