2 Samuel 4:1-12
4 Tongana Ish-Bosheth,+ molenge ti Saül, amä so Abner akui na Hébron,+ ngangu ahunzi na lo kue* nga li ti azo ti Israël kue aga kirikiri.
2 Molenge ti Saül ni so ayeke na azo use so ayeke na ndö ti azo ti gbungo aye ti azo na ngangu: iri ti mbeni ayeke Baanah nga iri ti mbeni ayeke Récab. Ala yeke amolenge ti Rimmon, zo ti kodro ti Beéroth nga zo ti mara ti Benjamin. (Kozoni, a bâ Beéroth+ tongana mbeni mbage ti kodro ti azo ti mara ti Benjamin.
3 Azo ti Beéroth akpe lani ague na Guittaïm,+ na ala sara kodro kâ juska laso.)
4 Jonathan,+ molenge ti Saül, ayeke na mbeni molenge ti koli so gere ti lo use kue abuba.+ Molenge ni ayeke lani na ngu oku na ngoi so tënë ti ye so asi na Saül na Jonathan alondo na Jizréel asi.+ Wali so ayeke bata lani lo ayô lo akpe na ni, me na ngoi so lo yeke kpe kirikiri, molenge ni atï, na gere ti lo use kue abuba. Iri ti molenge ni ayeke Méphibosheth.+
5 Récab na Baanah, amolenge ti Rimmon, zo ti Beéroth, ague na da ti Ish-Bosheth na ngoi so lâ asu mingi; lo yeke wu terê ti lo na midi.
6 Récab na ita ti lo Baanah alï na yâ ti da ni mo bâ mo tene ala gue ti mû blé, na ala kpo yâ ti lo;+ na pekoni ala kpe.
7 Na ngoi so ala lï fade na yâ ti da ni, lo yeke lango na ndö ti gbogbo ti lo na yâ ti chambre. Ala kpo lo ala fâ lo, na pekoni ala fâ li ti lo. Ala mû li ti lo ni ala tambela na bï ni so kue na ndö ti lege so ague na Arabah.
8 Ala gue na li ti Ish-Bosheth+ na Gbia David na gbata ti Hébron na ala tene na lo: “Bâ li ti Ish-Bosheth, molenge ti Saül, wato ti mo+ so agi lani ti mû fini* ti mo so la.+ Seigneur na gbia ti mbi, laso Jéhovah akiri na Saül nga na ahale ti lo peko ti aye ti sioni so ala sara.”
9 Me David akiri tënë na Récab nga na ita ti lo Baanah, amolenge ti Rimmon zo ti Beéroth, atene: “Ti tâ tënë ni, so Jéhovah ayeke na fini, lo so lani lo zi mbi* na yâ ti aye ti vundu kue,+
10 tongana mbeni zo aga lani atene na mbi, atene: ‘Saül akui awe,’+ na lo pensé so lo ga na mbi nzoni sango, mbi gbu lo, mbi fâ lo+ na kodro ti Ziclag. Futa so mbi mû na zo ti gango na sango so la.
11 Asingana lo so mbi sara tongaso na lo so, si asioni zo so afâ zo ti mbilimbili na yâ ti da ti lo, na ndö ti gbogbo ti lo, si mbi hunda tënë ti mênë ti lo na maboko ti ala ape?+ nga mbi zi ala na ndö ti sese ape?”
12 Tongaso, David amû yanga na amaseka-koli so ayeke na terê ti lo ti fâ ala.+ Ala dë maboko ti ala nga na gere ti ala nga ala kanga kuâ ti ala+ nduru na terê ti mbeni place ti ngu na Hébron. Me ala mû li ti Ish-Bosheth ala lu ni na place so a lu Abner dä na Hébron.
Akete tënë na terê ni
^ Na Hébreu: “maboko ti lo awoko kue.”
^ Wala “âme.”
^ Wala “lo so lani lo mû mbeni ye na place ti âme ti mbi.”
