1 Chronique 18:1-17
18 Mbeni ngoi na pekoni, David asö benda na ndö ti aPhilistin nga lo komande na ndö ti ala, na lo mû maboko ti ala gbata ti Gath+ na akodro so ayeke na gbe ti Gath.*+
2 David asö benda na ndö ti azo ti Moab,+ na azo ti Moab aga azo ti kua ti lo, nga ala futa na lo impôt so ala doit ti futa.+
3 Na ngoi so Hadadézer,+ gbia ti Zobah+ ayeke gue ti kiri ti mû akodro so ayeke na terê ti Ngu ti Euphrate,+ David asö benda na ndö ti lo nduru na kodro ti Hamath.+
4 David agbu apuse ti mbarata 1 000, aturugu ti kpengo na mbarata 7 000 nga na ala so ayeke tambela na gere 20 000.+ Na pekoni, David afâ kamba ti gere ti ambarata kue so ayeke kpe na puse, me lo bata ambeni 100.+
5 Tongana azo ti kodro ti Syrie aga na gbata ti Damas ti mû maboko na Hadadézer, gbia ti Zobah, David afâ aturugu ti Syrie 22 000.+
6 David azia ambeni turugu ti lo na Damas, so ayeke na Syrie. Azo ti Syrie aga azo ti kua ti David, nga ala futa na lo impôt so ala doit ti futa. Jéhovah asara si David asö benda* na ndo kue so lo gue dä.+
7 Na ndö ni, David amû na maboko ti awakua ti Hadadézer avala so ayeke ronde ronde so a sara na lor, na lo ga na ni na Jérusalem.
8 David ague na Tibhath nga na Kun, agbata ti Hadadézer, lo mû gbâ ti cuivre. Cuivre ni so la Salomon asara na kota tawa,+ apilier nga na akungba ti kua.+
9 Tongana Toü, gbia ti Hamath, amä so David asö benda na ndö ti aturugu ti Hadadézer kue,+ so ayeke gbia ti Zobah,+
10 hio Toü atokua molenge ti lo Hadoram na Gbia David ti hunda lo wala lo yeke senge nga ti gonda lo, ndali ti so David asara bira na Hadadézer na lo sö benda na ndö ti lo (lakue la Hadadézer ayeke sara bira na Toü). Hadoram ague na aye nde nde kue so a sara na lor, argent nga na cuivre na David.
11 Gbia David amû aye ni so, lo zia ni nde ndali ti kua ti Jéhovah.+ Lo sara nga tongaso na argent nga na lor so lo mû lani na maboko ti amara so kue: azo ti Édom, ti Moab, ti Ammon,+ aPhilistin+ nga na azo ti Amalec.+
12 Abishaï,+ molenge ti Zéruïah,+ afâ aturugu ti Édom 18 000 na yâ ti Popo-hoto ti Ingo.+
13 Lo zia aturugu na Édom, na azo ti Édom kue aga azo ti kua ti David.+ Jéhovah asara si David asö benda* na ndo kue so lo gue dä.+
14 David angbâ ti komande na ndö ti Israël kue,+ na lo fâ ngbanga ti azo ti lo kue na lege ti mbilimbili.+
15 Joab, molenge ti Zéruïah, ayeke na ndö ti aturugu.+ Josaphat,+ molenge ti Ahilud, ayeke zo so ayeke bâ lege ti ambeti.
16 Zadoc molenge ti Ahitub nga Ahimélec molenge ti Abiathar ayeke aprêtre. Shavsha ayeke wakuasu.
17 Bénaïah molenge ti Jéhoïada ayeke na ndö ti azo ti mara ti Kérét+ na ti Pélét.+ Amolenge ti David ayeke akota zo so asara kua na terê ti lo.
