2 Samuel 10:1-19
-
David akinda Ammon na Syrie (1-19)
10 Na pekoni, gbia ti azo ti Ammon+ akui, na molenge ti lo Hanun aga gbia na peko ti lo.+
2 Tongana David amä tënë ni, lo tene: “Mbi yeke fa tâ ndoye na mbage ti Hanun molenge ti Nahash tongana ti so babâ ti lo afa tâ ndoye lani na mbage ti mbi.” Tongaso, David atokua awakua ti lo ti gue ti dë bê ti Hanun na peko ti kuâ ti babâ ti lo. Me na ngoi so awakua ti David asi na kodro ti azo ti Ammon,
3 amokonzi ti azo ti Ammon ahunda seigneur ti ala Hanun, atene: “Mo pensé so David ane babâ ti mo la lo tokua azo ti ga ti dë bê ti mo so? Lo tokua awakua ti lo na mo ti ga ti bâ yâ ti gbata ni, ti bembe ndo nga ti kinda ni la ape?”
4 Tongaso, Hanun agbu awakua ti David, lo kio kuä ti yanga ti ala mbage oko kue+ nga lo suru bongo ti ala juska asi na ngbonda ti ala na lo tomba ala.
5 Tongana a sara tënë ni na David, hio lo tokua azo ti gue ti wara ala, ndali ti so kamene ahon ndö ti ala. Nga Gbia David atene na ala: “Ala ngbâ na Jéricho+ juska kuä ti yanga ti ala asigi si ala kiri.”
6 A si na mbeni ngoi, azo ti Ammon ahinga so ala ga tongana mbeni ye so afun sioni na hôn ti David. Tongaso azo ti Ammon afuta azo ti Syrie so alango na Beth-Réhob+ nga na ala so alango na Zobah+ ti ga ti sara bira na terê ti ala, aturugu 20 000 so ayeke tambela na gere. Ti gbia ti kodro ti Maacah,+ a yeke aturugu 1000. Ti kodro ti Ishtob,* a yeke aturugu 12 000.+
7 Tongana David amä tënë ni, lo tokua Joab na aturugu ti lo kue, so na popo ni a yeke wara angangu zo ti lo ti bira.+
8 Aturugu ti azo ti Ammon ague aduti na ndo so azo ayeke hon ka dä ti lï na yâ ti gbagba ti gbata ti ala, na ala leke terê ti ala ti sara bira. Me aturugu ti kodro ti Zobah, ti Réhob, ti Ishtob* nga na ti Maacah aduti ti ala na yâ ti benyama.
9 Tongana Joab abâ so aturugu ayeke ga na devant ti ala nga na peko ti ala ti sara bira na ala, lo soro ambeni kpengba turugu ti Israël, na ala leke terê ti ala ti gue ti tiri na azo ti Syrie.+
10 Lo zia tanga ti aturugu ni na maboko ti ita ti lo Abishaï+ ti tene ala gue ala tiri na azo ti Ammon.+
11 Na pekoni lo tene: “Tongana azo ti Syrie ahon ndö ti mbi, mo ga mo sö mbi. Me tongana azo ti kodro ti Ammon ahon ndö ti mo, mbi yeke gue ti sö mo.
12 E kpengba terê ti e nga e sara mbeto pëpe+ ndali ti nzoni ti azo ti e nga na agbata ti Nzapa ti e. Jéhovah ayeke sara ande ye so ayeke nzoni na lê ti lo.”+
13 Joab na azo ti lo ague atiri na azo ti Syrie, na azo ti Syrie akpe.+
14 Tongana azo ti Ammon abâ so azo ti Syrie akpe, ala kpe na devant ti Abishaï, ala lï na yâ ti gbata ni. Na pekoni, Joab azia lege ti azo ti Ammon, lo kiri na Jérusalem.
15 Tongana azo ti Syrie abâ so azo ti Israël akinda ala, ala kiri ala bungbi terê ti ala kue.+
16 Tongaso, Hadadézer+ atokua ti iri azo ti Syrie so ayeke na ando so ayeke na terê ti Ngu ti Euphrate,+ na ala ga na kodro ti Hélam. Shobak, mokonzi ti aturugu ti Hadadézer, la aga na ala.
17 Tongana David amä tënë ni, hio lo bungbi aturugu ti Israël kue na ala fâ Ngu ti Jourdain ala gue na Hélam. Aturugu ti Syrie aleke terê ti tingbi na David, na ala sara bira na David.+
18 Me aturugu ti Syrie akpe na devant ti azo ti Israël. David afâ aturugu ti Syrie 700 so ayeke kpe na apuse ti mbarata nga na aturugu 40 000 so ayeke kpe na ambarata. Lo fâ nga Shobak, mokonzi ti aturugu ti ala, na ndo ni so.+
19 Tongana agbia kue so Hadadézer akomande na ndö ti ala abâ so azo ti Israël akinda ala awe, hio ala gue ala mä terê na azo ti Israël ti hunda siriri.+ Nga, ala yeda ti tene Israël akomande na ndö ti ala. Mbeto amû azo ti Syrie, a sara si ala mû maboko na azo ti Ammon mbeni pëpe.
