2 Samuel 12:1-31
12 Tongaso, Jéhovah atokua Nathan+ na David. Nathan aga atene na David,+ lo tene: “Na yâ ti mbeni gbata, ambeni koli use ayeke dä; mbeni ayeke zo ti mosoro nga mbeni ayeke wayere.
2 Zo ti mosoro ni ayeke na gbâ ti ataba na abagara.+
3 Me wayere ni ayeke na ye oko pëpe, lo yeke gï na mbeni kete wali-taba so lo vo.+ Lo bâ lege ti taba ni nzoni na lo kono legeoko na amolenge ti lo ti koli. Kete kobe so lo yeke na ni, lo yeke mû mbage ni na taba ni nga ye so lo yeke nyon, lo yeke mû mbeni na lo. Taba ni ayeke lango na yâ ti maboko ti lo. Lo bâ taba ni tongana molenge ti lo ti wali.
4 Mbeni lâ, mbeni gene aga na ndo ti zo ti mosoro so, me lo mû mbeni taba wala mbeni bagara ti lo pëpe ti fâ na gene so aga na ndo ti lo so. Me lo mû tâ gï taba ti wayere so, lo fâ ni na zo so aga gene na ndo ti lo so.”+
5 Tongana David amä tënë so, ngonzo agbu lo ngangu na terê ti zo ni, na lo tene na Nathan: “Ti tâ tënë ni, so Jéhovah ayeke na fini,+ zo so asara ye so alingbi na kuâ!
6 Nga a lingbi lo futa ataba osio na place ni,+ ndali ti ye so lo sara so nga ndali ti so lo bâ mawa ti mba ti lo kete pëpe.”
7 Nathan atene na David: “Mo la mo yeke zo ni so! Jéhovah Nzapa ti Israël atene: ‘Mbi la mbi soro mo lani ti ga gbia na ndö ti Israël,+ nga mbi zi mo na maboko ti Saül.+
8 Aye kue so ayeke ti wa ti mo Saül,+ mbi yeke lani nduru ti mû ni na mo. Mbi yeke lani nduru ti mû na mo awali ti lo;+ mbi zia mo gbia na ndö ti azo ti Israël na ti Juda.+ Nga tongana aye so kue alingbi mo pëpe, mbi yeke lani nduru ti sara aye mingi ahon ti so mbi sara na mo so.+
9 Ngbanga ti nyen mo bâ tënë ti Jéhovah tongana mbumbuse ye na mo sara ye so ayeke sioni na lê ti lo? Mo fâ Urie zo ti mara ti Heth na épée.+ Na peko ti so mo sara si azo ti mara ti Ammon afâ lo,+ mo mû wali ti lo ti ga wali ti mo.+
10 Ti fadeso, épée ayeke zia ande da ti mo lâ oko pëpe,+ ndali ti so mo bâ mbi tongana mbumbuse zo na lege so mo mû wali ti Urie, zo ti mara ti Heth, ti ga wali ti mo.’
11 Jéhovah atene: ‘Mbi yeke sara si mbeni ye ti ngangu alondo na da ti mo+ si awara mo. Nga na lê ti mo wani, mbi yeke mû awali ti mo na mbeni zo nde,*+ na lo yeke lango na ala na kota lâ.*+
12 Mo sara ti mo ye ni na hondengo ni,+ me mbi, mbi yeke sara ye so na lê ti azo ti Israël kue nga na kota lâ.’”*
13 David atene na Nathan: “Mbi sara siokpari na terê ti Jéhovah.”+ Nathan atene na David: “Jéhovah apardonné siokpari ti mo.*+ Mo yeke kui pëpe.+
14 Me so ye so mo sara so ane Jéhovah kete pëpe so, molenge so a dü lo na mo ade ti ninga pëpe so ayeke kui.”
15 Na pekoni Nathan ague na yanga-da ti lo.
Jéhovah asara si molenge so wali ti Urie adü lo na David so atï kobela.
16 David avoro yanga na tâ Nzapa ndali ti molenge ni. David amû kota jeûne, nga na bï, tongana lo yeke gue ka ti lango, lo yeke lango na sese.+
17 Tongaso, a-ancien so ayeke na da ti lo aluti na ndö ti lo na ala tara ti yô lo na nduzu, me lo ke nga lo ke ti te ye na ala.
