Genèse 46:1-34
46 Tongaso, Israël amû aye ti lo kue,* lo tï na lege. Na ngoi so lo si na Béer-Shéba,+ lo mû asandaga na Nzapa ti babâ ti lo Isaac.+
2 Nzapa asara tënë na Israël na bï na yâ ti vision, lo tene: “Jacob, Jacob!” na lo yeda, lo tene: “Mbi la!”
3 Lo tene: “Mbi yeke tâ Nzapa, Nzapa ti babâ ti mo.+ Sara mbeto ti gue na Égypte pëpe, ndali ti so mbi yeke sara si mo ga kota mara kâ.+
4 Mbi la mbi yeke gue legeoko na mo na Égypte, na mbi la mbi yeke mû mo ande ti kiri na mo.+ Joseph la ayeke leke ande lê ti mo.”*+
5 Na pekoni, Jacob alondo na Béer-Shéba lo hon; amolenge ti Israël ti koli ayô babâ ti ala Jacob, amolenge ti ala nga na awali ti ala na yâ ti apuse so Pharaon atokua ti yô na lo.
6 Ala mû anyama ti ala nga na aye ti ala so ala wara na sese ti Canaan. Ala gue ala si na Égypte, Jacob na ahale ti lo kue.
7 Lo ga na Égypte, lo na amolenge ti lo ti koli na ti wali kue nga na a-âta ti lo kue, so ti tene lo na ahale ti lo kue.
8 Iri ti amolenge ti Israël ti koli, so ti tene Jacob na amolenge ti lo, so aga na Égypte+ ayeke so: Ruben, kozo molenge ni.+
9 Amolenge ti Ruben ayeke Hanok, Pallu, Hesron na Carmi.+
10 Amolenge ti Siméon+ ayeke Jémuel, Jamin, Ohad, Jakin, Zohar na Shaül+ so mama ti lo ayeke mbeni wali ti sese ti Canaan.
11 Amolenge ti Lévi+ ayeke Guershon, Kohath na Mérari.+
12 Amolenge ti Juda+ ayeke Er, Onan, Shélah,+ Pérès+ na Zérah.+ Me Er na Onan akui na sese ti Canaan.+
Amolenge ti Pérès ayeke Hesron na Hamul.+
13 Amolenge ti Issacar ayeke Tola, Puvah, Iob na Shimron.+
14 Amolenge ti Zabulon+ ayeke Sérèd, Élon na Jahléel.+
15 Amolenge ti Léa so lo dü na Jacob na Paddan-Aram la, nga na Dinah,+ molenge ti Jacob ti wali. Amolenge ti lo ti koli na ti wali kue* ayeke 33.
16 Amolenge ti Gad+ ayeke Ziphion, Haggui, Shuni, Ezbon, Éri, Arodi na Aréli.+
17 Amolenge ti Aser+ ayeke Imnah, Ishvah, Ishvi na Bériah; ita ti ala ti wali ayeke Sérah.
Amolenge ti Bériah ayeke Héber na Malkiel.+
18 Amolenge ti Zilpah+ la, so Laban amû lo na molenge ti lo Léa. Lo dü ala na Jacob: ala* kue ayeke 16.
19 Amolenge ti Rachel, wali ti Jacob, ayeke Joseph+ na Benjamin.+
20 Asénath,+ molenge ti Potiphéra prêtre ti On,* adü na Joseph Manassé+ na Éphraïm+ na kodro ti Égypte.
21 Amolenge ti Benjamin+ ayeke Béla, Béker, Ashbel, Guéra,+ Naaman, Éhi, Rosh, Muppim, Huppim+ na Ard.+
22 Amolenge ti Rachel ti koli so lo dü ala na Jacob la: ala* kue ayeke 14.
23 Molenge* ti Dan+ ayeke Hushim.+
24 Amolenge ti Nephtali+ ayeke Jahzéel, Guni, Jézer na Shillem.+
25 Amolenge ti Bilhah la, so Laban amû lo na molenge ti lo Rachel. Lo dü ala na Jacob: ala* kue ayeke mbasambala.
26 Azo* kue so asigi na yâ ti Jacob si ague na lo na Égypte ayeke 66; a diko awali ti amolenge ti Jacob na yâ ni pëpe.+
27 Amolenge ti Joseph so a dü ala na lo na Égypte ayeke use.* Azo* kue ti da ti Jacob so aga na Égypte ayeke 70.+
28 Jacob atokua Juda+ ti hon kozo ti lo ti tene na Joseph so lo yeke na lege ti guengo na Goshen. Tongana ala si na sese ti Goshen,+
29 Joseph ahunda ti tene a leke puse ti mbarata ti lo, na lo gue ti wara babâ ti lo Israël na Goshen. Na ngoi so lo fa terê ti lo na babâ ti lo, hio lo tï na ndö ti go ti lo na lo toto aninga.*
30 Israël atene na Joseph: “Ti so ni so, mbi lingbi ti kui senge; mbi bâ lê ti mo awe, na mbi hinga so mo ngbâ na fini.”
31 Joseph atene na aita ti lo ti koli nga na azo ti da ti babâ ti lo, lo tene: “Mbi yeke gue ti fa peko ti ye ni na Pharaon,+ mbi tene: ‘Aita ti mbi ti koli na azo ti da ti babâ ti mbi so ayeke lani na sese ti Canaan aga na mbi ge awe.+
32 Akoli ni ayeke aberger,+ ala yeke bata anyama,+ na ala ga na ataba na abagara ti ala nga na aye ti ala kue.’+
33 Tongana Pharaon airi ala na lo hunda ala, lo tene: ‘Ala yeke sara kua ti nyen?’
34 Ala tene: ‘E azo ti kua ti mo e yeke azo ti batango anyama ngbene ye so e yeke maseka juska fadeso, e na akotara ti e,’+ tongaso si ala lingbi ti sara kodro na sese ti Goshen,+ ndali ti so zo kue so ayeke bata ataba ayeke sioni mingi na lê ti azo ti Égypte.”+
Akete tënë na terê ni
^ Wala “azo kue so ayeke ti lo.”
^ So ti tene lo yeke kanga lê ti Jacob na ngoi so lo kui.
^ Wala “A-âme kue ti amolenge ti lo ti koli na ti wali.”
^ Wala “a-âme.”
^ So ti tene Héliopolis.
^ Wala “a-âme.”
^ Na Hébreu: “Amolenge-koli.”
^ Wala “a-âme.”
^ Wala “A-âme.”
^ Wala “a-âme use.”
^ Wala “A-âme.”
^ Wala “lo toto na ndö ti go ti lo fani mingi.”
