Jérémie 17:1-27
17 “A sû tënë ti siokpari ti Juda na mbeni keke-mbeti so ayeke ti wen.
A mû keke-mbeti so yanga ni ayeke na diamant si a kpaka ni na ndö ti tableau ti bê ti ala,nga na ndö ti didi ti agbalaka ti ala,
2 même amolenge ti ala ayeke dabe ti ala na agbalaka ti ala nga na ayongoro yanda*+ ti ala so ala sara,na terê ti akeke so kugbe ni adü mingi, na ndö ti ayongoro hoto,+
3 na ndö ti ahoto so ayeke na yâ ti ando so angoro akete kodro.
Mbi yeke zia ande si a mû aye ti mosoro ti mo kue a hon na ni,+même ando ti mo so ayeke na nduzu, ndali ti so siokpari ahon ndö ni na yâ ti akodro ti mo kue.+
4 Mo wani mo yeke ke ande héritage ti mo so mbi mû ni lani na mo so.+
Mbi yeke sara si mo sara kua na awato ti mo na yâ ti mbeni kodro so mo hinga ni pëpe,+ndali ti so mo sara si ngonzo ti mbi alondo tongana wâ.+
A yeke gbi kpu na kpu.”
5 Bâ tënë so Jéhovah atene la:
“Deba aga na li ti zo* so azia bê ti lo na senge senge zo ti sese,+zo so azia bê ti lo na ndö ti ngangu ti zo ti mitele,+zo so bê ti lo ahon yongoro na Jéhovah.
6 Lo yeke ga tongana mbeni keke so aluti gï lo oko na yâ ti désert.
Lo yeke duti pëpe na pasa ti bâ ye ti nzoni so ayeke ga,me lo yeke sara kodro na ndo so ahule na yâ ti benyama,na ndo so gï ingo la ayeke dä, so zo alingbi ti sara kodro dä pëpe.
7 Me tufa aga na ndö ti zo* so azia bê ti lo na Jéhovah,zo so ayeke na confiance na Jéhovah.+
8 Lo yeke ga tongana mbeni keke so a lu ni na terê ti ngu,keke so gunda ni ague juska na terê ti kete ngu so ayeke sua.
Lo yeke hinga pëpe ngoi so ndowa ayeke ga na ni,me akugbe ti lo ayeke dü lakue gbani gbani.+
Na ngoi ti buru, lo yeke gi bê ti lo pëpe,nga lo yeke kaï ti lë lengo pëpe.
9 Bê ti zo ayeke handa zo mingi ahon ambeni ye kue, nga a yeke sioni mingi.+
Zo wa la alingbi ti hinga bê ti zo?
10 Mbi Jéhovah, mbi yeke gi yâ ti bê ti zo,+mbi yeke gi ti bâ ye so ayeke na gbe ti bê ti lo kâ,ti futa zo oko oko alingbi na aye so lo sara,ti futa lo alingbi na aye ti peko ti asarango ye ti lo.+
11 Zo so awara amosoro na lege ti likisi,lo yeke tongana dodoro so abungbi apara so lo la lo bi ni pëpe.
Amosoro so ayeke kpe ande na maboko ti lo+ na yâ ti ndambo ti gigi ti lo,na nda ni lo yeke ga zo so li ti lo ayeke dä pëpe.”
12 Mbeni trône ti gloire ayeke dä so a yâa ni na nduzu ngbene ye na tongo nda ni,a yeke ni la ayeke temple ti e.+
13 Jéhovah, mo so mo yeke beku ti Israël,kamene ayeke sara azo kue so adö mo azia.
Ala so ake mo, a yeke sû ande iri ti ala na sese,+ndali ti so Jéhovah, mo so mo yeke li ti ngu so amû fini na zo, ala dö mo azia.+
14 Aï! Jéhovah, kaï kobela ti mbi, na terê ti mbi ayeke kaï.
Sö mbi, na mbi yeke sö kuâ;+ndali ti so mo la mbi yeke mû gloire na mo.
15 Bâ! Ambeni zo ayeke tene na mbi, atene:
“Tënë ti Jéhovah ni ayeke na ndo wa?+
Zia tënë ni aga ma!”
