Jérémie 13:1-27
13 Bâ tënë so Jéhovah atene na mbi la: “Mo gue mo vo ceinture so a sara na lin, mo kanga ni na gbe ti yâ ti mo, me mo yôro ceinture ni na yâ ti ngu pëpe.”
2 Tongaso, mbi sara ye alingbi na tënë ti yanga ti Jéhovah, mbi gue mbi vo ceinture ni mbi kanga ni na gbe ti yâ ti mbi.
3 Jéhovah akiri asara tënë na mbi ti fani use ni, atene:
4 “Mo mû ceinture so mo vo si mo kanga na gbe ti yâ ti mo so, mo londo mo gue na Ngu ti Euphrate na mo honde ceinture ni kâ na yâ ti mbeni dû ti tênë.”
5 Tongaso, mbi gue mbi honde ceinture ni na terê ti Ngu ti Euphrate, gï tongana ti so Jéhovah amû yanga na mbi.
6 Me lango mingi na pekoni, Jéhovah atene na mbi: “Mo londo mo gue na Ngu ti Euphrate, mo mû ceinture so mbi mû yanga lani na mo ti honde ni kâ so.”
7 Tongaso, mbi gue na Ngu ti Euphrate mbi zi ceinture ni na ndo so mbi honde ni lani dä so, na mbi bâ so ceinture ni abuba kue awe. Zo alingbi ti sara na mbeni ye oko pëpe.
8 Na pekoni, Jéhovah atene na mbi:
9 “Bâ tënë so Jéhovah atene la: ‘A yeke legeoko tongaso si mbi yeke futi ande wuma ti azo ti Juda nga na wuma ti azo ti Jérusalem so ahon ndö ni so.+
10 Azo ti sioni so ake ti mä yanga ti mbi,+ ala sara kpengba-li na ala yeke mû peko ti ye so bê ti ala afa na ala,+ nga ala yeke mû peko ti ambeni nzapa nde, ala yeke voro anzapa ni so nga ala yeke kuku na gbe ti ala, ala yeke ga tongana ceinture ni so zo alingbi ti sara na mbeni ye oko ape so.’
11 Jéhovah atene: ‘Legeoko tongana ti so ceinture ayeke gbu gbe ti yâ ti zo, mbi sara si azo ti mara ti Israël kue nga na azo ti mara ti Juda kue agbu mbi, ti tene ala ga azo ti mbi,+ azo so amû iri ti mbi na nduzu,+ azo so amû gloire na mbi, mbeni ye so azo ane mbi ndali ni. Me ala mä yanga ti mbi pëpe.’+
12 “Ti mo, mo tene tënë so nga na ala, mo tene: ‘Bâ tënë so Jéhovah, Nzapa ti Israël, atene la: “Vin ayeke si ande yâ ti kota ta oko oko kue.”’ Me ala yeke tene na mo, atene: ‘E hinga tongaso kozo awe ape? E hinga so vin ayeke si yâ ti kota ta oko oko kue.’
13 Na pekoni mo tene na ala: ‘Bâ tënë so Jéhovah atene la: “Mbi yeke sara si azo kue ti yâ ti kodro so asoulé,+ agbia ni so ayeke duti na ndö ti trône ti David, aprêtre na aprophète nga na azo ti kodro ti Jérusalem kue.”
14 Jéhovah atene: “Mbi yeke mû ala ti pika ala na terê ti mba si yâ ti ala afâ kete kete, mbi yeke mû ababâ ti pika ala na terê ti amolenge ti ala.+ Mbi yeke bâ mawa ti ala pëpe nga mbi yeke bi bê ti mbi na vundu ti ala pëpe, wala mbi yeke sara nzoni bê na ala pëpe. Mbeni ye oko ayeke kanga lege na mbi pëpe ti futi ala.”’+
15 Ala dengi mê ti ala, na ala mä mbi.
Ala sara wuma pëpe, ndali ti so Jéhovah asara tënë awe.
16 Ala mû gloire na Jéhovah Nzapa ti ala,kozo ti tene lo sara si kota lâ aga vukongo ndo,kozoni si ala pika gere ti ala na li ti ahoto so ndo avuko dä.
Ala yeke ku ande ti wara lumière,me lo yeke tokua vukongo ndo;lo yeke sara si vukongo ndo ni akiri aga ndo so avuko pitipiti.+
17 Tongana ala ke ti mä mbi,mbi yeke* toto na hondengo ni ndali ti wuma ti ala.
Mbi yeke toto na ngu ti lê, na ngu ti lê ti mbi ayeke sua gbani gbani,+ngbanga ti so a mû ataba ti Jéhovah+ a gue na ala na ngbâa awe.
18 Ala tene na gbia nga na mama ti gbia,+ ala tene: ‘Ala duti na kete ndo,ndali ti so pendere couronne ti ala ayeke londo ande na li ti ala ti tï na sese.’
19 A kanga yanga ti* agbata so ayeke na mbage ti sud, zo ti zi yanga ni ayeke dä pëpe.
A mû azo ti Juda kue a gue na ala na mbeni kodro nde, a gue na ala kue na kodro-wande.+
20 Yô lê ti mo na nduzu na mo bâ ala so alondo na mbage ti nord si ayeke ga so.+
Ataba so a mû lani na mo so ayeke na ndo wa? apendere taba ti mo so.+
21 Mo yeke tene nyen ande na ngoi soakota kamarade ti mo so mo fa ye na ala na komansema ni so la aga ti punir mo?+
A yeke son mo ande tongana songo yâ ti wali so angbâ ti dü, ni la ape?+
22 Même tongana mo tene na yâ ti bê ti mo kâ, mo tene: ‘Ngbanga ti nyen la aye so asi na mbi so?’+
A yeke ndali ti kota sioni so mo sara la si a zi jupe ti mo na terê ti mo,+nga si a sara ye ti ngangu na talon ti mo so.
23 Mbeni zo ti mara ti Cush* apeut ti changé poro ti terê ti lo? Wala zen apeut ti changé nzoroko ti terê ti lo?+
Tongana ye ni ayeke tongaso, ka fade ala nga ala peut ti sara ye ti nzoni,ala so a fa na ala lege ti sarango sioni awe so.
24 Ni la mbi yeke kangbi ala kirikiri tongana asaleté ti peko ti alê ti kobe so pupu ti désert ahon na ni.+
25 So ye ti mo la, mbage so mbi haka si mbi mû na mo la,ngbanga ti so mo girisa mbi awe+ na mo zia bê ti mo na ndö ti atënë ti mvene,”+ tënë ti yanga ti Jéhovah la.
26 “Tongaso, mbi yeke yô yanga ti bongo ti mo na terê ti mo na nduzu juska asi na lê ti mo,na azo ayeke bâ kamene ti mo,+
27 gingo akoli so mo yeke gi,+ nga dekongo so mo dë tongana mbarata so nzara ti awali ni asara lo si lo yeke dekongo,na sarango aye ti ndumba ti mo so amû kamene na zo.
So mo yeke sara ni na ndö ti ahoto, nga na yâ ti ayaka so,mbi bâ afungo sarango ye ti terê ti mo awe.+
Mawa na mo, Jérusalem!
Mo yeke ngbâ na yâ ti sioni ti mo ni juska lawa?”+
Akete tënë na terê ni
^ Wala “âme ti mbi ayeke.”
^ Wala “Azo angoro.”
^ Wala “Mbeni zo ti Éthiopie.”
