Tite 3:1-15
3 Mo ngbâ ti dabe ti ala ti woko tere na gbe ti angorogbia nga na akomandema, ti mä yanga ti ala, ti duti nduru ti sara anzoni kusala kue,
2 ti sara sioni tënë ti mbeni zo pëpe, ti duti pëpe azo so aye tiri, ti sara ye na lege ni, ti fa so ala yeke sara ye biani na ngangu pëpe na azo kue.
3 Teti e nga e yeke ândö azo so asara ye ti buba, azo ti kengo yanga, e yeke azo so azo ahanda ala, e yeke ândö angbâa ti anzara nde nde ti bê nga na ti angia nde nde, e yeke sara ândö sioni nga e sara kota bê, azo ake e na bê oko nga e ke tere na popo ti e.
4 Ye oko, tongana sarango nzoni nga na ndoye ti Sauveur ti e Nzapa na mbage ti azo asigigi polele,
5 a yeke lani pëpe ndali ti akusala ti ye ti mbilimbili so e sara, me a yeke ndali ti nzoni bê so lo sara ni si lo sö e na lege ti sukulango so a sukula e si e wara mbeni fini nga na lege so a sara si e ga afini zo na lege ti yingo vulu.
6 Lo tuku yingo vulu ni so mingi mingi na ndo ti e na lege ti Jésus Christ Sauveur ti e,
7 si, na peko ti so a diko e tongana azo ti mbilimbili na lege ti kota nzobe ti lo awe, e lingbi ti ga ahéritier alingbi na beku ti fini ti lakue lakue.
8 Tënë so, zo alingbi ti zia bê ti lo na ndo ni, na mbi ye si mo ngbâ ti luti na ndo ti aye so ngangu, si ala so amä na bê na Nzapa azia bê ti ala ti sara lakue akusala so ayeke nzoni mingi. Aye so ayeke nzoni mingi na ayeke sara nzoni na azo.
9 Me mo ke ahundango ndo ti buba, mo ke dikongo molongo ti iri ti akotara, nga mo ke apapa na atiri na ndo ti tënë ti Ndia, teti a yeke aye so zo alingbi ti wara nzoni dä pëpe nga ayeke asenge ye.
10 Âdu ti zo so ayeke maï tënë ti secte, tongana mo gboto mê ti lo fani oko nga fani use awe, sara songo na lo mbeni pëpe;
11 hinga mo tene mara ti zo tongaso adö nzoni lege ni lo zia awe na lo yeke sara siokpari la; lo fâ ngbanga na li ti lo wani awe.
12 Tongana mbi tokua Artémas wala Tychique ande na mo, sara kue mo ga mo wara mbi na Nicopolis, teti a yeke na ndo so si mbi leke na bê ti mbi ti duti dä na ngoi ti dê.
13 Ti Zénas, zo so ahinga Ndia mingi, mo bâ lege ti lo nga na Apollos nzoni teti tambela ti ala, si mbeni ye amanke ala pëpe.
14 Me zia azo ti e nga ahinga ti ngbâ ti sara anzoni kusala, tongaso si ala wara ye so amanke ala biani; na sarango tongaso, ala yeke duti pëpe azo so alë lengo pëpe.
15 Ala kue so ayeke na tere ti mbi atokua bara na mo. Mo tene bara ti mbi na ala so na yâ ti mabe aye e mingi.
Zia kota nzobe ti Nzapa aduti na ALA kue.