18 Na mbasambala lango ni molenge ni akui, me azo ti kua ti David asara mbeto ti tene na lo so molenge ni akui. Ala tene: “Asingana so na ngoi so molenge ni angbâ e sara tënë na lo me lo ke ti mä e so, si so molenge ni akui awe so? Peut-être lo yeke sara mbeni ye so ayeke sioni mingi.”
19 Tongana David abâ so azo ti kua ti lo ayeke diko tënë na gbe ti go na mba, lo hinga so molenge ni akui awe. David ahunda azo ti kua ti lo, lo tene: “Molenge ni akui?” Ala tene: “En, lo kui.”
20 Tongaso David alondo na yâ ti sese. Lo sukula terê ti lo, lo kpaka mafuta na terê ti lo,+ lo changé bongo ti lo na lo gue na da+ ti Jéhovah lo kuku, lo kpo li ti lo na sese. Na pekoni, lo kiri na yanga-da* ti lo, lo hunda ti tene a ga na lo kobe na lo te ye.
21 Azo ti kua ti lo ahunda lo, atene: “Mo sara ye tongaso ngbanga ti nyen? Na ngoi so molenge ni angbâ na fini, mo mû jeûne na mo yeke toto. Me gï so molenge ni akui, mo londo mo te ye.”
22 Lo tene: “Na ngoi so molenge ni angbâ na fini, mbi mû jeûne+ na mbi yeke toto ndali ti so mbi tene na bê ti mbi, mbi tene: ‘Hinga ape Jéhovah ayeke sara nzoni bê na mbi, na lo zia molenge ni angbâ na fini.’+
23 Me so molenge ni akui awe so, mbi mû jeûne ni ngbanga ti nyen? Mbi peut ti kiri na lo na fini?+ Mbi la mbi yeke gue ande na peko ti lo,+ me lo la lo yeke kiri na mbi pëpe.”+
24 Na pekoni, David adë bê ti wali ti lo Bath-Shéba.+ Lo gue na ndo ti lo, lo lango na lo. A si na mbeni ngoi, wali ni adü molenge ti koli na lo zia iri ti lo Salomon.*+ Jéhovah aye molenge ni mingi,+
25 na lo tokua prophète Nathan+ ti zia iri ti molenge ni Jédidiah,* ndali ti so Jéhovah aye lo mingi.
26 Joab angbâ ti sara bira na Rabbah+ ti azo ti Ammon,+ na lo mû gbata ti royaume ni.+
27 Joab atokua azo na David, lo tene: “Mbi tiri na azo ti Rabbah+ na mbi mû mbage ti gbata ti ngu.*
28 Tongaso, mo mû tanga ti aturugu ni, mo ga mo sara camp na terê ti gbata ni na mo mû ni. Tongaso pëpe, mbi la mbi yeke mû ni, na azo ayeke tene so mbi la mbi mû gbata ni.”*
29 Tongaso, David abungbi aturugu kue, lo gue na gbata ti Rabbah, lo tiri na azo ni na lo mû gbata ni.
30 Na pekoni, lo zi couronne ti Malcam na li ti lo. Nengo ti lor so a mû a sara na couronne ni alingbi talent oko.* A yeke wara nga na terê ti couronne ni ambeni tênë ti ngangu ngere. A zia couronne ni na li ti David. David amû nga gbâ ti aye+ na yâ ti gbata ni.+
31 Lo mû azo ti gbata ni na lo sara si ala ga azo ti kua ti lo. Ambeni ayeke pika atênë, ambeni ayeke sara kua na agbakuru so a leke na wen so yanga ni aza nga na adö. Ambeni ayeke gboto abrique. A yeke ye so lo sara na azo kue ti yâ ti agbata ti azo ti Ammon la. Na pekoni, David na aturugu ti lo kue akiri na Jérusalem.
Akete tënë na terê ni
^ Wala “na mbeni mba ti mo.”
^ Na Hébreu: “na lê ti lâ.”
^ Na Hébreu: “na gbe ti lâ.”
^ Wala “ahon na ndö ti siokpari ti mo.”
^ Wala “yangbo.”
^ Iri so alondo na mbeni tënë ti yanga ti Hébreu so ndani aye ti tene “Siriri.”
^ Ndani aye ti tene “Zo so Jah aye lo mingi.”
^ Peut-être a ye ti sara tënë ti angu so ayeke na yâ ti gbata ni.
^ Na Hébreu: “na a yeke zia iri ti mbi na ndö ni.”
