2 Samuel 6:1-23
6 David akiri abungbi akpengba turugu ti Israël kue; wungo ti ala ayeke 30 000.
2 Na pekoni, lo na aturugu ni kue amû lege ague na Baalé-Juda ti mû Sanduku ti tâ Nzapa ti kiri na ni.+ Azo ayeke luti ka na devant ti Sanduku ni ti di iri ti Jéhovah ti aturugu+ so aduti na ndö* ti achérubin.+
3 Sanduku ti tâ Nzapa ayeke na da ti Abinadab+ so ayeke na ndö ti kete hoto. Ye oko, ala zia ni na ndö ti fini puse+ ti gue na ni. Uzzah na Ahio, amolenge ti Abinadab, la ayeke fa lege na fini puse ni.
4 Ala mû Sanduku ti tâ Nzapa na da ti Abinadab so ayeke na ndö ti kete hoto ti hon na ni. Ahio la ayeke tambela na devant ti Sanduku ni.
5 David na azo ti Israël kue ayeke sara matanga na gbele Jéhovah. Ala pika mara ti aye nde nde kue ti pikango na mozoko, so a sara ni na keke ti genévrier, ala pika aharpe, ambeni ye ti pikango na mozoko so ayeke na kamba,+ atambourin,+ amarkas nga na acymbale.+
6 Me tongana ala si na ndo ti pikango alê ti kobe ti Nacon, Uzzah ayôro maboko ti lo, lo gbu Sanduku+ ti tâ Nzapa, ndali ti so abagara ni asara si a ngbâ kete a tï.
7 Ngonzo agbu Jéhovah Nzapa ngangu na terê ti Uzzah, na lo pika Uzzah si lo kui+ ndali ti ye so lo sara si ane Nzapa pëpe so.+ Lo kui na ndo ni so na terê ti Sanduku ti tâ Nzapa.
8 Me bê ti David ason ngangu* ndali ti so Jéhovah atuku ngonzo ti lo na ndö ti Uzzah. Ndani la a iri ndo ni so Pérès-Uzzah* juska laso.
9 Mbeto ti Jéhovah asara David+ na lango ni so, si lo tene: “Mbi yeke sara tongana nyen ti tene a ga na Sanduku ti Jéhovah na mbi ge?”+
10 David aye pëpe ti gue na Sanduku ti Jéhovah na Gbata ti David,+ ndo so lo yeke dä. Ni la lo hunda ti tene a gue na ni na da ti Obed-Édom,+ zo ti gbata ti Gath.
11 Sanduku ti Jéhovah angbâ nze ota na da ti Obed-Édom, zo ti gbata ti Gath. Jéhovah angbâ lakue ti sara tufa na ndö ti Obed-Édom nga na azo ti da ti lo kue.+
12 A tene na Gbia David, a tene: “Jéhovah asara tufa na ndö ti da ti Obed-Édom nga na ndö ti aye ti lo kue ndali ti so Sanduku ti tâ Nzapa ayeke kâ.” Tongaso, David ague amû Sanduku ni na da ti Obed-Édom ti ga na ni na Gbata ti David. Lo sara ni na kota ngia na bê.+
13 Tongana azo ti yongo+ Sanduku ti Jéhovah abi gere ti ala fani omene awe, David amû koli-bagara nga na mbeni nyama so akono pendere lo yâa na sandaga.
14 David adodo na ngangu ti lo kue na gbele Jéhovah. Andâ na ngoi ni so, David ayü* éphod so a sara ni na lin.+
15 Na ngoi so David na azo ti Israël kue ayeke ga na Sanduku+ ti Jéhovah, ala dekongo na ngia+ nga ala hûru adidi.+
16 Me na ngoi so Sanduku ti Jéhovah asi na Gbata ti David, Mical,+ molenge ti Saül, ayeke bâ ndo na lê ti fenêtre. Lo bâ Gbia David so ayeke huru nga ayeke dodo na gbele Jéhovah. Lo zere David na yâ ti bê ti lo.+
17 Azo ni aga na Sanduku ti Jéhovah na yâ ti gbata ni, ala zia ni na place so a leke ndali ni na yâ ti tente so David aleke ti zia ni dä.+ Na pekoni, David ayâa asandaga so a zö ni agbi kue+ nga na asandaga ti beoko+ na gbele Jéhovah.+
18 Tongana David ahunzi ti yâa asandaga so a zö ni agbi kue nga na asandaga ti beoko awe, lo iri tufa na ndö ti azo ni na iri ti Jéhovah ti aturugu.
19 Nga lo kangbi kobe na gbâ ti azo ti Israël so kue, akoli na awali oko oko kue. Lo mû na zo oko oko mapa so ayeke ronde ronde, gâteau so a sara ni na tûmuru nga na gâteau so a sara ni na hulengo lê ti vigne. Na pekoni azo kue ahon, zo oko oko akiri na da ti lo.
20 Na ngoi so David akiri na yanga-da ti iri tufa na ndö ti azo ti da ti lo, Mical,+ molenge ti Saül, asigi ti wara lo. Mical atene: “Laso gbia ti Israël awara gonda mingi! Lo zi bongo na terê ti lo na lê ti awali so ayeke sara kua na gbe ti awakua ti lo. Lo sara ye mo bâ mo tene zo so li ti lo ayeke dä pëpe, so azi bongo na terê ti lo na lê ti azo!”+
21 David atene na Mical: “Mbi sara ngia na gbele Jéhovah so asoro mbi ahon ti soro babâ ti mo nga na azo ti da ti lo kue. Jéhovah asoro mbi ti fa lege na azo ti Israël, azo ti lo.+ Tongaso, mbi yeke sara ngia na gbele Jéhovah.
22 Nga, mbi yeke sara si a bâ mbi tongana senge zo ahon ti so mbi sara so; mbi yeke ga même kete na lê ti mbi wani. Me awali so mo sara tënë ti ala so, ala la ayeke mû gloire na mbi.”
23 Tongaso Mical,+ molenge ti Saül, adü pëpe juska lo kui na ni.
Akete tënë na terê ni
^ A lingbi nga ti tene “na popo.”
^ Wala “vundu asara David.”
^ Ndani aye ti tene “A suru lege a wara Uzzah.”
^ Na Hébreu: “akanga.”
