Ésaïe 4:1-6
4 Na lango ni so, awali mbasambala ayeke gbu koli oko,+ na ala tene:
“Kobe ti e wani la e yeke tenga bongo ti e wani la e yeke yü;me e ye gï ti tene iri ti mo aduti na ndö ti eti zi kamene na lê ti e.”*+
2 Na lango ni so, kete keke so Jéhovah asara si asigi ayeke ga pendere nga ayeke duti na gloire, nga lengo ti kobe ti kodro ni ayeke duti ye ti pendere nga ye ti pikango kate ndali ti azo ti Israël so asö kuâ.+
3 Zo kue so angbâ na Sion nga na lo so a zia lo lo ngbâ na Jérusalem, a yeke iri lo zo so ayeke nzoni-kue, même azo ti Jérusalem kue so a sû iri ti ala na mbeti ti ngbâ na fini.+
4 Jéhovah ayeke tuku ngonzo ti lo so ayeke tongana wâ na ndö ti Jérusalem nga lo yeke fâ ngbanga na ndö ti lo. A yeke tongaso la lo yeke sukula saleté* ti amolenge-wali ti Sion+ nga lo yeke sukula Jérusalem ti zi na yâ ti lo tënë ti tukungo mênë.+
5 Jéhovah ayeke sara nga si na kota lâ mbeni mbinda na guru aduti na ndö ti Hoto ti Sion kue nga na ando so a yeke sara akota bungbi dä. Na bï, mbeni wâ so aza lumière la ayeke duti dä.+ Mbeni kpangba la ayeke duti ande na ndö ti aye ti gloire ni so kue.
6 Mbeni kpangba ayeke duti dä ti mû gbe ti dê na zo ndali ti ndowa na kota lâ,+ nga a yeke duti ndo so zo alingbi ti kpe dä ti bata terê ti lo ndali ti kota pupu nga na ngu-nzapa.+
Akete tënë na terê ni
^ So ti tene kamene so asara ala ndali ti so ala mû koli pëpe nga ala dü molenge pëpe.
^ Na Hébreu: “puru.”