16 Me ti mbi, mbi zia lâ oko pëpe ti mû peko ti mo tongana berger,wala mbi ye pëpe si lâ ti vundu aga.
Mo hinga nzoni mingi atënë so kue mbi tene na yanga ti mbi;mbi tene atënë so kue na lê ti mo.
17 Mo ga pëpe mbeni ye so amû mbeto na mbi.
Mo yeke ndo so mbi yeke bata terê ti mbi dä na lâ ti vundu.
18 Zia si kamene agbu azo so asara ye ti ngangu na mbi,+me mo sara si a zia kamene na lê ti mbi pëpe.
Zia si mbeto ahon ndö ti ala,me mo sara si mbeto ahon ndö ti mbi pëpe.
Sara si lâ ti ye ti vundu aga na ndö ti ala,+neka ala na mo futi ala biani biani.*
19 Bâ tënë so Jéhovah atene na mbi: “Mo gue mo luti na yanga ti gbagba ti amolenge ti mara ni, yanga ti gbagba so agbia ti Juda ayeke lï dä nga ala yeke sigi dä, ayanga ti gbagba ti Jérusalem kue.+
20 Mo tene na ala, mo tene: ‘Ala mä tënë ti Jéhovah, ala agbia ti Juda, azo kue ti Juda nga azo kue so asara kodro na Jérusalem, azo kue so ayeke lï na ayanga ti gbagba so.
21 Jéhovah atene: “Ala sara* hange, ala yô mbeni kungba na lango ti Sabbat pëpe wala ala linda na kungba na ayanga ti gbagba ti Jérusalem pëpe.+
22 Ala mû mbeni kungba na da ti ala ti sigi na ni na lango ti Sabbat pëpe; ala sara mbeni kua oko pëpe.+ Ala bata lango ti Sabbat ni nde ndali ti mbi, gï tongana ti so mbi mû yanga lani na akotara ti ala.+
23 Me ala mä lani yanga ti mbi pëpe wala ala dengi mê ti ala na tënë ti mbi pëpe, ala sara kpengba-li,* ala ke ti mä mbi wala ti zia si mbi fa lege na ala.”’+
24 “‘Me Jéhovah atene: “Tongana ala mä yanga ti mbi biani, na ala mû mbeni kungba ala linda na ni na ayanga ti gbagba ti gbata ni na lango ti Sabbat pëpe nga ala bata lango ti Sabbat nde ndali ti mbi na lege so ala sara mbeni kua na lango ni so pëpe,+
25 tongaso, agbia na amokonzi so aduti na ndö ti trône ti David+ nga ayeke linda na ayanga ti gbagba ti gbata ni; ala yeke kpe na apuse ti mbarata nga na ambarata, ala nga na amokonzi ni, akoli so ayeke na Juda nga na azo so asara kodro na Jérusalem;+ azo ayeke sara ande kodro lakue na yâ ti gbata so.
26 Azo ayeke londo na Juda, na ando so angoro Jérusalem, ala yeke londo na kodro ti Benjamin,+ na akpangbala ndo,+ na akodro so ayeke na ando so ahoto ayeke dä nga na Négueb.* Ala yeke ga na asandaga kue so a zö ni agbi kue,+ ambeni sandaga,+ asandaga ti alê ti kobe,+ dukane nga na asandaga ti mungo singila, ala yeke ga na ni na yâ ti da ti Jéhovah.+
27 “‘“Me tongana ala mä yanga ti mbi pëpe na lege so ala bata lango ti Sabbat nde ndali ti mbi pëpe, ala mû akungba ala linda na ni na ayanga ti gbagba ti Jérusalem na lango ti Sabbat, mbi yeke bi wâ ande na terê ti ayanga ti gbagba ni, na a yeke gbi ande angangu tour ti Jérusalem kue+ na wâ ni so ayeke mingo pëpe.”’”+
Akete tënë na terê ni
^ Bâ na kete bakari.
^ Wala “ngangu zo.”
^ Wala “ngangu zo.”
^ Wala “mo futi ala fani use.”
^ Wala “Âme ti ala asara.”
^ Na Hébreu: “ala kpengba go ti ala.”
^ Wala “na mbage ti sud.”
