1 aGbia 3:1-28
3 Salomon alë songo na Pharaon, gbia ti Égypte, na lege ti mariage. Lo sara mariage na* molenge ti Pharaon.+ Lo ga na wali ni na yâ ti Gbata ti David+ ti tene lo ngbâ kâ juska lo hunzi ti leke da ti lo wani+ na ti Jéhovah+ nga lo sara gbagba na terê ti gbata ti Jérusalem awe si.+
2 Me azo ti kodro ni angbâ ti mû asandaga na ando so ayeke na nduzu,+ ndali ti so juska na ngoi ni so ade a leke mbeni da ndali ti iri ti Jéhovah pëpe.+
3 Salomon angbâ ti fa so lo ye Jéhovah na lege so lo yeke sara ye alingbi na andia ti babâ ti lo David; ye oko, ti lo, lo yeke yâa asandaga nga lo yeke zö asandaga na ando so ayeke na nduzu.+
4 Gbia ague na Gabaon ti mû asandaga kâ, ndali ti so kâ la a yeke wara kota ndo so ayeke na nduzu.+ Salomon amû anyama 1 000, lo yâa na sandaga so a zö ni agbi kue na ndö ti gbalaka so ayeke kâ.+
5 Jéhovah asi na Salomon na yâ ti bango li na bï na gbata ti Gabaon. Nzapa ahunda lo, atene: “Nyen la mo ye ti tene mbi mû na mo?”+
6 Salomon atene: “Mo fa tâ ndoye mingi na wakua ti mo babâ ti mbi David so aduti be-ta-zo na mo, so asara ye na lege ni nga bê ti lo ayeke mbilimbili. Juska laso mo ngbâ ti fa tâ ndoye ni so na lo na lege so mo mû na lo molenge ti tene lo duti na ndö ti trône ti lo.+
7 Ti fadeso, Jéhovah Nzapa ti mbi, mo zia mbi, wakua ti mo, gbia na peko ti babâ ti mbi David, atâa so mbi de maseka* nga mbi hinga ndo mingi pëpe.*+
8 Mbi wakua ti mo mbi yeke na popo ti azo ti mo so mo soro ala;+ ala yeke mingi na zo alingbi ti diko wungo ti ala pëpe.
9 Tongaso, mû na mbi wakua ti mo mbeni bê so alingbi ti pusu mbi ti mä yanga ti mo, si mbi fâ ngbanga ti azo ti mo+ nga si mbi hinga ti zia kangbi na popo ti ye ti nzoni na ti sioni.+ So azo ti mo ayeke mingi so,* zo wa la alingbi ti fâ ngbanga ti ala zo wa?”
10 Ye so Salomon ahunda so anzere na Jéhovah mingi.+
11 Nzapa atene na lo: “So mo hunda ti wara ndara si mo fâ yâ ti ngbanga nzoni, na mo hunda pëpe ti duti na fini aninga,* wala ti wara mosoro wala ti tene mbi fâ awato ti mo,*+
12 mbi yeke mû na mo ye so mo hunda so.+ Mbi yeke mû na mo bê so ayeke na ndara,+ tongaso si mbeni zo ti duti na ndara tongana mo ayeke dä pëpe, atâa kozo na mo wala na peko ti mo.+
13 Mbi yeke mû nga na mo ye so mo hunda ape so:+ amosoro nga na gloire,+ tongaso si na ngoi kue so mo yeke na fini* mbeni gbia tongana mo ayeke dä pëpe.+
14 Nga, tongana mo sara ye alingbi na aye so mbi hunda, na lege so mo ngbâ ti bata andia ti mbi so ayeke fa lege na zo nga na acommandement ti mbi, tongana ti so babâ ti mo David asara lani,+ mbi yeke sara nga si mo duti na fini aninga.”*+
15 Tongana Salomon azingo, lo ga ti bâ so a yeke fade bango li la. Na pekoni lo gue na Jérusalem, lo luti na gbele sanduku ti mbele ti Jéhovah, lo yâa asandaga so a zö ni agbi kue, lo yâa asandaga ti beoko+ nga lo sara kota matanga na awakua ti lo kue.
16 Mbeni lâ, awali-ndumba use aga na ndo ti gbia, ala luti na devant ti lo.
17 Mbeni wali ni atene: “Pardon, seigneur ti mbi, mbi na wali so e lango na yâ ti da oko. Na ngoi so lo yeke na yâ ti da ni, mbi dü molenge-koli.
18 Lango ota na pekoni wali so nga kue adü molenge-koli. Gï e use la e yeke na yâ ti da ni, mbeni zo nde ayeke dä pëpe.
19 Na bï, molenge ti lo ni akui ndali ti so lo lango na ndö ti lo.
20 Na ngoi so mbi, ngbâa ti mo, mbi yeke lango, lo londo na bê ti bï, lo mû molenge ti mbi na terê ti mbi lo zia na kate ti lo, na lo mû molenge ti lo ni so akui awe so lo zia na kate ti mbi.
21 Tongana mbi zingo na ndapre ti mû me na molenge ti mbi, mbi bâ so molenge ni akui awe. Na ndapre ni, mbi bâ lo ngbii na mbi bâ so a yeke molenge so mbi dü so la pëpe.”
22 Me mba ti lo ni atene: “Mvene! Molenge ti mbi la angbâ na fini so, me molenge ti mo la akui so!” Me kozo wali ni atene: “Mvene! Molenge ti mo la akui so, me ti mbi la angbâ na fini so.” A yeke tongaso la ala yeke papa na devant ti gbia.
23 Gbia amä ala ngbii na lo tene: “Lo so atene: ‘Ti mbi molenge ni la angbâ na fini so, me ti mo la akui so!’ na mbeni atene: ‘Mvene, ti mo molenge ni la akui so, me ti mbi la angbâ na fini so!’”
24 Gbia atene: “Ala ga na mbi épée.” Tongaso, a ga na épée na gbia.
25 Gbia akiri atene: “Mû molenge so angbâ na fini so mo fâ yâ ti lo use, mo mû ndambo ni na mbeni wali ni na mo mû tanga ti ndambo ni na mbeni wali ni.”
26 Mawa agbu wali so molenge ti lo angbâ na fini so, na hio lo voro yanga na gbia, lo tene: “Pardon, seigneur ti mbi, mû molenge ni na lo! Fâ lo ape!” Me mba ti lo ni atene: “Fâ yâ ti molenge ni use, tongaso molenge ni ayeke duti ti mbi pëpe na lo yeke duti nga ti mo pëpe!”
27 Na mango tënë so, gbia atene: “Mû molenge ni na kozo wali ni! Fâ lo pëpe, ndali ti so lo la lo yeke mama ti molenge ni.”
28 Azo ti Israël kue amä tënë ti ngbanga so gbia afâ so, na li ti ala akpe kue na terê ti gbia*+ ndali ti so ala bâ ndara so Nzapa amû na lo ti tene lo fâ yâ ti ngbanga mbilimbili.+
Akete tënë na terê ni
^ Wala “Lo mû.”
^ Wala “kete molenge.”
^ Na Hébreu: “mbi hinga lege ti sigi wala ti kiri pëpe.”
^ A lingbi nga ti tene “li ti ala akpengba mingi so.” Na Hébreu: “ane.”
^ Na Hébreu: “alango mingi.”
^ Wala “mo hunda âme ti awato ti mo pëpe.”
^ Na Hébreu: “na yâ ti alango ti mo kue.”
^ Na Hébreu: “mbi yeke gboto yâ ti alango ti mo.”
^ Na Hébreu: “mbeto ti gbia asara ala.”
