Genèse 34:1-31
34 Dinah, molenge ti Léa ti wali so lo dü na Jacob,+ ayeke gue ka ti duti na* amaseka-wali ti kodro ni.+
2 Tongana Sichem, molenge ti Hamor mbeni mokonzi ti sese ni so ayeke zo ti Hévi,+ abâ Dinah, lo gbu lo na lo lango na lo na ngangu.
3 Bê* ti lo kue gï na ndö ti Dinah, molenge ti Jacob; lo ye maseka ni ngangu nga lo yeke tene anzerengo tënë na lo ti woko bê ti lo.*
4 Tongaso, Sichem atene na babâ ti lo Hamor:+ “Mû na mbi maseka-wali so ti ga wali ti mbi.”
5 Na ngoi so Jacob amä so lo buba molenge ti lo Dinah, andâ amolenge ti lo ti koli ayeke na terê ti anyama ti lo na ngonda. Tongaso Jacob azi yanga pëpe juska ala kiri awe si.
6 Na pekoni, Hamor, babâ ti Sichem, ague ti sara lisoro na Jacob.
7 Gï so amolenge ti Jacob amä tënë so, ala londo na ngonda ni ala kiri. Bê ti ala ason, na ngonzo agbu ala mingi ndali ti so lo bi nengo ti Israël na sese na lege so lo lango na molenge ti Jacob,+ atâa so a lingbi a sara mara ti ye tongaso pëpe.+
8 Hamor asara tënë na ala, lo tene: “Molenge ti mbi Sichem asara nzara ti* molenge ti ala ti wali ni mingi. Pardon, ala mû lo na lo ti ga wali ti lo,
9 nga e na ala e mä terê ti sara mariage na popo ti e.* Ala mû amolenge ti ala ti wali na e, na ala mû amolenge ti e ti wali.+
10 Ala sara kodro na e, nga ala sara ye ti bê ti ala na sese ni. Ala sara kodro dä, ala dë buze dä, na ndo ni aga kodro ti ala.”
11 Na pekoni, Sichem atene na babâ ti maseka ni nga na aita ti lo: “Zia mbi nzere na lê ti ala, na mbi yeke mû na ala ye kue so ala hunda.
12 Nginza ti peko ti wali ni na aye ti peko ti lo so ala yeke hunda ni na mbi, ala diko ni gbani gbani.+ Mbi yeke mû na ala ye kue so ala fa na mbi. Me ala mû na mbi maseka ni ti ga wali ti mbi.”
13 Amolenge ti Jacob akiri tënë na Sichem nga na babâ ti lo Hamor na handa ndali ti so lo buba ita ti ala Dinah.
14 Ala tene na ala: “E lingbi ti yeda na aye ni so pëpe, nga e lingbi pëpe ti mû ita ti e ti wali na mbeni koli so afâ ganza pëpe,*+ ngbanga ti so a yeke ye ti kamene ndali ti e.
15 E yeke yeda gï tongana ala sara ye so: Ala ga tongana e, ala fâ koli kue na popo ti ala na ganza.+
16 Na pekoni, e yeke mû ande amolenge ti e ti wali na ala, na e yeke mû amolenge ti ala ti wali; e yeke sara kodro na ala, na e na ala e ga mara oko.
17 Me tongana ala mä e pëpe si ala ke ti fâ ganza, e yeke mû molenge ti e ti wali e hon.”
18 Tënë ti ala ni anzere na Hamor+ nga na molenge ti lo Sichem.+
19 Maseka-koli ni alondo hio ti sara ye so ala hunda na lo,+ ngbanga ti so molenge ti Jacob ti wali agbu bê ti lo mingi; nga, lo yeke zo so a ne lo mingi ahon tanga ti azo kue ti da ti babâ ti lo.
20 Tongaso, Hamor na molenge ti lo Sichem ague na yanga ti gbagba ti gbata ni na ala sara tënë na akoli ti gbata ni,+ ala tene:
21 “Akoli so aye ti duti na e na siriri. Zia ala sara kodro na sese ni nga ala dë buze dä, ndali ti so sese ni akono alingbi na e nga na ala. E lingbi ti mû amolenge ti ala ti wali ti ga awali ti e, na e lingbi ti mû amolenge ti e ti wali na ala.+
22 Me a lingbi koli oko oko kue na popo ti e afâ ganza tongana ti ala.+ A yeke gï tongana e sara ye so la ala yeke yeda ti sara kodro na e si e na ala e ga mara oko.
23 Na pekoni, aye ti ala, amosoro ti ala nga na anyama ti ala kue ayeke ga ande ti e ape? Tongaso, e yeda na tënë ti ala ni, si ala sara kodro na e.”
24 Azo kue so abungbi na yanga ti gbagba ti gbata ni amä Hamor na molenge ti lo Sichem, na akoli kue afâ ganza, azo kue so abungbi na yanga ti gbagba ni.
25 Ye oko, na ota lango ni, na ngoi so kä ti ganza ni angbâ ti son ala ngangu, amolenge ti Jacob use, Siméon na Lévi, aita ti Dinah,+ zo oko oko amû épée ti lo, ala lï yeke na yâ ti gbata ni na ala fâ koli oko oko kue.+
26 Ala fâ Hamor na molenge ti lo Sichem na épée. Na pekoni, ala mû Dinah na da ti Sichem, ala hon.
27 Atanga ti amolenge ti Jacob ti koli asi na ndö ti kuâ ti akoli so a fâ ala na épée so, nga ala nzi aye ti gbata ni ndali ti so a buba ita ti ala ti wali.+
28 Ala mû ataba ti ala, abagara ti ala, akororo ti ala, aye kue so ayeke na yâ ti gbata ni nga na aye kue so ayeke na ngonda.
29 Ala mû nga aye ti ala kue, ala gbu akete molenge ti ala kue nga na awali ti ala, na ala nzi aye kue so ayeke na yâ ti ada.
30 Na pekoni, Jacob atene na Siméon na Lévi:+ “Ala zia mbi na yâ ti kota kpale* na lege so ala sara si mbi fun sioni na hôn ti azo ti sese ni, na hôn ti azo ti Canaan na azo ti Périzzi. Bâ, mbi yeke na azo mingi pëpe, ala yeke bungbi ande oko ti tiri na mbi, na ala yeke futi mbi, mbi na azo ti da ti mbi.”
31 Me ala tene: “Ita ti e ayeke wali-ndumba si zo asara mara ti ye tongaso na lo?”
Akete tënë na terê ni
^ Wala “ti bâ.”
^ Wala “Âme.”
^ Na Hébreu: “lo sara tënë na bê ti maseka-wali ni.”
^ Wala “Âme ti molenge ti mbi Sichem aye.”
^ Wala “e te mbele ti mariage.”
^ Na Hébreu: “so poro ti pito ti lo angbâ.”
^ Wala “Ala sara si a ke mbi biani biani.”
