2 Samuel 9:1-13
-
Tâ ndoye so David afa na Méphibosheth (1-13)
9 David ahunda ndo, atene: “Mbeni sewa ti Saül angbâ so mbi lingbi ti fa tâ ndoye na lo ndali ti Jonathan?”+
2 Mbeni wakua ti da ti Saül ayeke dä so iri ti lo ayeke Ziba.+ Tongaso, a iri lo na Gbia David, na gbia ahunda Ziba, atene: “Mo la Ziba ni?” Lo yeda, lo tene: “Mbi wakua ti mo la.”
3 Gbia akiri ahunda lo, atene: “Mbeni sewa ti Saül angbâ so mbi lingbi ti fa na lo mara ti tâ ndoye so Nzapa ayeke fa na zo?” Ziba akiri tënë na gbia, atene: “En, mbeni molenge ti Jonathan ti koli angbâ, gere ti lo use kue abuba.”+
4 Gbia ahunda lo, atene: “Lo yeke na ndo wa?” Ziba akiri tënë na gbia, atene: “Lo yeke na da ti Makir,+ molenge ti Ammiel, na kodro ti Lo-Débar.”
5 Hio, Gbia David atokua azo ti gue ti mû lo na da ti Makir, molenge ti Ammiel, na kodro ti Lo-Débar, ti ga na lo.
6 Na ngoi so Méphibosheth, molenge ti Jonathan so ayeke molenge ti Saül, asi na ndo ti David, hio lo kuku, lo kpo li ti lo na sese. Na pekoni David atene: “Méphibosheth!” Lo yeda, lo tene: “Mbi wakua ti mo la.”
7 David atene na lo: “Sara mbeto pëpe, ndali ti so mbi yeke fa tâ ndoye+ na mo ndali ti babâ ti mo Jonathan. Mbi yeke kiri na mo asese kue so ayeke ti âta ti mo Saül, nga mo yeke te ye* lakue na table ti mbi.”+
8 Ge, lo ba li ti lo na sese na lo tene: “Mbi wakua ti mo so mbi yeke tongana kuâ ti mbo+ so, mbi yeke zo wa si mo bi bê* ti mo na mbi tongaso so?”
9 Gbia ni atokua ndo a iri Ziba, wakua ti Saül, na lo tene na lo: “Ye kue so ayeke ti Saül nga na aye kue ti sewa ti lo, mbi mû ni na âta ti wa ti mo.+
10 Mo na amolenge ti mo nga na azo ti kua ti mo, ala kue la ala yeke fâ yaka ndali ti lo. Ala yeke bungbi alê ti kobe ni ti mû kobe na afami ti âta ti wa ti mo ni. Me ti lo Méphibosheth, âta ti wa ti mo ni, lo yeke te kobe lakue na table ti mbi.”+
Ziba ayeke na amolenge ti koli 15 nga na azo ti kua 20.+
11 Ziba atene na gbia, lo tene: “Seigneur na gbia ti mbi, aye kue so mo hunda na mbi wakua ti mo ti sara, mbi yeke sara ni.” Tongaso, Méphibosheth ate ye na table ti David* tongana amolenge ti gbia.
12 Méphibosheth ayeke nga na mbeni molenge, iri ti lo ayeke Mica.+ Azo ti da ti Ziba kue aga azo ti kua ti Méphibosheth.
13 Méphibosheth aduti na Jérusalem, ndali ti so lakue lo yeke te kobe na table ti gbia.+ Gere ti lo use kue abuba.+
