Genèse 28:1-22
28 Tongaso, Isaac airi Jacob, lo iri tënë nzoni na ndö ti lo, na lo mû yanga na lo, lo tene: “Mo mû wali na popo ti amolenge-wali ti Canaan pëpe.+
2 Mo gue na Paddan-Aram na da ti Béthuel, babâ ti mama ti mo. Kâ, mo mû wali na popo ti amolenge ti Laban,+ ita ti mama ti mo ti koli.
3 Nzapa so ngangu ti lo ahon angangu kue ayeke sara tufa na ndö ti mo, lo yeke sara si mo dü gbani nga mo wu mingi, na mo yeke ga amara so abungbi aga congrégation.+
4 Tufa so Nzapa amû zendo ti sara ni na ndö ti Abraham ayeke ga na ndö ti mo+ na ahale* ti mo, si mo mû sese so mo sara kodro dä tongana wande ti ga ti mo, sese so Nzapa amû na Abraham.”+
5 Tongaso, Isaac atokua Jacob; na Jacob amû lege ti gue na Paddan-Aram na ndo ti Laban, molenge ti Béthuel so ayeke Araméen,+ ita ti Rébecca,+ mama ti Jacob na Ésaü.
6 Ésaü abâ so Isaac airi tënë nzoni na ndö ti Jacob na lo tokua lo na Paddan-Aram ti mû wali kâ. Lo bâ nga so na ngoi so Isaac airi tënë nzoni na ndö ti Jacob, lo mû yanga na lo, lo tene: “Mû wali na popo ti amolenge-wali ti Canaan pëpe.”+
7 Jacob amä yanga ti babâ na mama ti lo, na lo mû lege ti gue na Paddan-Aram.+
8 Ge, Ésaü ahinga so amolenge-wali ti Canaan anzere na lê ti babâ ti lo Isaac pëpe.+
9 Tongaso Ésaü ague na ndo ti Ismaël, na lo mû Mahalath ti ga wali ti lo. Lo mû lo na ndö ti awali so lo yeke na ni awe.+ Mahalath ayeke molenge ti Ismaël, molenge ti Abraham, nga lo yeke ita ti Nébaïoth.
10 Jacob azia Béer-Shéba, na lo yeke na lege ti guengo na Haran.+
11 Lo gue ngbii lo si na mbeni ndo, na lo leke ti lango kâ na bï ni ndali ti so lâ alinda awe. Tongaso, lo mû mbeni tênë ti ndo ni so, lo zia ni na gbe ti li ti lo, na lo lango na ndo so.+
12 Lo bâ li ti lo, na lo bâ mbeni escalier* so alondo na sese juska na yayu; na lo bâ a-ange ti Nzapa ayeke monté na ayeke descend na ndö ni.+
13 Jéhovah ayeke na ndö ni na nduzu. Lo tene:
“Mbi yeke Jéhovah, Nzapa ti âta ti mo Abraham nga Nzapa ti Isaac.+ Sese so mo yeke lango na ndö ni so, mbi yeke mû ni na mo na ahale*+ ti mo.
14 Ahale* ti mo ayeke ga ande tongana alê ti mbutu,+ na mo yeke kangbi ande na mbage ti ouest, est, nord nga na sud. Na lege ti mo na hale* ti mo, amara kue ti sese ayeke wara tënë nzoni.*+
15 Mbi yeke na mo; mbi yeke bata mo na ndo kue so mo gue dä nga mbi yeke kiri na mo na sese so.+ Mbi yeke zia ande mo pëpe juska mbi sara ye so mbi mû zendo ni na mo so si.”+
16 Na pekoni, Jacob azingo na lango na lo tene: “Biani Jéhovah ayeke na ndo so, me mbi hinga ti mbi pëpe.”
17 Mbeto asara lo, na lo tene: “Ndo so asara zo mbeto mingi! So ayeke mbeni ye nde pëpe, me da ti Nzapa+ nga porte ti yayu.”+
18 Tongaso, Jacob alondo hio na ndapre, lo mû tênë so lo zia li ti lo na ndö ni so, lo kpo ni na nduzu tongana pilier na lo tuku mafuta na ndö ni.+
19 Lo iri ndo ni so Béthel;* me iri ti gbata ni kozo ayeke Luz.+
20 Jacob amû zendo, lo tene: “Tongana Nzapa angbâ na mbi, lo bata mbi na yâ ti tambela ti mbi, lo mû na mbi mapa ti te na bongo ti yü
21 nga mbi kiri na siriri na da ti babâ ti mbi, andâ Jéhovah afa biani so lo yeke Nzapa ti mbi.
22 Nga, tênë so mbi kpo ni na nduzu tongana pilier ayeke ga ande da ti Nzapa,+ nga aye kue so mo yeke mû ande ni na mbi, mbi yeke mû dîme ni na mo.”
Akete tënë na terê ni
^ Na Hébreu: “ngongoa.”
^ Wala “échelle.”
^ Na Hébreu: “ngongoa.”
^ Wala “ayeke wara ande tënë nzoni ndali ti ala wani.”
^ Na Hébreu: “ngongoa.”
^ Na Hébreu: “Ngongoa.”
^ Ndani aye ti tene “Da ti Nzapa.”
