1 Chronique 22:1-19
22 Na pekoni, David atene: “Na ndo so la a yeke leke ande da ti Jéhovah, so ayeke tâ Nzapa, nga na gbalaka ti zongo na asandaga ndali ti azo ti Israël.”+
2 David amû nga yanga ti tene a bungbi awande+ so asara kodro na Israël, na lo mû ala ti ga azo ti surungo yâ ti atênë nga ti dë terê ni pendere si a leke na da ti tâ Nzapa.+
3 David abungbi nga gbâ ti wen ti tene a leke na apointe ti pikango na ayanga ti gbagba. Lo mû nga mbeni wen ni ti tene a leke na aye so a yeke sara kua na ni ti gbu na aye use na terê ti mba. Lo bungbi nga gbâ ti cuivre so a hinga nengo ni pëpe.+
4 David abungbi nga gbâ ti keke ti cèdre,+ ndali ti so azo ti kodro ti Sidon+ nga na ti Tyr+ aga na gbâ ti keke ti cèdre na lo.
5 David atene: “Molenge ti mbi Salomon ade maseka nga ade lo hinga ndo mingi pëpe.*+ A lingbi a leke da ti Jéhovah na mbeni lege so ayeke tâ pendere mingi,+ tongaso si sango ni amû yâ ti akodro kue+ nga si azo kue agonda pendere ni.+ Ni la mbi yeke leke na lo aye ti sarango na da ni.” Tongaso, David abungbi gbâ ti akungba ti lekengo na da ni kozoni si lo kui.
6 Na ndö ni, David airi molenge ti lo Salomon, lo fa na lo tongana nyen ti leke da na Jéhovah Nzapa ti Israël.
7 David atene na Salomon: “Ti mbi, mbi ye mingi ti leke mbeni da ndali ti iri ti Jéhovah Nzapa ti mbi.+
8 Me Jéhovah atene na mbi: ‘Mo tuku mênë mingi, nga mo fâ azo mingi na ngoi ti abira. Mo la mo yeke leke da ndali ti iri ti mbi pëpe,+ ndali ti gbâ ti mênë ti azo so mbi bâ mo na tukungo ni.
9 Mo yeke dü ande mbeni molenge+ so ayeke duti zo so aye siriri.* Mbi yeke sara si siriri aduti na popo ti lo na awato ti lo kue so angoro lo.+ Ndani la a yeke zia iri ti lo Salomon,*+ na mbi yeke sara si azo ti Israël aduti na siriri na ngoi ti komandema ti lo.+
10 Lo la lo yeke leke ande da ndali ti iri ti mbi.+ Lo yeke ga ande molenge ti mbi na mbi yeke duti babâ ti lo.+ Mbi yeke sara si komandema ti lo na ndö ti azo ti Israël aluti nzoni lakue.’+
11 “Ti fadeso, molenge ti mbi, zia Jéhovah aduti na mo, nga zia mo leke da ti Jéhovah Nzapa ti mo juska ahunzi nzoni, tâ gï tongana ti so lo tene mo la mo yeke sara ni.+
12 Zia Jéhovah asara si mo sara ye na hange nga tongana zo so ahinga ndo+ na ngoi so lo yeke mû na mo komandema na ndö ti azo ti Israël, tongaso si mo ngbâ ti bata ndia ti Jéhovah Nzapa ti mo.+
13 Tongana mo sara kue ti bata ambela nga na andia+ ti Jéhovah so afa lege na zo, so lo mû na Moïse ti mû na azo ti Israël,+ aye kue so mo sara ayeke ga nzoni. Sara ye na mbeto pëpe, luti tongana koli. Sara mbeto pëpe nga zia si mbeto ahon ndö ti mo pëpe.+
14 Bâ, mbi sara kua ngangu ti bungbi aye ti leke na da ti Jéhovah: talent* ti lor 100 000, talent ti argent 1 000 000 nga na gbâ ti cuivre na wen+ so a hinga nengo ni pëpe. Mbi bungbi gbâ ti keke na atênë,+ me mo yeke zia ande ambeni na ndö ni.
15 Mo yeke na gbâ ti azo ti kua: azo ti surungo yâ ti atênë, azo ti dengo terê ti tênë pendere,+ acharpentier nga na azo so ayeke na akode nde nde kue ti sara na kua.+
16 A lingbi pëpe ti hinga nengo ti lor, argent, cuivre nga na wen so a yeke hunda ti sara na kua ni.+ Londo mo komanse kua ni, na zia Jéhovah aduti na mo.”+
17 Na pekoni, David amû yanga na amokonzi kue ti Israël ti mû maboko na molenge ti lo Salomon, lo tene:
18 “Jéhovah Nzapa ti ala ayeke na ala ape? Lo sara si siriri ayeke na popo ti ala na awato ti ala kue. Lo zia azo so asara kodro ge ândö na maboko ti mbi. Jéhovah na azo ti lo amû kodro ni.
19 Ti fadeso, ala sara kue ti gi Jéhovah Nzapa ti ala+ na bê ti ala kue nga na âme* ti ala kue. Ala komanse ti leke ndo ti duti ti Jéhovah tâ Nzapa,+ si ala ga na sanduku ti mbele ti Jéhovah nga na akungba so a zia ni nde ti sara na kua ti tâ Nzapa+ na yâ ti da so a yeke leke ni ndali ti iri ti Jéhovah.”+
Akete tënë na terê ni
^ Wala “ade lo kpengba pëpe.”
^ Na Hébreu: “wungo terê.”
^ Iri so alondo na mbeni tënë ti yanga ti Hébreu so aye ti tene “Siriri.”
^ Bâ na kete bakari.
